လါမ့ၤတၢ်ဂ့ၢ်အခိၣ်တီ | တၢ်ဘၣ်တ့
ဖဲ ၁၉၀၁ နံၣ်န့ၣ်, ထါတၢ်သးဝံၣ်ကစၢ်ယွၤ “တၢ်အံၤယပၢ်ဟီၣ်ခိၣ်” (This Is My Father World) အပူၤန့ၣ် တၢ်အိၣ်ဖှိၣ်သရၣ်, ဒီးပှၤကွဲးထါ မီ(လ)ဘံၣ် ဘး(ဘ)ခီး (Maltbie Babcock) ကွဲးပာ်ဖျါဝဲဒၣ် တၢ်လၢအမုာ်လၤသးခုဘၣ်ဝဲ တလီၢ်လီၢ်, ဖဲအလဲၤဟးကွၢ်ကီ တၢ်လီၢ်တၢ်ကျဲအိၣ်ဖျါဃံလၤ, တၢ်အကတီၢ်ဖိလၢအထုးန့ၢ်ဖီၣ်န့ၢ် အသးအဂ့ၢ်န့ၣ်လီၤ.
အတၢ်ကွဲးလၢ အဘၣ်ဃးဒီး မူကပိာ်လိၤတဖၣ်, ပီၣ်လဲၣ်ပီၣ်တြီၤတဖၣ်, ဒီးတၢ်ဘၣ်တ့တဖၣ်လၢ အထုးန့ၢ် အသူၣ်အသးအဂ့ၢ်အပူၤန့ၣ်, ကွဲးဖျါဝဲလၢ အသးကလၢၢ်ဘၣ် ယွၤအိၣ်ဒီး အီၤ, ဒီးမၤကတၢၢ်က့ၤ တၢ်သးဝံၣ်တယုၢ်အံၤလၢ “ယွၤကတိၤတၢ်ဒီးယၤ လၢတၢ်လီၢ်
ကိးပူၤဒဲး” န့ၣ်လီၤ.
တၢ်ဘၣ်တ့သ့ၣ်တဖၣ် မ့ၢ်တအိၣ်ဒီး တၢ်အကလုၢ်လၢ ပကနၢ်ဟူဘၣ်အီၤဘၣ်ဆၣ်, ဒ်ကစၢ်ယွၤအစုအတၢ်ဘၣ်တ့တဖၣ်အသိး, မ့ၢ်ဝဲဒၣ် ကျိၤကျဲအကါဒိၣ်တမံၤလၢ ပကမၤလိန့ၢ် “ကစၢ်လၢအမူဒီးတ့လီၤမူခိၣ်ဒီးဟီၣ်ခိၣ်, ပီၣ်လဲၣ်ဒီးကယဲၢ်တၢ်အိၣ်လၢအပူၤ, တဂၤအဂ့ၢ်” (မၤတၢ် ၁၄:၁၅) န့ၣ်လီၤ. လၢတၢ်ဘၣ်တ့သ့ၣ်တဖၣ်အပူၤန့ၣ် ပကထံၣ်ဘၣ် ယွၤအလၤကပီၤ အတၢ်အုၣ်အသး (စံး ၉၁:၁), ဃုာ်ဒီး ကစၢ်ယွၤ အက့ၢ်အဂီၤ, လၢအမ့ၢ်မတၤတဂၤလဲၣ်, ဒီးယွၤအန့ဆၢၣ်လီၤထူလီၤယိာ်တဖၣ် (ရိမ့ၤ ၁:၂၀) န့ၣ်လီၤ.
ပမ့ၢ်ဃုထံၣ်သ့ၣ်ညါ ကလံၤမုၢ်လၢအသဟီၣ်ဆူၣ် (မ့) ထံဟဲယွၤလီၤအကလုၢ်သီၣ်ရူၢ်ရူၢ်တဖၣ်န့ၣ်ဒီး, ယွၤအတၢ်ဘၣ်တ့ ပာ်ဖျါထီၣ်, ကစၢ်ယွၤ အစိအကမီၤန့ၣ်လီၤ. လံာ်ယိၤဘး ၃၈ အပူၤန့ၣ်, ထါတယုၢ်ကွဲးပာ်ဖျါဝဲ ကစၢ်ယွၤ အစိအကမီၤန့ၣ် အုၣ်အသး ခီဖျိလၢ ကစၢ်ယွၤ ဟ့ၣ်လီၤအကလုၢ်လၢ မူခိၣ်ကလံၤသီၣ်ဂီၤအကတီၢ် (:၁၂-၁၃), ပၢဆှၢနဲၣ်လိၤ မူခိၣ်ဖီ, ဒီးသူၣ်အတၢ်ပာ်ဖှိၣ်အလီၢ် (:၂၂-၂၃), ကွၢ်ထွဲ မူဟီၣ်ကယၢ တၢ်ဘၣ်တ့ခဲလၢာ် (:၃၁-၃၃), ဒီးဒုးအိၣ်မူအိၣ်ဂဲၤ သးသမူတဖၣ် လၢအတၢ်ဘၣ်တ့ (:၃၉-၄၀) အပူၤန့ၣ်လီၤ.
တၢ်ဘၣ်တ့သ့ၣ်တဖၣ်အံၤ မ့ၢ်စ့ၢ်ကီး ကျိၤကျဲတဖၣ်လၢ ပလဲၤခီဖျိကလၢၢ်ဘၣ် ကစၢ်ယွၤအတၢ်ဆိၣ်ဂ့ၤ ဒိၣ်ဒိၣ်အါအါန့ၣ်လီၤ. ခီဖျိလၢအတၢ်ဘၣ်တ့န့ၣ် ပကအီၣ်-အီတၢ် (၁ မိၤ ၂၉-၃၀)အဂီၢ်,ဃုာ်ဒီးပကအိၣ်မူဟူးဂဲၤဖံးမၤတၢ်အဂီၢ်, တၢ်လၢအလိၣ်နီၢ်နီၢ် (မး ၆:၂၅-၃၀) တဖၣ်န့ၣ် ကစၢ်ယွၤ ဆိၣ်ဂ့ၤပှၤန့ၣ်လီၤ. အါန့ၢ်ဒိၣ်န့ၢ်ဒံး နီၢ်ခိအတၢ်ဆိၣ်ဂ့ၤတဖၣ်န့ၣ်, လၢနီၢ်သးတကပၤအဂီၢ်, ယွၤအတၢ်ဘၣ်တ့ မ့ၢ်စ့ၢ်ကီးကျိၤကျဲတဘိလၢ ကစၢ်ယွၤ မၤဂ့ၤထီၣ်က့ၤ ပနီၢ်သးအဂံၢ်အဘါ ဒ်ပလဲၤခီဖျိဘၣ် တၢ်မုာ်တၢ်ပၢၤ လၢအမ့ၢ် အီၣ်ဆၣ်အလီၢ်လါဟ့, ဒီးအတၢ်ဆှၢပှၤလၢထံဂၢၢ်နံၤ (စံး ၂၃:၁-၃) အသိးန့ၣ်လီၤ.
ကယဲၢ်ကျိၤကျဲတဖၣ်အံၤအပူၤ, ဒီးအါန့ၢ်အန့ၣ်, ပတၢ်ဘၣ်တ့အကစၢ်ယွၤ မ့ၢ်မတၤတဂၤလဲၣ်န့ၣ်, တၢ်ဘၣ်တ့ မ့ၢ်တၢ်လၢပထံၣ်ဘၣ်, ဒီးမ့ၢ်တၢ်အုၣ်သးနီၢ်နီၢ်, လၢအဒုးနဲၣ်ဖျါထီၣ် ယွၤအသူးအသ့ၣ်, အတၢ်အဲၣ်, ဒီးအတၢ်အံးထွဲကွၢ်ထွဲပှၤဒီဆၢဒီကတီၢ်န့ၣ်လီၤ.
Lisa M. Samra| ကိၣ်လၢတနံၤဘၣ်တနံၤ ပှၤကွဲးလံာ်
လၢအတၢ်ဘၣ်တ့တဖၣ်အဂီၢ်, ကစၢ်ယွၤအတၢ်ပညိၣ်တဖၣ်န့ၣ် ကမ့ၢ်တၢ်မနုၤတဖၣ်လဲၣ်. တလါအံၤ,
ပကကွၢ် ကစၢ်ယွၤ အတၢ်မၤ အတၢ်ကျဲၤက့ၢ်ဂီၤဒိ, ဒီးအတၢ်အုၣ်က့ၤခီၣ်က့ၤ အဂ့ၤအဝါတဖၣ် ကမ့ၢ်တၢ်မနုၤလဲၣ်. တၢ်ဂ့ၢ်မိၢ်ပှၢ်အံၤ ဘၣ်တၢ်ပာ်ဖျါအီၤလၢထးတၢ်ကွဲးဖုၣ်အပူၤ, ဒီးလၢ လါမ့ၤ ၁,၉,၁၆ ဒီး ၂၃ တၢ်ဘူၣ်တၢ်ဘါ အတၢ်ကွဲးဖုၣ်တဖၣ်အပူၤန့ၣ်လီၤ.