ပှၤမဲးကစံာ်ကၣ် ဖိတဖၣ် မ့ၢ်မၤမူး (ပါတီ) နှၣ် ဖ့ၣ်ညါထၣ်မ့ၢ်တပာ် တ၀ံၤဘၣ်ႉ ဖ့ၣ်ညါထၣ်မ့ၢ်၀ဲ တၢ်ဘိၣ်တခါလၢပှၤထၢနုာ်ဃး အံသၣ်ဆၢကိၢ်လိၣ်တဖၣ် မ့တမ့ၢ် တၢ်အီၣ်လီၤလီၤဆီဆီတဖၣ် လၢအပူၤနှၣ်လီၤႉ ဖိသၣ်တဖၣ်တီၢ်သဘှံးကွံာ် တၢ်ဘိၣ်အံၤ လၢနီၢ်က့ ဒ်သိးကမၤနှၢ်တၢ်အိၣ်လၢအပူၤနှၣ်လီၤႉ
ဖဲလၢနံၣ်ကယၤ ၁၆ ဆၢကတီၢ်အခါ‚ ခရၠာစးံာ်ဖိ စီၤသီတဖၣ် စူးကါ၀ဲ ဖ့ၣ်ညါထၣ် လၢအကသိၣ်လိ ပှၤကလုာ်တဖၣ် လၢအအိၣ် လၢမဲးကစံာ်ကိၣ်အပူၤ နှၣ်လီၤႉ ဖ့ၣ်ညါထၣ်မ့ၢ်၀ဲ ဆၣ်လၢအအိၣ် ဒီးတၢ်အဖီးဖိ ၇ ဖီး‚ လၢအပာ်ဖျါထီၣ် တၢ်ဒဲးဘး ၇ ခါလီၤႉ တၢ်တီၢ်သဘှံးကွံာ် ဖ့ၣ်ညါထၣ် ပာ်ဖျါထီၣ်၀ဲတၢ်Bတီဆၢ တၢ်အၢတၢ်သီနှၣ်လီၤႉ ဒီးဖဲတၢ်အီၣ်အိၣ်လၢအပူၤတဖၣ် လီၤတဲာ်၀ဲလၢဟီၣ်ခိၣ်လိၤနှၣ် ပှၤက့ၤစိာ်အီၤဆူဟံၣ်‚ ပာ်အီၤဒ်ခိၣ်ဖးလၢတၢ်ဟံးဃာ်တၢ်နာ်အဂီၢ်နှၣ်လီၤႉ
ဘၣ်ဆၣ်‚ လၢပနီၢ်ကစၢ်ဒၣ်ပ၀ဲ ပမၤနၢၤတၢ်အၢတၢ်သီတနှၢ်ဘၣ်ႉ ယွၤတခိး၀ဲ ပတၢ်ထဲးဂံၢ်ထဲးဘါ ဒ်သိးကပာ်ဖျါထီၣ် အတၢ်သးကညီၤပှၤဘၣ်ႉ လံာ်အ့းဖ့းစူး သိၣ်လိပှၤ‚ ‘‘သုတုၤလၢတၢ်အုၣ်က့ၤခီၣ်က့ၤ သုလၢတၢ်ဘျုးတၢ်ဖှိၣ် လၢတၢ်နာ်အဃိလီၤႉႉႉမ့ၢ်ယွၤအတၢ်ဟ့ၣ်လီၤ’’ (၂း၈) ႉ ခရၠာစးံာ်မၤနၢၤတၢ်ဒဲးဘးလီၤ တမ့ၢ်ပှၤဘၣ်ႉ
ဖိသၣ်တဖၣ်မၤ၀ဲဒ်သိးကဒိးနှၢ် အံသၣ်ဆၢကိၢ်လိၣ်တဖၣ် လၢဖ့ၣ်ညါထၣ် အပူၤလီၤႉ ဘၣ်ဆၣ်‚ ပဒိးနှၢ်ဘၣ်ယွၤအတၢ်ဟ့ၣ်ကိးဂၤဒဲး ဖဲပတူၢ်လိာ်ခရၠာစးံာ် နှၣ်လီၤႉ ယွၤ ‘‘ဆိၣ်ဂ့ၤပှၤႉႉႉလၢကယဲၢ်သးအတၢ်ဆိၣ်ဂ့ၤတဖၣ်’’ လီၤ (၁း၃) ႉ ပဒိးနှၢ်ဘၣ် တၢ်ပျၢ်တၢ်ကမၣ်‚ တၢ်ပရၤက့ၤပှၤ‚ တၢ်လုၢ်ဖိပှၤ‚ တၢ်အိၣ်မူအသီ‚ တၢ်သူၣ်ခုသးမုာ်‚ တၢ်အဲၣ်‚ ဒီးတၢ်အါမံၤအါမၠိနှၣ်လီၤႉ လၢပဟံးဃာ် ပတၢ်နာ် အဃိ‚ ဒီးလၢပဂံၢ်ဆူၣ်ဘါဆူၣ်အဃိ‚ နီၢ်သးတၢ်ဆိၣ်ဂ့ၤ တဖၣ်အံၤ ပဒိးနှၢ်ဘၣ်အီၤ တမ့ၢ်ဘၣ်ႉ မ့ၢ်ဒၣ်လၢပတူၢ်လိာ်ခရၠာစးံာ် ဒီးစူၢ်က့ၤနာ်က့ၤအီၤ အဃိလီၤႉ နီၢ်သး တၢ်ဟ့ၣ်တဖၣ် ပဒိးနှၢ်ဘၣ်အီၤ ခီဖျိထဲဒၣ်လၢယွၤအဘျုးအဃိလီၤႉ