တဂီၤလၢ ၀့ၢ်ပး‚ ကီၢ်အီးစ့တ့လယၤန့ၣ် ဖံယၢၣ် မီဟီလၣ် သ့ၣ်ညါ၀ဲဒၣ်လၢ အသိလ့ၣ် ဟါမၢ်၀ဲဒၣ်န့ၣ်လီၤႉ မ့ၢ်လၢ အ၀ဲဒၣ် ပာ်ကတီၢ်ဘၣ်အသိလ့ၣ်လၢ
‘တၢ်ဒီၣ်ဃာ်အလီၢ်’ ဒီးတၢ်မူၤကွံာ်၀ဲ အသိလ့ၣ်န့ၣ်လီၤႉ တုၤအ၀ဲသ့ၣ်ညါဘၣ်၀ဲ တၢ်ဂ့ၢ်န့ၣ် အသးတမုာ်၀ဲဘၣ်ႉ ဘၣ်ဆၣ် အ၀ဲဒၣ်စံၣ်ညီၣ်တဲာ်၀ဲ ဒ်သိးအသး အသုတဖျိးဘၣ်လၢ တၢ်ဂ့ၢ်၀ဲန့ၣ်အဃိလီၤႉ လၢတၢ် သးဒိၣ်သးဖျိးအလီၢ်န့ၣ်‚ အ၀ဲဒၣ်ကွဲးလီၤ ထါဖိတယုၢ် ဘၣ်ဃးဒီး အသိလ့ၣ်ဟါမၢ်ကွံာ် အဂ့ၢ်၀ံၤ‚ လဲၤဒုးနဲၣ်၀ဲ ပှၤလၢအန့ၢ်ဘၣ်မူဒါ အပူၤကွံာ်အသိလ့ၣ်တဖၣ်န့ၣ်လီၤႉ ပှၤန့ၢ်ဘၣ်မူဒါတခီ တုၤအထံၣ်ဘၣ်ထါအံၤ ဘၣ်သူၣ် ဘၣ်သးအဃိ‚ လၢအ၀ဲသ့ၣ်အဘၢၣ်စၢၤ‚ တၢ်ဂ့ၢ်ကီ တကဲထီၣ်၀ဲ နီတဘျီလၢၤဘၣ်ႉ
လံာ်တၢ်ကတိၤဒိ သိၣ်လိပှၤဒီးစံး၀ဲ ‘‘ပှၤအိၣ်လီၤဖးအသးဒီး တၢ်အ့ၣ်လိာ်ဆိးက့န့ၣ်‚ မ့ၢ်တၢ်လၤကပီၤလီၤ’’ (ကတိၤဒိ ၂၀း၃) ႉ တၢ်အ့ၣ်လိာ်ဆိးက့ မ့ၢ်၀ဲဒၣ် ပှၤခံဂၤအတၢ်ဘၣ်ဂံာ်ဂူာ်လိာ်အသးဒီး ပိၢ်ဖးထီၣ်လၢ ဟီၣ်ခိၣ်လာ်မ့ၢ်ဂ့ၤ‚ လၢမူကပိာ်လိၤ မ့ၢ်ဂ့ၤလီၤႉ
ကစၢ်ယွၤ ဟ့ၣ်ပှၤတၢ်ဂံၢ်တၢ်ဘါလၢ‚ ပကအိၣ်ဒီး ပှၤဂုၤပှၤဂၤလၢ တၢ်မုာ် တၢ်ခုၣ်အပူၤလီၤႉ ကစၢ်ယွၤအတၢ်ကတိၤ မၤလီၤတံၢ်‚ မၤသးမံပှၤ ဒီးစံး၀ဲ ‘‘သးဒိၣ် ထီၣ်ဒီး‚ မၤကမၣ်တၢ်တဂ့ၤ လၢသုတၢ်သးဒိၣ်ထီၣ်န့ၣ် သုတဒုးလီၤနုာ်မုၢ်တဂ့ၤ’’ (အ့းဖ့းစူး ၄း၂၆) ႉ အ၀ဲဒၣ်အသးစီဆှံ ဟ့ၣ်ဂံၢ်ဟ့ၣ်ဘါပှၤ ဒ်သိးပကမၤလီၤမၢ်ကွံာ် မ့ၢ်အူအဖီလၢ အမၤဟူးဂဲၤထီၣ်ပသး‚ ဒ်သိးပကမၤကမၣ်ဘၣ်တၢ်အဂီၢ်လီၤႉ ဒီး ကစၢ်ယွၤဟ့ၣ် တၢ်အဒိအတဲာ်လၢပကပိာ်ထီၣ်အီၤ‚ ဖဲပဆိကမိၣ်လၢ ပဘၣ်တၢ်မၤတံာ်တာ်ပှၤ‚ ဒီးစံး၀ဲ ‘‘ဘၣ်တၢ်ဒုၣ်ဒွဲၣ်ဒီး တဒုၣ်ဒွဲၣ်ဆၢဘၣ်တၢ်ဘၣ်ႉ ဒိးတၢ်ဒီး တကတိၤပျံၤဘၣ်တၢ်ဘၣ်‚ မ့ၢ်အအးလီၤအသးလၢ ပှၤစံၣ်ညီၣ်တၢ်တီ တဂၤ အစုပူၤလီၤ’’ (၁ ပ့း ၂း၂၃) ႉ
အ၀ဲမ့ၢ် ကစၢ်တဂၤလၢအသးအိၣ်တၢ်‚ ဒီးသးကညီၤတၢ်ဒီး သးထီၣ်ကီဒီး အိၣ်ဒီးအဘျုးအဖှိၣ်‚ တၢ်မ့ၢ်တၢ်တီလၢအဒိၣ်အအါလီၤ (စံး ၈၆း၁၅) ႉ