ယဖိမုၣ်ဆှၢလီၤ လံာ်တကျိၤခီဖျိကွဲၤဒီနၢ်ဆူ အတံၤသကိးတဂၤ‚ ဒီးဃ့အီၤ တၢ်စံးဆၢလီၤႉ လၢကွဲၤဒီနၢ်အတၢ်မၤအပူၤ ဖျါထီၣ်လၢအတံၤသကိးန့ၣ် ဖးအတၢ်ကစီၣ်န့့ၣ်လီၤႉ အ၀ဲခိးကွၢ်လၢ်အတံၤသကိးန့ၣ် အတၢ်စံးဆၢအိၣ်ယံာ် တတီၤဖိ ဘၣ်ဆၣ် တဒိးန့ၢ်ဘၣ်တၢ်စံးဆၢန့ၣ်ဘၣ်အဃိ အသးဘၣ်တံာ်တာ် ကအုကစွါထီၣ်လီၤႉ အတၢ်သးအ့န့လဲလိာ်ထီၣ်အသး ဆူတၢ်ဘၣ်ယိၣ်ဘၣ်ဘီလီၤႉ ဘၣ်ဆၣ် လၢခံကတၢၢ်န့ၣ် မ့ၢ်လၢအတံၤသကိး စံးဆၢက့ၤအတၢ်သံကွၢ်အဃိ အတၢ်ဘၣ်ယိၣ်ဘၣ်ဘီန့ၣ် ဒံကွံာ်၀ဲ ဒီးအသူၣ်အသး ဘၣ်လီၢ်ဘၣ်စးက့ၤ၀ဲလီၤႉ အတံၤသကိးတစံးဆၢက့ၤ အတၢ်သံကွၢ်တဘျီဃီန့ၣ်‚ မ့ၢ်လၢအ၀ဲကွၢ်ချု တၢ်စံးဆၢလၢ‚ ကစံးဆၢက့ၤအီၤအစၢအဃိလီၤႉ
လၢလံာ်စီဆှံအလီၢ်လံၤတက့တူၢ်အပူၤ‚ ၀ံဒၤနံးယ့လး အိၣ်ခိးကွၢ်လၢ်ကစၢ်ယွၤ အတၢ်စံးဆၢလၢ တၢ်ဘၣ်ယိၣ်ဘၣ်ဘီအပူၤလီၤႉ တုၤအ၀ဲဒိးန့ၢ်ဘၣ် တၢ်ထံၣ်လၢညါခီ လၢအလီၤပျံၤဖုးဖးဒိၣ်၀ံၤန့ၣ်‚ အ၀ဲ ဒုၣ်တၢ်အီၣ်ဒီးထုကဖၣ် လၢယွၤလီၤ (ဒၤ ၁၀း၃) ႉ ဘၣ်ဆၣ် လၢသၢနွံအတီၢ်ပူၤန့ၣ် အ၀ဲတဒိးန့ၢ်ဘၣ် ကစၢ်ယွၤအတၢ်စံးဆၢဘၣ် (ဒၤ ၁၀း၂-၁၃) ႉ တုၤသၢနွံပှဲၤထီၣ်ဒီး ကလူးတဖၣ် ဟဲပာ်ဖျါထီၣ် လၢ၀ံဒၤနံးယ့လးအမဲာ်ညါ ဒီးတဲဘၣ်အီၤလၢ ကစၢ်ယွၤနၢ်ဟူ အတၢ်ထုကဖၣ်‚ စးထီၣ်လၢ စးထီၣ်ဃ့၀ဲအခီၣ်ထံးလံၤလံၤန့ၣ်လီၤႉ လၢသၢနွံအတီၢ်ပူၤန့ၣ် ကစၢ်ယွၤမၤတၢ် လၢအတၢ်ဃ့အဂီၢ်လီၤႉ ဘၣ်ဆၣ် ကစၢ်ယွၤ မၤတၢ်လၢအတၢ်ထုကဖၣ်အဂီၢ်န့ၣ် ၀ံဒၤနံးယ့လး တသ့ၣ်ညါ၀ဲဘၣ်ႉ
ပမ့ၢ်တဒိးန့ၢ်ဘၣ် ပတၢ်ထုကဖၣ် အတၢ်စံးဆၢသတးဒီး ဒုးအိၣ်ထီၣ် တၢ်ဘၣ်ယိၣ်ဘၣ်ဘီ လၢကစၢ်ယွၤတကနၣ်ပတၢ်ထုကဖၣ်န့ၣ် သ့၀ဲလီၤႉ ၀ံဒၤနံးယ့လး အတၢ်လဲၤခီဖျိဘၣ်သ့ၣ်တဖၣ် ဒုးသ့ၣ်နီၣ်ထီၣ်က့ၤပှၤ လၢကစၢ်ယွၤ မၤတၢ်ထီဘိ လၢပှၤလၢအအဲၣ်အီၤသ့ၣ်တဖၣ်အဂီၢ်လီၤႉ တၢ်လၢပဃ့တဖၣ်န့ၣ် မ့ၢ်တစံးဆၢ၀ဲတဘျီဃီ ဘၣ်ဆၣ်မၤ၀ဲတၢ်လၢပဂီၢ်ထီဘိလီၤႉ