ယမဲာ်ချံတုၤဃီၤဆူ တၢ်ကွဲးခိၣ်တီ ‘‘တၢ်အိၣ်ဘှံးအမုၢ်နံၤတဖၣ် မ့ၢ်တၢ်အကါဒိၣ်လၢ ပှၤဃ့ၢ်တၢ်ဖိတဖၣ်အဂီၢ်လီၤ’’ႉ ဖဲ ထီမံၣ်မဲန်န့ၤ‚ ပှၤထီၣ်ကစၢၢ်အက့ှူၢ်ဖိအဆိလၢ ကီၢ်အမဲရၠာစးကၤ‚ အတၢ်ကွဲးပူၤန့ၣ် ပာ်ဒိၣ်တၢ်ဂ့ၢ် လၢအစံးဘျုးဒီး ယူးယီၣ် ပှၤဃ့ၢ်တၢ်ဖိတဖၣ် လၢတဘျီတခီၣ်ဟးဆှဲး အမိၢ်ပှၢ် တၢ်အိၣ်ဘှံးဒီး ဒ်သိးကမၤန့ၢ်က့ၤ တၢ်ဂံၢ်တၢ်ဘါအဂီၢ် ဖဲအမၤလိမၤလ့ၤသး၀ံၤ အလီၢ်ခံန့ၣ်လီၤႉ ကွဲး၀ဲလၢ ‘‘တၢ်ဘၣ်လိာ်ဘၣ်စးက့ၤ‚ လၢအမ့ၢ် တၢ်မၤလိမၤလ့ၤ အစၢအံၤ ဟဲအိၣ်ထီၣ်၀ဲသ့ ဖဲဒၣ်တၢ်အိၣ်ဘှံးအိၣ်သါ အဆၢကတီၢ်န့ၣ်လီၤ’’ ‘‘တၢ်အံၤ အခီပညီမ့ၢ်၀ဲ တၢ်အိၣ်ဘှံး အိၣ်သါန့ၣ် အကါဒိၣ်ဒ်တၢ်ဟူးဂဲၤဖံးမၤအသိးလီၤ’’ႉ
လၢပတၢ်စူၢ်တၢ်နာ်အတၢ်လဲၤ ဒီးတၢ်ဖံးတၢ်မၤ အပူၤစ့ၢ်ကီး မ့ၢ်ဒ်န့ၣ်အသိးလီၤႉ တၢ်အိၣ်ဘှံးအိၣ်သါ မူာ်မူာ် နီၢ်နီၢ် အဆၢကတီၢ် မ့ၢ်တၢ်အကါဒိၣ်လၢ ပကဟးပဒ့ၣ်ကွံာ် လၢတၢ်လီၤမၢ်လၢာ်ကွံာ်‚ ဒီးတၢ်ပျံၤတၢ်ဖုးတဖၣ်န့ၣ်လီၤႉ ယ့ၣ်။းဃုန့ၢ် တၢ်ဘၣ်လိာ် ဘၣ်စး ဘၣ်ဃးဒီးနီၢ်သး ဖဲအိၣ်မူလၢဟီၣ်ခိၣ်အဆၢကတီၢ်အံၤ‚ ဖဲတၢ်မၤလီၤဘှံး အကီအခဲလီၤဘှံးလီၤတီၤအကတီၢ်န့ၣ်လီၤႉ ဖဲအပျဲၢ်အဘီၣ်တဖၣ် ဟဲက့ၤလၢ တၢ်သိၣ်လိဒီး တၢ်ကူစါယါဘျါလၢာ်ဂံၢ်လၢာ်ဘါအဆၢကတီၢ်တဖၣ်န့ၣ် အ၀ဲစံးဘၣ်၀ဲ လၢ ‘‘ဟဲ သုကစၢ်ဒၣ်သု၀ဲ ဆူတၢ်တဒၢ လၢပှၢ်မုၢ်ကနၢအလီၢ်‚ ဒီးအိၣ်ဘှံးတစိၢ်တလီၢ် တက့ၢ်’’ (မၢ်ကူး ၆း၃၁) န့ၣ်လီၤႉ ဘၣ်ဆၣ် ပှၤဂီၢ်မုၢ်ဖးဒိၣ် လူၤပိာ်ထွဲအ၀ဲသ့ၣ်အခံအဃိ‚ ယ့ၣ်။းသိၣ်လိအ၀ဲသ့ၣ် ဒီးလုၢ်အီၣ်အ၀ဲသ့ၣ် လၢကိၣ်ထဲဒၣ် ယဲၢ်ဖျၢၣ်ဒီး ညၣ်ခံဘ့ၣ်ဖိ န့ၣ်လီၤ (း၃၂-၄၄) ႉ ဖဲပှၤကိးဂၤတအိၣ်လၢၤန့ၣ်‚ ယ့ၣ်။း ‘‘လဲၤထီၣ်ဆူ ကစၢၢ်တဖျၢၣ် အလိၤ ဒီးထုကဖၣ်တၢ်လီၤ’’ (း၄၆) ႉ
ပတၢ်အိၣ်မူတဖၣ် ပှၤမ့ၢ်နၢ်ပၢၢ်အီၤ ဒ်တၢ်ဖံးတၢ်မၤအသိးန့ၣ် ဖဲန့ၣ် တၢ်လၢ ပမၤ တဖၣ် ကဲဘျုးစှၤလီၤစှၤလီၤ၀ဲဒၣ်န့ၣ်လီၤႉ ယ့ၣ်။းကွဲမုာ်ပှၤ လၢပကမၤဃုာ်တၢ်ဒီးအီၤ မူာ်မူာ်နီၢ်နီၢ် လၢတၢ်ဘရၣ်တၢ်ဘှီၣ်အလီၢ် ဒ်သိးပကထုကဖၣ်ဒီး ဒိးန့ၢ်တၢ်အိၣ်ဘှံး န့ၣ်လီၤႉ