လါယူၤတၢ်ဂ့ၢ်ခိၣ်တီ | သးလၢအဲၣ်ဟ့ၣ်ညီတၢ်

အပူၤကွံာ်တနံၣ်ဘျဲၣ်အတီၢ်ပူၤ, ဘရဲဒၣ် ကၠိ(န) (Brenda Jones) လၢအသးအိၣ် ၆၉ နံၣ်တဂၤ, ဘၣ်အိၣ်ခိးဝဲဒၣ်လၢ တၢ်ဟ့ၣ်မၤဘူၣ် အသူၣ်အသီ အတၢ်ရဲၣ်တၢ်ကျဲၤတၢ်ကွဲးနီၣ်အပူၤန့ၣ်လီၤ. တၢ်ဆၢကတီၢ် ယံာ်ထီၣ်တသီဘၣ်တသီအဃိ, ဘၣ်ယိာ်ဝဲဒၣ်လၢ တၢ်ဆီတလဲ အသူၣ်အသီအံၤ တကဲထီၣ်ဝဲ ဘၣ်ဆၢဘၣ်ကတီၢ်သ့ၣ်သ့ၣ်န့ၣ်လီၤ. ဖဲ ဘရဲဒၣ် ဒိးန့ၢ်ဝဲဒၣ်တၢ်ကစီၣ်, ပှၤလၢအကဘၣ်ဆီတလဲ အသူၣ်အသီန့ၣ် ကမ့ၢ်ဒၣ်အီၤလီၤန့ၣ်ဒီး, အသးပူၤပှဲၤလုာ်ကွံာ်ဝဲဒီးတၢ်သးခုဒိၣ်ဒိၣ်ကလဲာ်န့ၣ်လီၤ. ဘၣ်ဆၣ်, ဖဲအသ့ၣ်ညါထွဲဝဲဒၣ်လၢ ပိာ်မုၣ်အဂၤတဂၤ, အသးအိၣ်ဒံးဒၣ်ထဲ ၂၃ နံၣ်န့ၣ် ဘၣ်ဂုာ်ကျဲးစၢး အိၣ်မူအိၣ်ဂဲၤဝဲ, ဒီးကဘၣ်အိၣ်မူဝဲဒၣ်ထဲ စှၤနၣ်ရံၣ်တဂၤအဂ့ၢ်န့ၣ်လီၤ. ခီဖျိလၢအတၢ်ဆၢတဲာ်အဃိ, တၢ်ကမၤဘၣ်ဒိအီၤထဲလဲၣ်န့ၣ် လၢတၢ်တဆိကမိၣ်ထီၣ်က့ၤလၢၤဘၣ်အပူၤန့ၣ် ဘရဲဒၣ် စူးကွံာ်ညိကွံာ် ခွဲးယာ်လၢအဒိးန့ၢ်ဝဲဒၣ်န့ၣ်လီၤ. ဘရဲဒၣ် စံးဝဲဒၣ်လၢ, “ယမ့ၢ်ပျဲ ပိာ်မုၣ်ဖိအံၤ ကဘၣ်သံဝဲန့ၣ်ဒီး, လၢယနီၢ်ကစၢ်ဒၣ်ယဲ တမ့ၢ် ယအိၣ်မူအိၣ်ဂဲၤကသ့လၢၤဘၣ်န့ၣ်လီၤ. တၢ်လၢပကဘၣ်စံးဘျုးစံးဖှိၣ်တၢ်တမံၤန့ၣ်, မ့ၢ်လၢတၢ်ဆါဟံၣ် ဃုထံၣ်န့ၢ် ပှၤကဟ့ၣ်မၤဘူၣ် သူၣ်အသီလၢ ဘရဲဒၣ် အဂီၢ်အဃိ, တၢ်လၢပိာ်မုၣ် ခံဂၤလိာ် လိၣ်ဘၣ်ဝဲန့ၣ် ဒိးန့ၢ်ဘၣ်ဝဲဒၣ်” န့ၣ်လီၤ.

ဖဲပထံၣ်ဘၣ် ပှၤတဂၤဂၤ ဟ့ၣ်ပှၤတၢ်ဟ့ၣ်လၢ စူးကွံာ်ညိကွံာ်အတၢ်သးစဲ, လၢတၢ်သးအ့ၣ်တဲာ်အပူၤ တဘျီလၢ်လၢ်, တၢ်ဟ့ၣ်လၢ အလီၤဘၣ်ယိၣ်တၢ်လၢအဂီၢ်, (မ့) ဒ်ပှၤအသးတထံတဂၤ အတၢ်မၤအသိးန့ၣ် မ့ၢ်တၢ်လၢအလီၤကမၢကမၣ်တမံၤန့ၣ်လီၤ. တၢ်အံၤမ့ၢ် သးလၢအဲၣ်ဟ့ၣ်ညီတၢ်အဒိၣ်အမုာ် အတၢ်တဲပူ အမုာ်ကတၢၢ်- ပှၤလၢအမၤသံအီၤတဖၣ်အဂီၢ် ကစၢ်ယ့ၣ်ရှူး ဟ့ၣ်လီၤအသးသမူ, ဒီးပကဟ့ၣ်ဆၢက့ၤအီၤအဂီၢ် တၢ်တအိၣ်နီၤတမံၤဒၣ်လဲာ်န့ၣ်,လူလီၤဂာ်လီၤ တၢ်ပျၢ်ကွံာ်ပတၢ်ဒဲးဘး အါအါဂီၢ်ဂီၢ်လၢပဂီၢ်န့ၣ် မ့ၢ်တၢ်လၢအမၤလီၤကတုၤပသးန့ၣ်လီၤ. သးလၢအပှဲၤဒီးတၢ်အဲၣ်တၢ်သးကညီၤတမံၤအံၤ ပထိၣ်ဒွးအီၤတသ့ဘၣ်န့ၣ်လီၤ.

တၢ်လၢပဆိကမိၣ်တထီၣ်ဘးဘၣ်အပူၤန့ၣ် ပနၢ်ဟူ ကစၢ်ယ့ၣ်ရှူး ဟ့ၣ်ဂံၢ်ဟ့ၣ်ဘါပှၤတလီၢ်လီၢ်လၢ ပကပိာ်အခံ, ဒီးအိၣ်မူအိၣ်ဂဲၤ ဒ်သိးဒီးအီၤန့ၣ်လီၤ. လံာ်စီဆှံ ပာ်ဖျါဝဲဒၣ်, ဒ်ကစၢ်ယ့ၣ်ရှူးအသိး (ဖံလံး ၂:၁-၁၁), လၢတၢ်ဆီၣ်လီၤသးအပူၤန့ၣ် ပကဘၣ်ဟ့ၣ်လီၤပသးသမူလၢပှၤဂၤအဂီၢ်, ပဘၣ်တၢ်ကိးပှၤန့ၣ်လီၤ. ဒ်ကစၢ်ယ့ၣ်ရှူးအသိး (၁ ယိၤ ၁၅:၉-၁၇) န့ၣ်, တၢ်ကိးပှၤလၢ ပကဘၣ်အဲၣ်တၢ်, လၢတၢ်အဲၣ်တၢ်သးအိၣ်ဟ့ၣ်ညီတၢ်န့ၣ်လီၤ. တၢ်ကွဲမုာ်သ့ၣ်တဖၣ်အံၤ ကလိၣ်ဘၣ်ဝဲဒၣ်သ့ၣ်သ့ၣ်လၢ ပကဟ့ၣ်တၢ်ဆၢကတီၢ်, ဖဲလၢပတၢ်ဆၢကတီၢ်တအိၣ် အပူၤဒၣ်လဲာ်, (မ့) ပကဟ့ၣ်ကျိာ်စ့ ဖဲလၢပကသူအီၤတလၢတလီၢ်ဒၣ်လဲာ်အပူၤန့ၣ်လီၤ.

အခီပညီကမ့ၢ်ဝဲ တၢ်ဟ့ၣ်လီၤအးလီၤ ပမံၤလၤသၣ်ကပီၤ မ့တမ့ၢ် ပတၢ်မုၢ်လၢ်တဖၣ်လၢပတၢ်အိၣ်မူကြၢးအိၣ်ဖျါထီၣ် ဒ်လဲၣ်အဂီၢ်န့ၣ်လီၤ. ဖဲပပာ်ဖှိၣ်ပတၢ်သူၣ်ဒူသးဒူ, ဒီးပိာ်ကစၢ်ခရံာ်အခံတဘျီလၢ်လၢ်န့ၣ် ပကထံၣ်လီၤက့ၤပသးလၢ ပခါထီၣ်ပခီၣ်ကါဆူ သးလၢအအဲၣ်ဟ့ၣ်ညီတၢ်အဒိၣ်အမုၢ်အပူၤန့ၣ်လီၤ. Winn Collier, ကိၣ်လၢတနံၣ်ဘၣ်တနံၤ ပှၤကွဲးလံ

<< ဖးက့ၤအပူၤကွံာ်လါ အတၢ်ကွဲး