တၢ်ဂ့ၢ်ခိၣ်တီလၢ လါအီးကထိဘၢၣ် | ပတၢ်မ့ၢ်တၢ်လၢ ခရံာ်အပူၤ
လၢပဟံၣ်ပူၤ ပတကတိၤစပ့ၣ်အကျိာ်ဘၣ်. မ့ၢ်လၢယမိၢ်ယပၢ်တဖၣ် ဟ့ၣ်ဂံၢ်ဟ့ၣ်ဘါယၤ ဒ်သိးယကတူၢ်လိာ် ယတၢ်မ့ၢ်တၢ် ဒ်အမ့ၢ် ပှၤမဲးစံၣ်ကဲၣ်ဖိ ဟဲအိၣ်ဆိးလၢကီၢ် အမဲရကၤ စၢၤသွဲၣ်အဆိကတၢၢ်တဖုအသိးန့ၣ်လီၤ. ဒီးယမံၤအခၢၣ်သး တဖျၣ်န့ၣ် ကဒိးဝဲ လၢကိၤလၤ ကျိာ် ဒီးကွဲးလီၤယမံၤ ဖဲအဆှၢယၤဆူကၠိန့ၣ်လီၤ. မ့ၢ်ယဘၣ်ထွဲဒီးကလုာ်မတၤလဲၣ်န့ၣ် ယသး ဘၣ်တံာ်တာ် ဒီးယဘၣ် ဂဲၤလိာ်ဒီး တၢ်သံကွၢ်အံၤန့ၣ်လီၤ. ဖဲယသးပှဲၤထီၣ် ၁၈ နံၣ်ဒီး ယလဲၤ ဆဲးလီၤယမံၤဒီး ပတံထီၣ် ကီၢ်ဆၣ် အလံာ်အုၣ်သးအခါ ယသးအိၣ်ဆဲးလီၤ ယမံၤအခီၣ်ထံးတဖျၢၣ် ဒ် Xochitl (ဆိခၠ့း), ဒီးယသးအိၣ် ဃုထံၣ်က့ၤ လုၢ်လၢ်ထူသနူလၢအလီၤအဲၣ် လၢအဘၣ်တၢ် ပာ်တ့ၢ်အီၤန့ၣ်လီၤ.
အနံၣ်တဆံပူၤကွံာ်ဒီး ဖဲယပတံထီၣ်ဒီးဃ့ကဒီး ယတၢ်အိၣ်ဖျဲၣ်လံာ်အုၣ်သး, ဒီးဖဲအဘၣ်တၢ်ဆှၢလီၤအီၤဆူယအိၣ် အခါန့ၣ် လၢတၢ်ဖုးသံပျီၢ်ဂီၤအပူၤ ယဆဲးကျိးယမိၢ် ဒီးစံးဘၣ်အီၤလၢ ပှၤကဒိးယမံၤကမၣ်န့ၣ်လီၤ.
ယမိၢ်စံးဝဲလၢ “တမ့ၢ်အဝဲသ့ၣ်အတၢ်ကမၣ်ဘၣ်. မ့ၢ်ဒၣ်နတၢ်ကမၣ်လီၤ. ဖဲနပတံထီၣ် ကီၢ်ဆၣ်လံာ်အုၣ်သးအခါ ယဆိကမိၣ်လၢ နယုၢ်ဒၣ်နဲနမံၤန့ၣ်လီၤ”.
ခ့ခါခဲအံၤ ဘၣ်ထွဲဒီးမံၤသၣ်တဖၣ်န့ၣ် ပတပာ်ဒိၣ်အီၤထဲထဲသနာ်က့ လၢလံာ်စီဆှံအစိၤဆၢကတီၢ်န့ၣ် မံၤသၣ်တဖၣ် ပာ်ဖျါထီၣ် ပှၤကညီတဂၤအသကဲာ်ပဝး, ဒီး ကဲထီၣ်တၢ်မၤစၢၤ ဒ်သိးအကဒုးအိၣ်ထီၣ် အစၢၤသွဲၣ်တၢ်န့ၢ်သါ ဒီးအတၢ်မ့ၢ်တၢ် တဖၣ်န့ၣ်လီၤ.
တၢ်မၢဖိစီၤယိၤဟၣ် ဒုးသ့ၣ်ညါပှၤလၢ ကစၢ်ယ့ၣ်ရှူးမ့ၢ် “တၢ်အကလုၢ်”, ဒီးစံးဝဲ, “ပှၤလၢ အစူၢ်က့ၤနာ်က့ၤအမံၤ တဖၣ်န့ၣ် ဟ့ၣ်ဝဲလၢအစိကမီၤ ဒ်သိးအကကဲထီၣ်ယွၤ အဖိလီၤ “(ယိၤ ၁:၁, ၁၂). ကစၢ်ယ့ၣ်ရှူးမ့ၢ် “ပှၤကွၢ်သိလၢ အဂ့ၤ, ဒီးအဝဲကိးထီၣ် အသိ ဒၣ်ဝဲလၢအမံၤ“လီၤ(၁၀:၃). တၢ်အံၤ ပာ်ဂၢၢ်ကျၢၤဝဲ အတၢ်သ့ၣ်ညါ အသိ လၢအညီနုၢ် ရ့လိာ်အသး ဘူးဘူးတံၢ်တံၢ်န့ၣ်လီၤ.
ကစၢ်ယွၤတ့လီၤ ဒူၣ်ထၢ, ကလုာ်တဖၣ် လၢအအိၣ်ဒီး တၢ်ပာ်သူၣ်ပာ်သး တၤလၣ်အကလုာ်ကလုာ် ဒီးတ့ထီၣ် ပှၤကညီ လၢအလီၤဆီလိာ်သးန့ၣ်လီၤ. ဘၣ်ဆၣ် ပတၢ်မ့ၢ်တၢ် ဒ်အမ့ၢ်ယွၤအဖိန့ၣ် ကစၢ်ပာ်ဂၢၢ်ပာ်ကျၢၤဝဲ လၢပဘၣ်ဃးဒီး မူခိၣ်ဘီမုၢ်န့ၣ်လီၤ (ဖံ ၃:၂၀). ဒီးတၢ်လၢဘၣ်ထွဲဘၣ်ဃးလိာ်သးအဂ့ၢ်န့ၣ် တလိၣ်လၢပကဂဲၤလိာ်ဒီး ဃုသ့ၣ်ညါ တူၢ်လိာ်အီၤဘၣ်. ပန့ၢ်သါဘၣ် အတၢ်အၢၣ်လီၤ တခါဘၣ်တခါ လၢအအိၣ်ဂၢၢ်ကျၢၤလၢ ခရံာ်အပူၤ, မံၤပှ့ၤဒိၣ်လၢမံၤတဖၣ်အဖီခိၣ်အပူၤန့ၣ်လီၤ(၂:၉).
ယမ့ၢ်မတၤလဲၣ်, ဘၣ်မနုၤ ယဟဲအိၣ်ဖျဲၣ်ထီၣ်လဲၣ်- တၢ်သံကွၢ်ခံထံၣ်အံၤ ပှၤကိးဂၤဒဲး ဆိကမိၣ်ထီၣ်ဝဲဒၣ်န့ၣ်လီၤ. တၢ်စံးဆၢတခီ, သိပှၤတဂၤအတၢ်မ့ၢ်တၢ်, တၢ်လၢကဘၣ်ပာ်လုၢ်ပာ်ပှ့ၤဝဲ, ကဘၣ်ဟူးဂဲၤဖံးမၤတၢ်ဒ်လဲၣ်, တၢ်ရ့လိာ် ဘၣ်ထွဲဒီး ပှၤအဂုၤဂၤ ကြၢးအိၣ်ဒ်လဲၣ် အဂ့ၢ်န့ၣ်လီၤ. လၢတလါညါအံၤန့ၣ် ပကမၤလိသကိး ပတၢ်မ့ၢ်တၢ်လၢခရံာ်အပူၤ အခီပညီစံးတၢ် မ့ၢ်မနုၤလဲၣ် န့ၣ်လီၤ.
Xochitl Dixon| ကိၣ်လၢတနံၤဘၣ်တနံၤပှၤကွဲးလံာ်