ယတံၤသကိးတဂၤ လၢအလဲၤခီဖျိဘၣ် တၢ်ကီတၢ်ခဲအါမး‚ ဖဲဆၢကတီၢ်တယံာ် ဘၣ်အတီၢ်န့ၣ် ကွဲးတၢ်ဆူယအိၣ် ဒီးစံး၀ဲ‚ ‘‘တုၤယကွၢ်ကဒါက့ၤ‚ ယတၢ်မၤလိ လၢအပူၤကွံာ်‚ တၢ်မၤလိလွံၢ်ကတီၢ်အပူၤကွံာ်န့ၣ် ယထံၣ်ဘၣ် လၢတၢ်လဲလိာ် အိၣ်၀ဲအါမး‚ လီၤပျံၤ၀ဲဒိၣ်မး‚ လီၤပျံၤ၀ဲအနီၣ်ကီၢ် ဒီးတၢ်မနုၤတမံၤမး တအိၣ်စံၣ်အိၣ်ကျၢၤဘၣ်’’လီၤႉ
မ့ၢ်လီၤ‚ တၢ်ကဲထီၣ်ကအိၣ်၀ဲအါမး လၢခံနံၣ် အတီၢ်ပူၤလီၤႉ တၢ်ဖံးတၢ်မၤ လၢအပိာ်ထီၣ်အသး တမံၤဘၣ်တမံၤ ကကဲထီၣ်၀ဲ‚ ကထံၣ်ဘၣ် တံၤသကိး အသီ‚ ကဒိးန့ၢ်ဘၣ် တၢ်ဆူးတၢ်ဆါ‚ ဒီးကကွၢ်ဆၢၣ်မဲာ် ဘၣ် တၢ်သံတၢ်ပှၢ်လီၤႉ တၢ်ဂ့ၤ (မ့တမ့ၢ်) တၢ်အၢတၢ်သီ ကခိးခူသူၣ်လၢနကပၤ ဒ်သိးကစံၣ်ဖှီနၤလီၤႉ တၢ်အိၣ်မုာ်အိၣ်ခုၣ်န့ၣ် မ့ၢ်မနုၤလဲၣ်ႉ အဃိ ပကဘၣ်သ့ၣ်ညါ လၢပၢ်အိၣ်လၢမူခိၣ် လၢအအဲၣ်ပှၤတဂၤ တလဲလိာ်အသးလၢပဂီၢ် နီတဘျီဘၣ်န့ၣ်လီၤႉ
ပှၤကွဲးလံာ်စံးထီၣ်ပ့တၢၤစံး၀ဲ ‘‘မ့မ့ၢ်နဲဒၣ်အံၤ နမ့ၢ်တၢ်ဒ်တၢ်လီၢ်လီၢ်‚ ဒီးနနံၣ်နလါ အကတၢၢ်တအိၣ်ဘၣ်လီၤ’’ (စံး ၁၀၂း၂၇) ႉ တၢ်မ့ၢ်တၢ်တီ လၢတၢ်ပာ်လီၤအံၤ ဒိၣ်နီၢ်မးလီၤႉ မ့ၢ်တၢ်စံး၀ဲဒၣ် လၢကစၢ်ယွၤ မ့ၢ်တၢ်အဲၣ်တၢ်ကွံ‚ ထီဘိ့ကၢး၀ဲဘၣ်၀ဲ လၢတၢ်တမံၤမံၤအဖီခိၣ်‚ ဒီးသ့ၣ်ညါနၢ်ပၢၢ် တၢ်ခဲလၢာ်လီၤႉ ဒ်သရၠာစးၣ်ဖးဒိၣ် လၢအသိၣ်လိလံာ်စီဆှံ ပာ်ဖျါထီၣ်၀ဲ လၢ ‘‘ကစၢ်ယွၤ အသူးအသ့ၣ်အကံၢ်အစီအိၣ်တ့ၢ်၀ဲ လၢတချုးဟီၣ်ခိၣ်ကဲထီၣ်‚ ဒီးတၢ်သ့ၣ်တဖၣ်န့ၣ် လၢမုၢ်မဆါတနံၤအံၤ အိၣ်၀ဲဒၣ် လီၤတံၢ်လီၤဆဲး‚ ဒီးကအိၣ်ကဒီး၀ဲလီၤထူလီၤယိာ်လီၤ’’ႉ
လၢလံာ်စီဆှံအသီတက့တူၢ်အပူၤ စီၤယၤကိာ်ကွဲး၀ဲ ‘‘ကယဲၢ် တၢ်ဟ့ၣ်အဂ့ၤအ၀ါ ဒီးကယဲၢ်တၢ်ဟ့ၣ်အလၢအပှဲၤ တမံၤလၢ်လၢ်န့ၣ် ဟဲလီၤ လၢတၢ်ကပီၤအပၢ်လၢထးန့ၣ်လီၤႉ တၢ်ကဒံကဒါမ့ၢ်ဂ့ၤ‚ တၢ်ဃၣ်က့ၤအကဒုမ့ၢ်ဂ့ၤ တအိၣ်ဘၣ်ဒီးအီၤဘၣ်’’ (ယၤကိာ် ၁း၁၇) ႉ လၢပတၢ်လဲလိာ်ပသးအပူၤန့ၣ်‚ ပကဘၣ်မၤလီၤတံၢ် မံသး လၢပကစၢ်လၢအဂ့ၤတဂၤ အိၣ်ဂၢၢ်ဆိးကျၢၤ၀ဲ ဒီးအသူးအသ့ၣ်အကံၢ်အစီ ထီဘိလီၤႉ အ၀ဲဒၣ် မ့ၢ်၀ဲတၢ်ဂ့ၢ်ခဲလၢာ်အဂံၢ်ထံး‚ ဒီးတၢ်လၢအမၤ၀ဲန့ၣ် ဂ့ၤ၀ဲခဲလၢာ်လီၤႉ တၢ်မနုၤတမံၤမးတအိၣ်စံၣ်အိၣ်ကျၢၤ၀ဲ လီၤထူလီၤယိာ်ဘၣ်ႉ ဘၣ်ဆၣ် ယွၤအတၢ်ဂ့ၤ ကအိၣ်ဂၢၢ်ဆိးကျၢၤ လၢအပှၤတဖၣ်အဖီခိၣ်လီၤႉ