ကစၢ်ခရၠာစးံာ်အတၢ်သိၣ်တၢ်သီ ဘၣ်ထွဲဒီး ဒိထီၣ်ထီလၢပှဲၤ‚ ဒီးယွၤအဘျုးအဖှိၣ် လၢပှဲၤ ဖျါထီဒါလိာ်အသးကဒဲကဒဲလီၤႉ
ယွၤအဒိထီၣ်ထီလၢပှဲၤနှၣ် ကစၢ်ခရၠာစးံာ်တပာ်ဖုၣ်လီၤအီၤနီတဘျီဘၣ်ႉ စံးဘၣ်၀ဲ အပျဲၢ်အဘီၣ်တဖၣ်‚ ‘‘မ်သုလၢထီၣ်ပှဲၤထီၣ် ဒ်သုပၢ်အိၣ်လၢ မူခိၣ် လၢထီၣ်ပှဲၤထီၣ် အသိးနှၣ်တက့ၢ်’’ (မးသဲ ၅း၄၈) ႉ ဖဲပှၤသ့ လံာ်တၢ်သိၣ် တၢ်သီတဂၤ သံကွၢ်အီၤ တၢ်မၤလိာ်ဖးဒိၣ် လၢတၢ်သိၣ် တၢ်သီအကျါ မ့ၢ်ဖဲလဲၣ်တထံၣ်လဲၣ်အခါ ခရၠာစးံာ်စံးဆၢအီၤ‚ ‘‘အဲၣ်ယွၤနကစၢ် လၢနသူၣ်ကံၢ်သးလဲ‚ ဒီးလၢနသးဒီဖျၢၣ် ညါ‚ ဒီးနတၢ်ကူၣ်တၢ်ဖး တုၤအလၢာ်တက့ၢ်’’ (၂၂း၃၇) ႉ တၢ်သိၣ်တၢ်သီအံၤ ပှၤလၢအမၤထီၣ်ဘး လၢလၢပှဲၤပှဲၤနှၢ် တအိၣ်နီတဂၤဘၣ်ႉ
ဘၣ်ဆၣ်‚ ပှၤလၢအဟ့ၣ်ပှၤ ယွၤအဘျုးအဖှိၣ် လၢပှဲၤနှၣ် မ့ၢ်စ့ၢ်ကီးခရၠာစးံာ်တဂၤ အံၤနှၣ်လီၤႉ အ၀ဲပျၢ်ကွံာ်တၢ်ကမၣ် လၢအအိၣ်ဒီး ပှၤအဲၣ်ဘၢမါအၣ်ဘၢ၀ၤတဂၤ‚ တၢ်ဘျၣ်လၢထူၣ်စုညါ‚ အပျဲၢ်အဘီၣ်လၢအသမၢအီၤ‚ ဒီးစီၤပီလူး လၢအမၤသံပှၤခရၠာစးံာ်ဖိတဖၣ် နှၣ်လီၤႉ ယွၤအဘျုးအဖှိၣ်နှၣ် လၢပှဲၤ၀ဲ‚ ဒီးတကးဒံးဘၣ် လုၣ်ဘၢယွၤလီၤကွံာ်၀ဲဆူ ပှၤလၢအပျၤထီအီၤ လၢသ့ၣ်ဖျၢၣ်ထူၣ်စုညါအလိၤတဖၣ် အအိၣ်ဒၣ်လဲာ်လီၤႉ ‘‘ပၢ်ဧၢ‚ ပျၢ်အတၢ်ဒဲးဘးတက့ၢ်ႉ အဂ့ၢ်ဒ်အံၤ‚ မ့ၢ်အမၤ၀ဲဒ်လဲၣ်ဒ်လဲၣ်နှၣ် တသ့ၣ်ညါဘၣ်’’ (လူၤ ၂၃း၃၄) ႉ တၢ်အံၤမ့ၢ်၀ဲ တၢ်ကတိၤ လၢခံကတၢၢ်လၢခရၠာစးံာ်စံး၀ဲအကျါ တခါနှၣ်လီၤႉ
အါနံၣ်အါလါအပူၤ‚ ဖဲယဆိကမိၣ်ထီၣ် ခရၠာစးံာ်အဒိထီၣ်ထီအလၢပှဲၤနှၣ် တၢ်ဆိကမိၣ်လီၤသးလၢ ယတ့ကၢး၀ဲဘၣ်၀ဲဘၣ် အိၣ်ထီၣ်၀ဲလၢယသးတလီၢ်လီၢ် နှၣ်လီၤႉ သတးဒီး‚ ယတကလၢၢ်ဘၣ် တၢ်ဂ့ၢ်ဘၣ်ထွဲဒီး ယွၤအတၢ်အဲၣ်တၢ်သးကညီၤ ဘၣ်ႉ ဖဲယနၢ်ပၢၢ်တၢ်ကစီၣ်ခံခါအံၤအခါနှၣ် ယထံၣ်က့ၤ ယွၤအတၢ်အဲၣ်တၢ်သး ကညီၤ လၢခရၠာစးံာ်အသးသမူဒီတစိၤအပူၤ‚ ဒီးအတၢ်စံၣ်တဲၤတဲလီၤအပူၤနှၣ်လီၤႉ
ယွၤအတၢ်အဲၣ်တၢ်သးကညီၤနှၣ် မ့ၢ်၀ဲလၢပှၤလၢ အတၢ်မုၢ်လၢ် လၢာ်ကွံာ် တဖၣ်အဂီၢ်‚ ပှၤအဖှီၣ်အယာ်အတဖၣ်အဂီၢ်‚ ပှၤသူၣ်ကၢ်သးလီၤတဖၣ်အဂီၢ်‚ ဒီးလၢ ပှၤလၢမၤ၀ဲ လၢအကစၢ်ဒၣ်၀ဲတနှၢ်တဖၣ်အဂီၢ်လီၤႉ ယွၤအတၢ်အဲၣ်တၢ်သးကညီၤနှၣ် မ့ၢ်၀ဲလၢပှၤကိးဂၤဒဲးအဂီၢ်လီၤႉ