ခ့ၣ်ဆူးကံၢ် (ကင်ဆုဂီ) တၢ်စုသ့မၤတၢ်တမံၤ လၢအအိၣ်လံ အနံၣ်တကယၤလၢအမ့ၢ် ပှၤယပၣ်ဖိ အတၢ်မၤဒွဲလၤကူၣ်သ့လၢအဘှီဂ့ၤက့ၤ သပၢၤအသ့ၣ်ဖးတဖၣ်န့ၣ်လီၤႉ ထူအကမူၣ်တဖၣ် တၢ်ဃါဃုာ်အီၤဒီး ရၠာစး့ဇ့ၢ် (သစ်–စး) လၢအမၤစဲဘူးတၢ်န့ၣ် ပှၤသူအီၤ ဒ်သိးတၢ်ကမၤဘှီဂ့ၤထီၣ်က့ၤ တၢ်ကၢ်ကူးလာ်တဖၣ် ဒ်သိး ကစဲဘူးဂ့ၤထီၣ် အသးအဂီၢ်န့ၣ်လီၤႉ လၢတၢ်ပာ်ခူသူၣ် တၢ်ဟးဂီၤတဖၣ် လၢဘၣ်တၢ်ဘှီဂ့ၤအီၤအလီၢ်န့ၣ်‚ ဒွဲလၤကူၣ်သ့မၤဂ့ၤထီၣ် က့ၤ၀ဲ တၢ်ဟးဂီၤတဖၣ် ဆူတၢ်ဃံတၢ်လၤန့ၣ်လီၤႉ
လံာ်စီဆှံတဲဘၣ်ပှၤ လၢယွၤပာ်လုၢ်ပာ်ပရၤ ပတၢ်ကၢ်ဘျဲးတဖၣ် ဖဲလၢပသးဘၣ်ဒိက့ၤ လၢပမၤဘၣ် တၢ်ဒဲးဘးတဖၣ်အဃိအခါန့ၣ်လီၤႉ ဖဲလၢစီၤဒၤ၀ံး မၤကမၣ် နီၢ်ဘၤသဒီးဘၤ၀ံၤဒီး ကူၣ်ထီၣ်၀ဲ လၢကမၤသံ အ၀ၤ၀ံၤ အလီၢ်ခံန့ၣ် ၀ံနၤသၣ် ကတိၤထီဒါ ဟ့ၣ်ပလီၢ်အီၤ လၢအ၀ဲမၤတၢ်ဒဲးဘးအဃိ ဒီးလၢခံပီၢ်ယၢ်လီၤက့ၤ အသးလီၤႉ စီၤဒၤ၀ံး အတၢ်ဘါထုကဖၣ် ဟ့ၣ်ပှၤတၢ် လၢသူၣ်လၢသးနီၢ်နီၢ် လၢကဒုးသ့ၣ်ညါပှၤ ယွၤအတၢ်ဘၣ်အသးဒ်လဲၣ်‚ ယွၤအသးအိၣ်ပှၤဒ်လဲၣ် ဖဲလၢပမၤဘၣ် တၢ်ဒဲးဘးအခါန့ၣ်လီၤ (စံး ၅၁း၁၆-၁၇) ႉ
ဖဲလၢပသးဒီဖျၢၣ်သ့ၣ်ဖး၀ဲဒၣ် လၢပတၢ်ဒဲးဘးအဃိန့ၣ် ယွၤမၤဂ့ၤထီၣ်က့ၤ ပှၤလၢအ၀ဲအတၢ်ပျၢ်ပတၢ်ဒဲးဘးခီဖျိ အတၢ်ဟ့ၣ်လီၤပှၤ တၢ်အုၣ်က့ၤခီၣ်က့ၤ ကစၢ် လၢအတူၢ်သံအသး လၢထူၣ်စုညါအလိၤလီၤႉ အ၀ဲပရၤက့ၤပှၤ ခီဖျိ အ၀ဲအတၢ်အဲၣ် အဃိ ဒီးဖဲလၢပဆီၣ်လီၤပသး လၢအမဲာ်ညါန့ၣ်‚ ဒီးပအိၣ်ဘူးထီၣ်ဆူ အ၀ဲအကပၤန့ၣ် ကဲထီၣ် တၢ်ဘှီဂ့ၤက့ၤ ပှၤခဲလၢာ်န့ၣ်လီၤႉ
ယွၤအတၢ်အဲၣ်တၢ်သးအိၣ်ပှၤအံၤ ဂ့ၤဆံးဒိၣ်လဲၣ်ႉ ယွၤအတၢ်ဟ့ၣ်ပှၤ အတၢ်သးအိၣ် ဒီးအတၢ်ဆီၣ်လီၤသး ဒီးအတၢ်သးအိၣ်ဃံလၤအံၤန့ၣ် မ်အကဲထီၣ် ပတၢ်လၢသူၣ်လၢသး အတၢ်ထုကဖၣ်တက့ၢ်ႉ ‘‘ကစၢ်ဧၢ‚ ဃုကွၢ်ယၤ‚ ဒီးသ့ၣ်ညါ ယသးတက့ၢ်ႉ မၤကွၢ်ယၤ‚ ဒီးသ့ၣ်ညါယတၢ်ဆိကမိၣ်တက့ၢ်ႉ ဒီးကျဲအအၢလၢယပူၤ မ့ၢ်အအိၣ်‚ တအိၣ်လဲၣ်န့ၣ်ကွၢ်‚ ဒီးဆှၢယၤလၢကျဲအထူအယိာ်အပူၤတက့ၢ်ႉ’’ (စံး ၁၃၉း ၂၃-၂၄) ႉ