တၢ်ဂ့ၢ်ခိၣ်တီလၢ လါနိၣ်ဝ့ဘၢၣ် | တၢ်ဘူၣ်ထီၣ်ဘါထီၣ်ယွၤ

ပှၤတဝၢ အတၢ်အိၣ်ဖှိၣ် – တၢ်ကတိၤဖိအံၤ ဒုးဆိကမိၣ်ထီၣ်ပှၤမနုၤလဲၣ်. ကစၢ်ယ့ၣ်ရှူး ထုကဖၣ်လၢ (ယိၤ ၁၇) ပှၤစူၢ်က့ၤနာ်က့ၤတၢ်တဖၣ် အတၢ်အိၣ်ဖှိၣ်အံၤ မ်ကဘၣ် တၢ်သ့ၣ်ညါအီၤ ခီဖျိအတၢ်ပာ်ဖျါထီၣ် တၢ်ဃူတၢ်ဖိး, တၢ်သးခု, တၢ်ဒိၣ်ထီၣ်လၢ တၢ်မ့ၢ်တၢ်တီအပူၤ, ဒီး ကတူၢ်လိာ်မၤသကိးတၢ် ဒ်တၢ်ကိး လီၤဘၣ်ပှၤအသိးန့ၣ်လီၤ.

တၢ်အိၣ်ဒီးတၢ်ပာ်သးတဖျၢၣ်ဃီ – ကစၢ်ယ့ၣ်ရှူး ထုကဖၣ်ဝဲ ဒ်သိးတၢ်ဃူတၢ်ဖိးကမ့ၢ် တၢ်လၢအပာ်ဖျါထီၣ် တၢ်အိၣ်ဖှိၣ် အတၢ်မ့ၢ်တၢ် န့ၣ်လီၤ. “ပၢ်စီဆှံဧၢ, ပှၤလၢနဟ့ၣ်လီၤယၤတဖၣ်န့ၣ် ဒ်သိးအကကဲထီၣ်တၢ်တမံၤဃီ, ဒ်နၤဒီးယၤအသိးဒီး အံးက့ၤကွၢ်က့ၤအီၤ…” တက့ၢ်(၁၁). တၢ်ဃူတၢ်ဖိး တမ့ၢ် တၢ်ဒ်သိးလိာ်သးလၢနီၢ်ခိတခီဘၣ်. ဒ်ပတၤလၣ်အိၣ်ဝဲအသိး ပဟဲပာ်ဖှိၣ်လိာ်ပသး, ဒီးလၢတၢ်လီၤဆီလိာ်သးအပူၤန့ၣ် ပပာ်ဖျါထီၣ် တၢ်အဲၣ်ဆူ ပှၤဟီၣ်ခိၣ်ဖိတဖၣ် လၢအအိၣ်လၢပခိၣ်ပဃၢၤ ဝးဝးန့ၣ်လီၤ.

တၢ်သူၣ်ခုသးခု – ကစၢ်ယ့ၣ်ရှူး ထုကဖၣ်ဝဲ ”ဒ်သိးအဝဲသ့ၣ်ကအိၣ်ဒီး ယတၢ်သးခုလၢထီၣ်ပှဲၤထီၣ်လၢအပူၤဒၣ်ဝဲလီၤ” (၁၄). တၢ်အိၣ်ဒီး တၢ်ကရၢကရိဒီး တၢ်ပာ်ဖှိၣ်လိာ်သးန့ၣ် ကဲဘျုး လၢတၢ်ဟ့ၣ်ဂံၢ်ဟ့ၣ်ဘါ, ဟ့ၣ်သဆၣ်ထီၣ်တၢ် အဂီၢ်န့ၣ်လီၤ. ပှၤစူၢ်က့ၤနာ်က့ၤတၢ် ကဒဲကဒဲ ဒုးသ့ၣ်နီၣ်လိာ်သးသ့လၢ ပှၤလၢမၤသးခုပှၤဒီးမၤသူၣ်မံသးမုာ်ပှၤန့ၣ် မ့ၢ်ဒၣ် ထဲတၢ်ဘၣ်တ့ကစၢ် တဂၤဧိၤန့ၣ်လီၤ.

တၢ်ဒိၣ်ထီၣ်လၢ တၢ်မ့ၢ်တၢ်တီအပူၤ – ကစၢ်ယ့ၣ်ရှူးထုကဖၣ်ဝဲ ဒ်သိးယွၤ”ကအံးက့ၤကွၢ်က့ၤ(ပှၤ) ဒ်သိး တၢ်အၢတၢ်သီ သုတဘၣ်(ပှၤ)တဂ့ၤန့ၣ်လီၤ ”(၁၅). ဖဲပလီၤမၢ်ဒီး ပတၢ်လဲၤကျဲကမၣ်အခါ ခရံာ်အတၢ်အိၣ်ဖှိၣ် အိၣ်ဒီး အသဟီၣ်တမံၤ လၢအလီၤဆီလီၤလး လၢကထံၣ်လိာ်ပှၤလၢ မဲာ်သကိးမဲာ်, ဒီးဘှီဘၣ်မၤလိၤက့ၤပှၤန့ၣ်လီၤ. ပှၤစူၢ်နာ်ခရံာ်တဖၣ် အတၢ်အိၣ်ဖှိၣ်အံၤ အိၣ်ဒီးမူဒါလၢ ကမၤစၢၤပှၤ ဒ်သိးပကဃၣ်လိၤက့ၤပသးဆူ တၢ်သးခု ကစီၣ် အအိၣ်န့ၣ်လီၤ.

တၢ်ပာ်ကဲယွၤအတၢ်ကိးလၢ အဘၣ်တၢ်မၢလီၤပှၤ – ကစၢ်ယ့ၣ်ရှူး ထုကဖၣ်ဝဲ ”ဒ်နမၢလီၤယၤ ဆူဟီၣ်ခိၣ်အသိးန့ၣ် ယမၢလီၤ စ့ၢ်ကီးအီၤဆူ ဟီၣ်ခိၣ်လီၤ”(၁၈). ပှၤစူၢ်က့ၤနာ်က့ၤတၢ်ဖိတဖၣ် ကဘၣ်အိၣ်လီၤဖးဒီးဟီၣ်ခိၣ်န့ၣ် တမ့ၢ်ယွၤအတၢ်တိာ်ဒီး အတၢ်ဘၣ်သးဘၣ်. ယွၤမၢလီၤပှၤလၢပကဘၣ်လဲၤဆူဟီၣ်ခိၣ်ဒီဘ့ၣ်ညါလီၤ(မး ၂၈:၁၈-၂၀). ပှၤစူၢ်က့ၤ နာ်က့ၤတၢ်တဖၣ် အတၢ်ရ့လိာ်ဘၣ်ထွဲ ဟ့ၣ်သဆၣ်ထီၣ် ပှၤလၢ ပကရ့လိာ်သးဒီး ပှၤတစူၢ်တနာ်ခရံာ်တဖၣ် စ့ၢ်ကီးန့ၣ်လီၤ. ပဝဲပှၤစူၢ်နာ်တၢ်တဖၣ် ပပာ်ဖှိၣ်လိာ်သး တဂၤဒီးတဂၤ ဒ်သိးပကဃ့ထုကဖၣ်သကိးတၢ်, ဝံၤဒီး ပကဟးထီၣ်ဆူ တၢ်အိၣ်ဖှိၣ်အချၢ ဆူဟီၣ်ခိၣ်ချၢ ဒ်သိးပကမၤ တၢ်ခ့တၢ်ပှၤအတၢ်မၤ, ပကပာ်ဖျါထီၣ်တၢ်အဲၣ်တၢ်ကွံ, ဒီးပကကွဲမုာ်ပှၤဂၤဆူ တၢ်ရ့လိာ်ဘၣ်ထွဲဒီး ကစၢ်ယ့ၣ်ရှူးအပူၤန့ၣ်လီၤ.

မ့ၢ်လၢပအိၣ်ဒီးခ့ခါ ပီညါအတၢ်သ့တၢ်ဘၣ်အဃိ ပပလၢၢ်ဘၣ်ညီကဒၣ် လၢပှၤတဂၤဒီးတဂၤ ဘၣ်ထွဲစဲဘူးလိာ်သး န့ၣ်လီၤ. ဘၣ်ဆၣ် တၢ်ရ့လိာ်ဘၣ်ထွဲတဖၣ် အိၣ်သယုၢ်သတွၤန့ၣ်လီၤ. တလါညါအံၤ ပကမၤလိသကိး တၢ်မၤသကိးတၢ်လၢ တၢ်အိၣ်ဖှိၣ်ပူၤ- ပှၤစူၢ်က့ၤနာ်က့ၤတၢ်ဖိတဖၣ် လၢတၢ်အိၣ်ဖှိၣ်ပူၤ အတၢ်ဟ့ၣ်ခီဟ့ၣ်နီၤလိာ်သး သးသမူအတၢ်လဲၤခီဖျိတဖၣ်အဂ့ၢ်, ဒီး ဖဲပမၤသကိးတၢ်ဒီး ကဲထီၣ်တၢ်ဂ့ၤ တၢ်အိၣ်ဆူၣ်အိၣ်ချ့လၢနီၢ်ခိ, နီၢ်သးဒီး နီၢ်ကစၢ်အဂီၢ် ထဲလဲၣ်, ဒ်လဲၣ်အဂ့ၢ်န့ၣ်လီၤ.