တၢ်ဂ့ၢ်ခိၣ်တီလၢ လါမၢ်ရှး | တၢ်စိာ်တၢ်သးခုကစီၣ်
ကၠဲး (Jack) မ့ၢ်ပှၤကတိၤတၢ်ဆူၣ်ကိၤ, လၢအဘှီထံပီၤအကျိၤတဂၤ, အပူၤကွံာ် တဘျုးနံၣ် န့ၣ် မၤတ့ၢ်ဝဲ ပတၢ်ဘါသရိာ် အတၢ်သူၣ်ထီၣ် အတၢ်တိာ်ကျဲၤတၢ်မၤန့ၣ်လီၤ. ဖဲအဝဲသ့ၣ်ညါထွဲ ဝဲဒၣ်လၢယဘါထုကဖၣ်န့ၢ်တၢ်လၢအဂီၢ်န့ၣ်ဒီး, ဘၣ်တဘျီဘျီန့ၣ် မၢယဃ့ထုကဖၣ်န့ၢ် တၢ်လၢအတံၤသကိးသ့ၣ်တဖၣ်အဂီၢ်န့ၣ်လီၤ. နွံနံၣ်အတီၢ်ပူၤ, ယဃ့ထုကဖၣ် ကိးမုၢ်နံၤ ဒ်သိး ကစၢ်ယွၤ ကတွံၢ်ထုးန့ၢ်က့ၤ, ဒီးကအုၣ်က့ၤခီၣ်က့ၤ ကၠဲး အဂီၢ်န့ၣ်လီၤ.
ဘၣ်တဘျီ ဖဲမုၢ်နံၤဖိဂီၤ တၢ်ဘူၣ်တၢ်ဘါအကတီၢ်, ယဒုးသ့ၣ်ညါတၢ်ဂ့ၢ်လၢ ပလိၣ်အါထီၣ်ပှၤဂီၢ်မုၢ်တဖၣ် ကဟဲဆူ ခရံာ်အအိၣ်, ဒီးဟဲဘါသကိးယွၤလၢ ပသရိာ်, ဒီးယဃ့ထုကဖၣ်တၢ်ယိယိဖိ, “ကစၢ်ယွၤဧၢ, ဝံသးစူၤဟ့ၣ်ဘၣ်ပှၤ ထဲတဂၤဧိၤန့ၣ်တက့ၢ်” န့ၣ်လီၤ. ဖဲမုၢ်ဃ့ၢ်လီၤ အဆၢကတီၢ်န့ၣ် ယကွဲၤဒီနၢ် သီၣ်ထီၣ်, ဒီးမ့ၢ်ဝဲဒၣ် ကၠဲး န့ၣ်လီၤ. အဝဲတဲဘၣ်ယၤလၢ “ယဘၣ်ကူစါယါဘျါယသးလၢ ပဲ(န)ကရံးယဲး ခဲစၢၣ် (Pancreatic cancer) တၢ်ဆါ, ဒီးလၢတၢ်ကွၢ်ဆၢၣ်မဲာ်တၢ်မၤအသးဒ်သိးအံၤအဂီၢ်န့ၣ် တအိၣ်ကတဲာ်ကတီၤပာ်အသးဒံးဘၣ်” န့ၣ်လီၤ. ပအၢၣ်လီၤပသးလၢ ပကထံၣ်လိာ်သး ဖဲနွံလၢအကဟဲ မုၢ်သၢနံၤ, ဒီးတူၢ်လိာ်ဝဲဒၣ်လၢ ပှၤအဂုၤအဂၤတဖၣ် ကယ့ဘါထုကဖၣ်န့ၢ်တၢ်လၢအဂီၢ်စ့ၢ်ကီးန့ၣ်လီၤ. ဖဲမုၢ်နံၤဒိၣ်ဟါခီ, ပတၢ်အိၣ်ဖှိၣ် တၢ်ထုကဖၣ်အဆၢကတီၢ်န့ၣ် ဒ်သိး ကၠဲး အတၢ်ဆါ ကဘျါဂ့ၤထီၣ်က့ၤ, ဒီးကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ်, ပဃ့ထုကဖၣ်န့ၢ်တၢ်လၢ ကၠဲး အဂီၢ်န့ၣ်လီၤ.
နွံလၢအပိာ်ထွဲထီၣ်အခံန့ၣ် တၢ်စံးကတိၤလိာ်သကိးသး လၢသူၣ်ဒီဖျၢၣ်သးဒီဖျၢၣ်ဝံၤန့ၣ်ဒီး, ကၠဲး တူၢ်လိာ် ကစၢ်ယ့ၣ်ရှူး ဒ်အမ့ၢ်အကစၢ်, ဒီးပှၤအုၣ်က့ၤခီၣ်က့ၤတၢ်တဂၤ, ဒီးနွံလၢ အပိာ်ထွဲထီၣ်အခံ မုၢ်နံၤဒိၣ်န့ၣ် ကၠဲး ဒိးစုၣ်ဒိးဘျၢအသးလၢထံန့ၣ်လီၤ.
တၢ်ထုကဖၣ် မ့ၢ်တၢ်အကါဒီၣ်လီၤဆီတမံၤလၢ ကစၢ်ယွၤ အတၢ်သ့တၢ်ဘၣ်လၢ ကမၤ တၢ်တမံၤမံၤ ကကဲထီၣ်လိၣ်ထီၣ်အဂီၢ်န့ၣ်လီၤ. ဒ်သိးပှၤကဟဲဆူယွၤအအိၣ်အဂီၢ်, ပမၤဆူၣ် ပှၤဂၤတသ့ဘၣ်န့ၣ်, ပမ့ၢ်အၢၣ်လီၤတူၢ်လိာ်လၢ တၢ်ဆီၣ်လီၤသးအပူၤန့ၣ်ဒီး, တၢ်လၢပမၤတသ့တဖၣ် ကစၢ်ယွၤ ကမၤလၢပှဲၤဝဲအဂီၢ် ပကဘၣ်အိးထီၣ်တြဲၤန့ၣ်လီၤ. ဖဲပဃ့ထုကဖၣ်တၢ် ဒ်သိးယွၤ အသးစီဆှံ ကတွံၢ်ထုးန့ၢ် ပှၤဂုၤပှၤဂၤအကတီၢ်န့ၣ်, ပကဘၣ်ကွဲမုာ် ယွၤ အစိကမီၤ, ဒီးတၢ်ကီတၢ်ခဲတဖၣ်, ကဖျါလၢပမၤန့ၢ်မၤနၢၤတသ့တဖၣ်န့ၣ် ယွၤကမၤနၢၤကွံာ်ဝဲဒၣ်န့ၣ်လီၤ.
ကစၢ်ယွၤ အတၢ်သးကညီၤ ခီဖျိလၢ ကစၢ်ယ့ၣ်ရှူး အဃိ, ပှၤလၢအဘၣ်အိၣ်လီၤဖးဒီးယွၤ လီၤထူလီၤယိာ်တဖၣ်အဂီၢ်, လၢတၢ်သးကညီၤအပူၤ ပမ့ၢ် ကိးထီၣ်ယွၤန့ၣ်ဒီး, “မ်ပသုးဘူးပသးအိၣ်ဒီးပသးခူတလ့ၢ်ဆူ တၢ်ဘျုးတၢ်ဖှိၣ်အလီၢ်ပစိာ်” (ဧ့ၤ ၄:၁၆) သ့ဝဲဒၣ်န့ၣ်လီၤ. ဒ်ပအဲၣ်ပှၤဂုၤပှၤဂၤ ခီဖျိလၢပတၢ်ထုကဖၣ်အသိး, ပနာ်လီၤတံၢ်လီၤဆဲးသ့ဝဲလၢ ပတၢ်အုၣ်က့ၤခီၣ်က့ၤကစၢ်တဂၤ “ကဃ့တၢ်လၢပဂီၢ်” စ့ၢ်ကီး (ရိ ၈:၃၄) န့ၣ်လီၤ.
– James Banks, ကိၣ်လၢတနံၤဘၣ်တနံၤ ပှၤကွဲးလံာ်
ပတၢ်နာ်လၢကစၢ်ယ့ၣ်ရှူးအဂ့ၢ်န့ၣ် ဒ်သိးကထုးန့ၢ်ပှၤအသးတုၤလီၤတီၤလီၤအဂီၢ်, ပကဟ့ၣ်ခီနီၤလီၤပှၤဂုၤပှၤဂၤ ကသ့ဝဲဒၣ်ဒ်လဲၣ်. ဒ်သိးပကဟ့ၣ်ခီနီၤလီၤ တၢ်အုၣ်က့ၤခီၣ်က့ၤ အတၢ်သးခုကစီၣ် ခီဖျိလၢ ကစၢ်ခရံာ် အဂ့ၢ်ဆူ ပတံၤသကိး, ပဟံၣ်ဖိဃီဖိ, ဒီးပှၤအိၣ်ဆိးပခိၣ်ပဃၢၤသ့ၣ်တဖၣ်အဂီၢ်, မ့ၢ်ပကမၤဒ်လဲၣ်န့ၣ် ပကကွၢ် သကိးလၢ တလါအံၤန့ၣ်တက့ၢ်. တၢ်ဂ့ၢ်မိၢ်ပှၢ်အံၤ ဘၣ်တၢ်ပာ်ဖျါတ့ၢ်အီၤ လၢထးတၢ်ကွဲးဖုၣ်ဃုာ်ဒီးလၢ လါမၢ်ရှး ၁, ၉, ၁၆, ဒီး ၁၃ တၢ်ဘူၣ်တၢ်ဘါအတၢ်ကွဲးတဖၣ်အပူၤန့ၣ်လီၤ.