လါအ့ဖြ့ၣ်တၢ်ဂ့ၢ်အခိၣ်တီ | ထံဖိကီၢ်ဖိလၢ အိၣ်ဒီးမူဒါခွဲးယာ်တဖၣ်
“အဂ့ၢ်ဒ်အံၤ, ပတၢ်ဝ့ၢ်ဖိ ဘၣ်ဃးဒီးမူခိၣ်, လၢအပူၤန့ၣ် ပကွၢ်လၢ်ပှၤအုၣ်က့ၤခီၣ်က့ၤတၢ် ကစၢ်ယ့ၣ်ရှူးခရံာ်အကျဲစ့ၢ်ကီးလီၤ” (ဖံလံး ၃:၂၀).
ပှၤလၢအစူၢ်က့ၤနာ်က့ၤ ကစၢ်ယ့ၣ်ရှူးတဖၣ် အိၣ်မူအိၣ်ဂဲၤဝဲဒၣ်လၢ ဟီၣ်ခိၣ်ခံဖျၢၣ် (တၢ်လီၢ်တၢ်ကျဲခံတီၤ), ကမ့ၢ်ဝဲဒၣ် ထံဖိကီၢ်ဖိခံကလုာ်န့ၣ်လီၤ. ဒ်စီၤပီလူး စံးဝဲအသိး ပမ့ၢ် ပှၤဝ့ၢ်ဖိဘၣ်ဃးဒီးမူခိၣ်ဘၣ်ဆၣ်, ခ့ခါအကတီၢ်အံၤန့ၣ် ပမ့ၢ်ဒံးဒၣ်ပှၤဟီၣ်ခိၣ်ဖိတဖၣ် န့ၣ်လီၤ. ပတၢ်ထံဖိကီၢ်ဖိ အဂံၢ်ထံးနီၢ်နီၢ်န့ၣ် တမ့ၢ်ဟီၣ်ခိၣ်အံၤအဃိ, ပှၤတနီၤ အဲၣ်ဒိးစံးဝဲလၢ ခ့ခါအကတီၢ်, ပတၢ်အိၣ်အသးတဖၣ်န့ၣ် လီၤဂာ်ဝဲဒၣ်ဒ်သိး “ပအိၣ်ဆိးလၢဟီၣ်ခိၣ်ချၢ ဒ်ပှၤတမှံၤတဖၣ်အသိး” န့ၣ်လီၤ.
ဘၣ်ဆၣ်, ပမ့ၢ်တ့ၢ်လံ ထံဖိကီၢ်ဖိလၢ မူခိၣ်ဘီမုၢ်ဖိတဖၣ်စံးတၢ်န့ၣ် တမ့ၢ်တၢ်တြီဃာ်ပကဘၣ်ဟံးန့ၢ် မူဒါတၢ်ဖံးတၢ်မၤတဖၣ်လၢ ဟီၣ်ခိၣ်ချၢအံၤန့ၣ်ဘၣ်. ပမ့ၢ်မူခိၣ်ဘီဖိမုၢ်ဖိ အတၢ်အိၣ်မူအိၣ်ဂဲၤန့ၣ် ပကအိၣ်မူမၤလၢပှဲၤအီၤလၢ ဟီၣ်ခိၣ်ချၢအံၤကသ့ဝဲဒၣ်ဒ်လဲၣ်.
– ဃ့ထုကဖၣ်တၢ်လၢ ခိၣ်နၢ်တဖၣ်အဂီၢ်- “မၤသးဒ်န့ၣ်ဒီး, လၢတၢ်ခဲလၢာ်အကျါ ယမၤလိာ်ဆိ, လၢပှၤကမၤတၢ်ဃ့ကညး, တၢ်ဘါထုကဖၣ်, တၢ်သကွံာ်ကညး, တၢ်စံးထီၣ်ပတြၢၤ တၢ်အဘျုးအဖှိၣ်, လၢပှၤကညီခဲလၢာ်အဂီၢ်, လၢစီၤပၤ, ဒီးကယဲၢ်ပှၤအိၣ်လၢ ပဒိၣ်အလီၢ်အဂီၢ်, ဒ်သိး ပကအိၣ်ဂၢၢ်အိၣ်ဘှီၣ်, ဒီးအိၣ်ဃူအိၣ်ဖိးလၢ ကယဲၢ်တၢ်ယူးတၢ်ယီၣ်, ဒီးတၢ်ကဒုလီၤတံၢ်အပူၤ” (၁ တံၤ ၂:၁-၂) န့ၣ်လီၤ.
– အၢၣ်လီၤဒိကနၣ် တၢ်ပၢတၢ်ပြးလၢအန့ၢ်စိန့ၢ်ကမီၤ- “မ်ပှၤပာ်အသးလၢ တၢ်စိတၢ်ကမီၤ အဒိၣ်တဖၣ် အဖီလာ်ကိးအဂၤဒဲးတက့ၢ်. အဂ့ၢ်ဒ်အံၤ, တၢ်စိတၢ်ကမီၤတအိၣ်ဘၣ်, အိၣ်ထဲ
တၢ်ဟဲလၢယွၤန့ၣ်ဧိၤလီၤ. တၢ်စိတၢ်ကမီၤလၢ အအိၣ်တဖၣ်န့ၣ်, မ့ၢ်ယွၤပာ်အီၤ” (ရိ ၁၃:၁) န့ၣ်လီၤ.
– တၢ်ဟ့ၣ်ဆၢက့ၤကဲစၢ်အတၢ်- “တုၤနုၤတစု ယ့ၣ်ရှူးစံးဘၣ်အီၤ, အကူၢ်မ့ၢ်ဒ်န့ၣ်ဒီး, ဟ့ၣ်ကဲစၢ်လၢ ကဲစၢ်အတၢ်, ဒီးယွၤလၢယွၤအတၢ်တက့ၢ်” (မး ၂၂:၂၁) န့ၣ်လီၤ.
– အိၣ်မူအိၣ်ဂဲၤ တၢ်အိၣ်မူလၢ အလီၤယူးယီၣ်ပာ်ကဲ- “ယူးယီၣ် ပှၤကညီခဲလၢာ်တက့ၢ်. အဲၣ်ဒီပုၢ်ဝဲၢ်ခဲလၢာ်တက့ၢ်. ပျံၤယွၤတက့ၢ်. ယူးယီၣ်စီၤပၤတက့ၢ်” (၁ ပ့း ၂:၁၇).
လၢပထံလီၢ်ကီၢ်ပူၤန့ၣ် ထံဖိကီၢ်ဖိတဂၤ ကအိၣ်မူဝဲ ဒ်ကစၢ်ယ့ၣ်ရှူးအသိးန့ၣ် တၢ်လၢအတၤပှၤတဖၣ် ကအိၣ်ဝဲဒၣ်စ့ၢ်ကီးန့ၣ်လီၤ. တၢ်လၢအတၤပှၤန့ၣ် ပာ်ဃုာ်ဒီး တၢ်လၢအဒုးနဲၣ်ဖျါထီၣ် ကစၢ်ယွၤအသး- တၢ်ကွၢ်ထွဲကဟုကယာ် ပှၤဖှီၣ်ဖိယာ်ဖိတဖၣ်, တၢ်မၤစၢၤ ပှၤဂံၢ်စၢ်ဘါစၢ်တဖၣ်, ဒီးတၢ်စံၣ်ညီၣ်တီန့ၢ် ပှၤဘၣ်တၢ်မၤအၢမၤနးတဖၣ်အဂီၢ်န့ၣ်လီၤ.
ဘၣ်ဆၣ်, ထီဘိန့ၣ် ပတၢ်သးတီ အဆိကတၢၢ်န့ၣ် ကဘၣ်မ့ၢ်ဝဲဒၣ် ပတၢ်အုၣ်ခီၣ်ကစၢ်, ဒီးယွၤအဘီမုၢ်, “ပဘၣ်စူၢ်ယွၤအါန့ၢ် ပစူၢ်ပှၤကညီတက့ၢ်” (မၤ ၅:၂၉) န့ၣ်လီၤ.
Bill Crowder| ကိၣ်လၢတနံၤဘၣ်တနံၤ ပှၤကွဲးလံာ်
တလါအံၤ, ပကမၤလိတၢ်ဂ့ၢ်လၢ ပကမ့ၢ် ထံဖိကီၢ်ဖိလၢ အယူးယီၣ်မၤလၤကပီၤ ကစၢ်ခရံာ်, ဒီးပကကဲထီၣ် တၢ်မၤစၢၤအဂ့ၤလၢ ပတၢ်ကရၢကရိပပှၤတဝၢအဂီၢ်ဒ်လဲၣ်န့ၣ်လီၤ. တၢ်ဂ့ၢ်မိၢ်ပှၢ်အံၤ ဘၣ်တၢ်ပာ်ဖျါတ့ၢ်အီၤလၢထးတၢ်ကွဲးဖုၣ်အပူၤ, ဒီးလၢ လါအ့ဖြ့ၣ် ၁,၁၆, ဒီး ၂၃. တၢ်ဘူၣ်တၢ်ဘါ အလံာ်တၢ်ကွဲးတဖၣ်အပူၤန့ၣ်လီၤ.