ယတံၤသကိးလၢ ယအဲၣ်အီၤတဂၤဆှၢလီၤ တၢ်ကစီၣ်ဆူယအိၣ် ဒီးစံး၀ဲ ‘‘ယသးခု ဒိၣ်မး‚ မ့ၢ်လၢပ၀ဲတဂၤဒီးတဂၤ ပကတိၤသကိးလိာ်ပသးဘၣ်ဃးဒီး တၢ်သူၣ်ဂ့ၤ သး၀ါ‚ တၢ်သူၣ်အၢသးသီဒီး တၢ်လာ်အၢအဂ့ၢ်န့ၣ်လီၤႉ’’ ပကဲ တံၤသကိး အါနံၣ် အါလါဒီး ပသိၣ်လိလိာ်ပသးလၢ ပကရၠာစးၤလီၤ တၢ်သူၣ်ဖှံသးညီဒီး ပတၢ်လီၤတူာ် လီၤကာ်သ့ၣ်တဖၣ်လီၤႉ
စီၤဒၤ၀ံးဒီး စီၤယိၤနၤသၣ် ကဲထီၣ် တံၤသကိး တံၢ်နီၣ်န့ၣ် စးထီၣ်လၢ စီၤဒၤ၀ံး မၤနၢၤ စီၤကၤလယါ အမုၢ်နံၤ၀ဲနှၣ်လီၤ (၁ ရၠာစးှမူၤ ၁၈း၁-၄) ႉ အ၀ဲသ့ၣ် တူၢ်ဘၣ်သကိး၀ဲ တၢ်ပျံၤတၢ်ဖုးဒ်သိးသိး ဖဲစီၤယိၤနၤသၣ်အပၢ် အသးကါ စီၤဒၤ၀ံးဒီး ကူၣ်ထီၣ်အီၤ အဆၢကတီၢ်လီၤ (၁ ရၠာစးှမူၤ ၁၈း၅-၁၁‚ ၂၀း၁-၂) ႉ လၢခံကတၢၢ် တုၤဒၣ်လဲာ်‚ ဖဲစီၤစီလူး ကူၣ်အၢလၢ အကမၤသံ စီၤဒၤ၀ံးအဆၢကတီၢ် လၢမုၢ်နံၤ လၢအအၢအသီ တဖၣ်ဒၣ်လဲာ်န့ၣ် အ၀ဲသ့ၣ် တူၢ်ဘၣ်ခီၣ်ဘၣ်၀ဲ‚ လဲၤခီဖျိဘၣ်၀ဲ ဒ်သိးသိးန့ၣ်လီၤႉ
တံၤသကိးအဂ့ၤတဖၣ် တပာ်တ့ၢ်ကွံာ်ပှၤ ဖဲတၢ်ကဲထီၣ်အဂုၤအဂၤတဖၣ် လဲလိာ်အသးလၢပဖီခိၣ်အဆၢကတီၢ်ဘၣ်ႉ အိၣ်၀ဲဒၣ်ဒီး ပှၤတပူၤဃီ ဖဲတၢ်ဂ့ၤ အကတီၢ်မ့ၢ်ဂ့ၤ‚ တၢ်အၢအကတီၢ်မ့ၢ်ဂ့ၤလီၤႉ တံၤသကိးလၢအဂ့ၤ ကဒုးနဲၣ်ပှၤလၢယွၤ လၢမုၢ်နံၤ လၢအလာ်အၢလာ်သီသ့ၣ်တဖၣ်အပူၤမ့ၢ်ဂ့ၤ‚ ဖဲပဒိးန့ၢ်ဘၣ် တၢ်လ့ပစီ ဒ်သိး ပကအိၣ်ယံၤထီၣ်ဒီး ယွၤအကတီၢ်လီၤႉ
တံၤသကိးတံၢ်နီၢ်မ့ၢ်၀ဲ ကစၢ်ယွၤအတၢ်ဟ့ၣ်လီၤႉ မ့ၢ်အဂ့ၢ်ဒ်လဲၣ်ႉ မ့ၢ်၀ဲ တၢ်အဒိအတဲာ်တမံၤလၢ အမၤဖျါ တံၤသကိးဆှံဆှံ‚ တံၤသကိး အတၢ်သူၣ်တီသးတီ ခီဖျိ‚ တၢ်သူၣ်ဂ့ၤသး၀ါ‚ တၢ်သူၣ်အၢသးအၢဒီး တၢ်လာ်အၢန့ၣ်လီၤႉ ကစၢ်ယွၤ ဒုးသ့ၣ်နီၣ်ထီၣ်ပှၤဒီး စံး၀ဲ ယတညိကွံာ်နၤဘၣ်‚ ယတလဲၤသဒၣ်ဘၣ်နၤဘၣ် (ဧ့ၤ့ဘံၤ ၁၃း၅) ႉ