လါယူၤလံတၢ်ဂ့ၢ်ခိၣ်တီ | တၢ်မၤလၤကပီၤ
ဒ်သိးတၢ်ကမၤဟါမၢ် တၢ်အစိနၢတမုာ်တလၤအဂီၢ်, တၢ်ဆီလီၤ ပီးလီတကယၤ လၢအလီၤဂာ်ဒီးကျိအက့ၢ်အဂီၤတဖၣ် လၢဝ့ၢ်ဖးဒိၣ်တဖျၢၣ် အတၢ်စူးကွံာ်တၢ်ကမှံၤတၢ်ဘၣ်အၢဘၣ်သီတဖၣ် လၢအစိနၢတမုာ် အလီၢ်အကျါတတီၤလၢအပူၤကွံာ်နံၣ်တဖၣ်န့ၣ်လီၤ. တၢ်စူးကွံာ် တၢ်ဘၣ်အၢဘၣ်သီအလီၢ်တဖၣ်အံၤ မၤအါထီၣ် တၢ်ဘၣ်ယိာ်ဘၣ်ဘီလၢ ကမျၢၢ်တဖၣ်အဂီၢ်န့ၣ်လီၤ. တၢ်ကမၤဟါမၢ် တၢ်ဘၣ်အၢဘၣ်သီလၢ အစိနၢတမုာ်တလၤတဖၣ်အံၤအဂီၢ်, မျိာ်ကျိတဖၣ် ဖှံထုးထီၣ်တၢ်နၢမူအထံ အကၤလၣ် (Gallon) တဖၣ်အါမး, ဒီးလၢ ၁ မံးနံး အတီၢ်ပူၤန့ၣ် တၢ်ဒ့ၣ်စၢၤလဲၤတုၤဝဲဒၣ် အါန့ၢ် ၁၆၀ ခီၣ်ယီၣ်န့ၣ်လီၤ. ဘၣ်ဆၣ်, တၢ်ဖှံလီၤ တၢ်နၢမူအထံတဖၣ် ထဲလဲၣ်ဂ့ၤ, ထဲလဲၣ်ဂ့ၤန့ၣ် တၢ်ဘှါဆှဲ တၢ်ဂ့ၢ်ကီတမံၤအံၤ လၢာ်လၢာ်ဆ့ဆ့ တသ့ဘၣ်န့ၣ်လီၤ.
တၢ်ကမၤဟါမၢ် တၢ်အစိနၢတမုာ်တလၤအဂီၢ်, တၢ်စူးကါမျိာ်ကျိတဖၣ်အသိး, စီၤပၤဒၤဝံး ဂုာ်ကျဲးစၢး ပာ်တဒၢဃာ် အတၢ်ဒဲးဘး အစိလၢနၢတမုာ်တလၤန့ၣ်လီၤ. ဖဲလၢအမၤဒဲးဘးတၢ်ဒီးနီၢ်ဘၤသရှ့ဘၤ ဝံၤန့ၣ်ဒီး, ကူၣ်မၤသံဝဲဒၣ်အဝၤ (၂ ရှမူၤ ၁၁:၁-၁၇) န့ၣ်လီၤ. ဒ်သိးကကျၢၢ်ဘၢ အတၢ်ဒဲးဘးအဂီၢ်, စီၤဒၤဝံး ကူၣ်မၤအၢမၤသီတၢ် လၢတၢ်ဘှ့ၣ်တၢ်ဘှီၣ်, လၢတၢ်ကဘျံးကဘျၣ်, ဒီးလၢတၢ်ယူးယီၣ်ပာ်ကဲယွၤလၢခိန့ၣ်လီၤ. ဘၣ်ဆၣ်, အတၢ်ဒဲးဘးအဘူးအလဲ, ဒီးယွၤအတၢ်စံၣ်ညီၣ်လၢ အမၤဆါတ့ၢ်အီၤတဖၣ်န့ၣ် တူၢ်ခီၣ်ဝဲတန့ၢ်အဃိ, အကတၢၢ်န့ၣ်, စီၤဒၤဝံး ကိးဃ့ကညး ကစၢ်ယွၤ အတၢ်သးကညီၤ, ဒီးတၢ်ကမၤကဆှီထီၣ်က့ၤ အသူၣ်အသးအဂီၢ်န့ၣ်လီၤ. စီၤဒၤဝံး ဃ့ထုကဖၣ်ဝဲဒၣ်, “ယွၤဧၢ, သူၣ်ကညီၤသးကညီၤယၤ ဒ်နဘျုးနဖှိၣ်အသိးန့ၣ်တက့ၢ်. ဒ်နသးအိၣ်တၢ်အါအါကလဲာ်အသိးန့ၣ်, မၤပူၤမၤဖျဲး ယတၢ်ကမၣ်တက့ၢ်” (စံး ၅၁:၁) န့ၣ်လီၤ.
စီၤဒၤဝံး ပာ်ဖျါထီၣ် အတၢ်ဒဲးဘးလၢ ယွၤအမဲာ်ညါ, တူၢ်လိာ်အၢၣ်လီၤဝဲ အတၢ်ဒဲးဘး, ဒီးပီၢ်ယၢ်လီၤက့ၤအသး (စံး ၃၂:၅) န့ၣ်လီၤ. ကစၢ်ယွၤ ပျဲပျၢ်ကွံာ် စီၤပၤလၢ အတဒိကနၣ်တၢ်တဂၤ, ဒီးဟ့ၣ်က့ၤအီၤ တၢ်သးခု (:၅,၇ , စံး ၅၁:၁၂-၁၅) န့ၣ်လီၤ. ဒ်တၢ်ဂံၢ်ဂုၤဆှဲးဆှိး “ဂာ်ခၣ်ဘိၣ်ထံ” (carbonated water) အပလီတဖျၢၣ် ပိၢ်ဖးထီၣ်ဝဲအသိး, စီၤဒၤဝံး စံးထီၣ်ပတြၢၤယွၤ, ဒ်သိးကသိၣ်လိဝဲ ပှၤဂၤတဖၣ်လၢ ကစၢ်ယွၤ ပျဲပျၢ် တၢ်ဒဲးဘးအဂ့ၢ်န့ၣ်လီၤ. စီၤပၤ အၢၣ်လီၤအတၢ်ဒဲးဘး, ဒီးအတၢ်ပီၢ်ယၢ်လီၤက့ၤသးန့ၣ် ပိာ်ထွဲထီၣ်အခံလၢ တၢ်မၤလၤကပီၤယွၤန့ၣ်လီၤ.
ပမၤတၢ်ဒဲးဘး, ဒီးပမ့ၢ်ဂုာ်ကျဲးစၢး ပာ်တဒၢအီၤန့ၣ်ဒီး, ကမ့ၢ်ဝဲတၢ်ကလီကလီန့ၣ်လီၤ.ပတဒိကနၣ်တၢ် လၢအစိနၢတမုာ်တလၤတဖၣ်န့ၣ်, ပမၤဟးမၢ်တသ့ဘၣ်. ဘၣ်ဆၣ် ,ဖဲပတဲလီၤကျဲၤလီၤ ပတၢ်ဒဲးဘး, ဒီးပမ့ၢ်ပီၢ်ယၢ်လီၤက့ၤပသးန့ၣ်ဒီး, ကစၢ်ယွၤ ကမၤစီကွံာ် ပတၢ်ဒဲးဘးတဖၣ်, ဒီးကပာ်လီၤတဲာ်တ့ၢ် အတၢ်ဘျုးတၢ်ဖှိၣ်, ဒီးတၢ်ပျဲပျၢ်ကွံာ် ပတၢ်ဒဲးဘးလၢ အစိနၢမူနၢဆှီတဖၣ်န့ၣ်လီၤ. ယွၤကဒုးအိၣ်ထီၣ်က့ၤ ပအုၣ်က့ၤခီၣ်က့ၤ လၢအပှဲၤဒီးတၢ်သူၣ်ဖှံသးညီ, ဒီးကဟ့ၣ်က့ၤပှၤ ခွဲးယာ်အသီတဘျီ, ဒ်သိးပကမၤလၤကပီၤအီၤ လၢအမဲာ်ညါအဂီၢ်န့ၣ်လီၤ.
Marvin Williams, နကိၣ်လၢတနံၣ်ဘၣ်တနံၤ ပှၤကွဲးလံာ်
<< ဖးက့ၤအပူၤကွံာ်လါ အတၢ်ကွဲး
