တၢ်သး၀ံၣ်တၢ်န့ၣ် လဲလိာ်၀ဲ ခိၣ်နူာ်န့ၣ်လီၤႉ တၢ်ဃုသ့ၣ်ညါတနီၤပာ်ဖျါ၀ဲလၢ ဖဲပသး၀ံၣ် တၢ်အခါ‚ ပနီၢ်ခိပျၢ်လီၤ ဟီၣ်မိအသဟီၣ်တဖၣ်လၢ အမၤစၢ်လီၤ တၢ်သူၣ်ကိၢ်သးဂီၤဒီးတၢ်ဆီၣ်သနံးန့ၣ်လီၤႉ တၢ်ဃုထံအဂၤတမံၤပာ်ဖျါ၀ဲလၢ ဖဲပှၤတဖုသး၀ံၣ်တၢ်တပူၤဃီအခါန့ၣ်‚ အ၀ဲသ့ၣ်အသးအတၢ်စံၣ်န့ၣ်ဃူလိာ်သး တဂၤဒီးတဂၤ န့ၣ်လီၤႉ
တၢ်မၢဖိစီၤပီလူးကွဲးဟ့ၣ်ဂံၢ်ဟ့ၣ်ဘါ တၢ်အိၣ်ဖှိၣ် လၢကကတိၤလိာ်သးတဂၤဒီးတဂၤ လၢထါစံးထီၣ်ပ့တၢၤ တဖၣ်‚ ထါသး၀ံၣ်တဖၣ်ဒီး သူၣ်ဂ့ၢ်သးကျိၤအတၢ်သး၀ံၣ် တဖၣ်န့ၣ်လီၤ (အ့း ၅း၁၉) ႉ ဒီးလံာ်စီဆှံပာ်ဖျါ‚ ‘သး၀ံၣ်ထီၣ်’ အါန့ၢ်အဘျီယဲၢ်ဆံန့ၣ်လီၤႉ
ဖဲ ၂ ကွဲးနီၣ်တၢ် ၂၀ န့ၣ်‚ ပဖးဘၣ်ယွၤအပှၤဂီၢ်မုၢ် တဖၣ်အဂ့ၢ် လၢအဒုးနဲၣ်အတၢ်နာ်လၢကစၢ်ယွၤ ခီဖျိ တၢ်သး၀ံၣ်ထီၣ်ယွၤ ဖဲအ၀ဲသ့ၣ် လဲၤဆူတၢ်ဒုးအပူၤအခါန့ၣ်လီၤႉ ဒုၣ်ဒါတဖၣ်ဟဲ၀ဲ ဆူပှၤယူၤဒၤဖိတဖၣ်အအိၣ်လံႉ စီၤပၤစီၤယဟိ့ှှၤဖးပျံၤတၢ်‚ ဒီးကိးဖှိၣ်ပှၤကိးဂၤဒဲးလီၤႉ အ၀ဲဆှၢ အပှၤ၀့ၢ်ဖိတဖၣ်လၢ တၢ်ထုကဖၣ်ဆူၣ်ဆူၣ်န့ၣ်လီၤႉ အ၀ဲသ့ၣ်တအီၣ်တၢ်တအီတၢ်ဘၣ်‚ ထဲထုကဖၣ်၀ဲဒၣ် ဒ်အံၤ‚ ‘ပကမၤဒ်လဲၣ်ဒ်လဲၣ်န့ၣ်‚ ပတသ့ၣ်ညါဘၣ်ႉ မ့မ့ၢ် ပမဲာ်အိၣ်၀ဲဆူ နအိၣ်လီၤ’ (း၁၂) ႉ လၢခံတနံၤန့ၣ်‚ အ၀ဲသ့ၣ်ဟးထီၣ်၀ဲလီၤႉ အ၀ဲသ့ၣ်ဘၣ်တၢ်ဆှၢအီၤ တမ့ၢ်ဘၣ်လၢ ပှၤဒုးသုးလီၤပျံၤကတၢၢ်တဖၣ်ဘၣ်‚ မ့မ့ၢ်လၢပှၤသး၀ံၣ်တၢ်ဖိတဖၣ်နှၣ်လီၤႉ အ၀ဲသ့ၣ်နာ်ယွၤအတၢ်အၢၣ်လီၤလၢကအုၣ်ခီၣ်က့ၤ‚ ဒီးဒုးသုးအလီၢ်တအိၣ်နီတစဲဘၣ် (း၁၇) ႉ
ဖဲအ၀ဲသ့ၣ်သး၀ံၣ်တၢ်ဒီးလဲၤထီၣ်ဆူတၢ်ဒုးလီၢ်အခါန့ၣ်‚ ပှၤဒုၣ်ဒါဖိတဖၣ် ဒုးလိာ်သးကဒဲကဒဲန့ၣ်လီၤႉ တုၤယွၤအပှၤဂီၢ်မုၢ်တဖၣ် လဲၤတုၤဃီၤဆူတၢ်ဒုးပျီအခါ‚ တၢ်ဒုး၀ံၤတ့ၢ်လံန့ၣ်လီၤႉ ယွၤအုၣ်က့ၤခီၣ်က့ၤအပှၤဂီၢ်မုၢ်တဖၣ် ဖဲအ၀ဲသ့ၣ်လဲၤထီၣ်ဆူ တၢ်လၢအ၀ဲသ့ၣ်တသ့ၣ်ညါဘၣ်အပူၤ လၢတၢ်နာ်အပူၤအိၣ်ဒီးတၢ်စံးထီၣ်ပ့တၢၤယွၤ အခါန့ၣ်လီၤႉ
ယွၤဟ့ၣ်ဂ့ၢ်ဟ့ၣ်ဘါပှၤလၢ ပကစံးထီၣ်ပ့တၢၤအီၤလၢ တၢ်ဂ့ၢ်ဂ့ၤ့ကၢးတဖၣ် အဂီၢ်လီၤႉ မ့ၢ်ပလဲၤထီၣ်ဆူ တၢ်ဒုးတၢ်ပျီဂ့ၤ‚ တမ့ၢ်ပလဲၤထီၣ်ဂ့ၤ‚ တၢ်စံးထီၣ်ပ့တၢၤ ယွၤန့ၣ် အိၣ်ဒီးတၢ်စိတၢ်ကမီၤ လၢကလဲလိာ်ကွံာ် ပတၢ်ဆိကမိၣ်‚ ပသူၣ်ပသး‚ ဒီးပတၢ်အိၣ်မူန့ၣ်လီၤႉ