တၢ်ဂ့ၢ်ခိၣ်တီလၢ လါယနူၤအါရံၤ | တၢ်စံၣ်ဃဲၤတဲဃဲၤဖးဒိၣ်လၢ လံာ်စီဆှံ
တၢ်မုာ်တၢ်ပၢၤန့ၣ် မ့ၢ်တၢ်နီၢ်နီၢ်တမံၤလၢ ခ့ခါအဆၢကတီၢ်, ပှၤတနီၤနီၤ လဲၤခီဖျိကလၢၢ်ဘၣ် ဝဲဒၣ်န့ၣ်လီၤ. ဘၣ်ဆၣ်, ပအိၣ်ဆိးတၢ်ဟီၣ်ခိၣ်ချၢ လၢအပှဲၤဒီးတၢ်သဘံၣ်ဘုၣ်တဖၣ်အပူၤန့ၣ် ကစၢ်ယွၤ ဟ့ၣ်ပှၤတၢ်မုာ်တၢ်ပၢၤ, လၢအဒိၣ်န့ၢ်ထီန့ၢ်ဒံး ပှၤဟီၣ်ခိၣ်ဖိ အတၢ်သ့ၣ်ညါနၢ်ပၢၢ်တၢ်န့ၣ်လီၤ. တၢ်ဆၢမုၢ်လၢ် တၢ်မုာ်တၢ်ပၢၤအံၤ အိၣ်သူၣ်လီၤအသးလၢ လံာ်စီဆှံ အတၢ်တဲပူတဖၣ်အသူၣ်ကံၢ်သးလဲအပူၤန့ၣ်လီၤ.
လၢဧ့ၤဒၣ်တၤသၣ်လီၢ်န့ၣ် ခီဖျိလၢ စီၤအၤဒၣ်ဒီးနီၢ်အံၣ်အု ထီဒါပူထီၣ် ကစၢ်ယွၤအဃိ, ပဝဲကိးဂၤဒဲး စးထီၣ်လၢပအိၣ်ဖျဲၣ်လံၤလံၤန့ၣ် အလီၢ်အိၣ်ဝဲဒၣ်လၢ ပကဘၣ်မၤဘၣ်လိာ်ဘၣ်စးက့ၤ ပတၢ်ရ့လိာ်ဘၣ်ထွဲလိာ်သးဒီးပတၢ်ဘၣ်တ့အကစၢ်ယွၤန့ၣ်လီၤ. ဘၣ်ဆၣ်, ကစၢ်ယွၤ မၤလိၤမၤဘၣ်က့ၤ ပတၢ်ရ့လိာ်ဘၣ်ထွဲလိာ်သး အတၢ်ဂ့ၢ်ကီအံၤန့ၣ်လီၤ. ကစၢ်ယွၤအၢၣ်လီၤအီလီၤတ့ၢ်ဝဲလၢ ကဆှၢလီၤန့ၢ် ပှၤတဂၤ, လၢအကဟ့ၣ်လီၤ တၢ်အုၣ်က့ၤခီၣ်က့ၤဆူ ပှၤကိးဂၤဒဲးအဂီၢ်န့ၣ်လီၤ. ပှၤတဂၤအံၤ မ့ၢ်ဝဲဒၣ် ကစၢ်ယ့ၣ်ရှူး, “ယွၤအသိဖိလၢအစိာ်ထီၣ်ကွံာ် ပှၤဟီၣ်ခိၣ်ဖိအတၢ်ဒဲးဘး” (ယိၤ ၁:၂၉) န့ၣ်လီၤ. ခီဖျိလၢတၢ်နာ်န့ၣ် ပသ့ၣ်ညါပာ်ပနီၣ်, ဒီးပနာ်သန့ၤ ကစၢ်ယ့ၣ်ရှူး ဟ့ၣ်လီၤအသးသမူ, လၢပတၢ်ဒဲးဘးအဃိ, ဒ်သိးဒီးပကလဲၤခီဖျိကလၢၢ်ဘၣ် တၢ်အုၣ်က့ၤခီၣ်က့ၤ, ဒီးတၢ်အစၢန့ၣ် မ့ၢ်ပတၢ်အိၣ်ဃူအိၣ်ဖိးဒီးကစၢ်ယွၤန့ၣ်လီၤ.
ဘၣ်ဆၣ်, တနံၤဘၣ်တနံၤ တၢ်မၤအသးတဖၣ်န့ၣ် ကဲထီၣ် တၢ်လၢအကမၤဟးဂီၤ တၢ်ဃူတၢ်ဖိးအံၤန့ၣ်လီၤ. တၢ်သူၣ်ဒိၣ်သးဖျိး, တၢ်သူၣ်က့ၣ်သးကါ, နီၢ်သးအတၢ်ဂ့ၢ်ကီ, တၢ်ရ့လိာ်ဘၣ်ထွဲလိာ်သးတဖၣ်, ဒီးတၢ်ဖံးတၢ်မၤ, ဒီးတၢ်အိၣ်ဆူၣ်အိၣ်ချ့ အတၢ်ဂ့ၢ်ကီတဖၣ်လၢအတမ့ၢ် တၢ်ဃူတၢ်ဖိးန့ၣ် ဒုးကဲထီၣ်တၢ်သူၣ်ကိၢ်သးဂီၤလၢပဂီၢ်န့ၣ်လီၤ. တၢ်ဃူတၢ်ဖိးအဂၤတမံၤ, လၢကစၢ်ယ့ၣ်ရှူး ဟ့ၣ်ပှၤန့ၣ် မ့ၢ်ဝဲဒၣ်, ကစၢ်ယွၤအတၢ်ဃူတၢ်ဖိးန့ၣ်လီၤ.
ကစၢ်ယ့ၣ်ရှူးစံးဝဲ, “ယပာ်လီၤတဲာ်တၢ်ဃူတၢ်ဖိးဒီးသု, ယတၢ်ဃူတၢ်ဖိးန့ၣ်, ယဟ့ၣ်လီၤသုလီၤ. ယတဟ့ၣ်ဘၣ်သု ဒ်ဟီၣ်ခိၣ်ဟ့ၣ်တၢ်အသိးဘၣ်. သုသးန့ၣ် သုတကိၢ်သုတဂီၤ တဂ့ၤ. ဒီးသုသုတသးအုးတဂ့ၤ” (ယိၤ ၁၄:၂၇) န့ၣ်လီၤ.
ပှၤတၢ်မၢဖိစီၤပီလူး ဟ့ၣ်ဂံၢ်ဟ့ၣ်ဘါ အပှၤဖးလံာ်ဖိတဖၣ်လၢ အတၢ်ကတိၤတဖၣ်အံၤ, “မ်ခရံာ်အတၢ်ဃူတၢ်ဖိး ပၢတၢ်လၢ သုသးကံၢ်ပူၤတက့ၢ်. ဆူအဝဲန့ၣ်အပူၤ တၢ်ကိးသုလၢ နီၢ်တဂၤဃီအပူၤလီၤ. ဒီးကဲထီၣ်ပှၤစံးထီၣ်ပတြၢၤတၢ်အဘျုးအဖှိၣ်တက့ၢ်” (ကလီး ၃:၁၅).
လံာ်စီဆှံ အတၢ်တဲပူဖးဒိၣ် ပာ်ဖျါဝဲ ကစၢ်ယ့ၣ်ရှူး မၤနၢၤတၢ်သံ, ဒီးအၢၣ်လီၤပှၤလၢ တၢ်မူအထူအယိာ်န့ၣ်လီၤ. တၢ်မ့ၢ်တၢ်တီလၢ အလီၤကမၢကမၣ်တမံၤအံၤအဃိ, တလိၣ်လၢ ပကဘၣ်မၤလၢာ်ဂီၤကလီၤကွံာ်ပသးလၢ ဟီၣ်ခိၣ် အတၢ်တလီၤတံၢ်တဖၣ်အံၤအဂီၢ်ဘၣ်. လၢအလီၢ်န့ၣ်, ပကပျဲ ယွၤအတၢ်ဃူတၢ်ဖိး ပၢဆှၢပသးကံၢ်ပူၤန့ၣ်တက့ၢ်.
– David Frees
လၢလံာ်စီဆှံအပူၤ, တၢ်ကူၣ်သ့လၢ အထိၣ်ဟူးထိၣ်ဂဲၤပှၤအသးန့ၣ် မ့ၢ်နထံၣ်ဆိကမိၣ်နဲဒ်လဲၣ်. တၢ်ဖးလံာ်စီဆှံ ခီဖျိကျိၤကျဲလၢ အဆဲးကပီၤကဒါက့ၤ တၢ်တဲပူတမံၤဃီၤန့ၣ် ကမ့ၢ်တၢ်အခီပညီမနုၤလဲၣ်. လၢလါယနူၤအါရံၤ ဒီတလါအပူၤန့ၣ် ပကကွၢ် လံာ်စီဆှံ အတၢ်ပာ်ဖျါအဂ့ၢ်အကျိၤ လၢအဒုးနဲၣ်ဖျါထီၣ် ကစၢ်ယွၤ အတၢ်ဖံးတၢ်မၤ, လၢအမၤဂ့ၤမၤဘၣ်က့ၤ ပှၤဟီၣ်ခိၣ်ဖိဒီးအတၢ်ဘၣ်တ့အဂ့ၢ်န့ၣ်တက့ၢ်. တၢ်ဂ့ၢ်မိၢ်ပှၢ်အံၤ ဘၣ်တၢ်ပာ်ဖျါ တ့ၢ်အီၤ, လၢထးတၢ်ကွဲးဖုၣ်, ဃုာ်ဒီးတၢ်ဘူၣ်တၢ်ဘါ အတၢ်ကွဲးတဖၣ်လၢ လါယနူၤအါရံၤ ၁,၈,၁၅ ဒီး ၂၂ သီ အပူၤန့ၣ်လီၤ.
Danny Franks