တၢ်ဂ့ၢ်ခိၣ်တီလၢ လါစဲးပထ့ဘၢၣ် | ယွၤသၢဂၤတဂၤဃီ
ယွၤသၢဂၤလိာ် မၤသကိးတၢ်လၢ တၢ်ဘၣ်တ့အဆၢကတီၢ်န့ၣ်လီၤ. အဂ့ၢ်ဒ်အံၤ, လၢ (ယ့ၣ်ရှူးခရံာ်အပူၤ), “…ကယဲၢ် တၢ်တမံၤလၢ်လၢ် ဘၣ်တၢ်တ့အီၤလၢ(ပၢ်ကစၢ်ယွၤ)အစုပူၤ, ဒီးလၢအဂီၢ်လီၤ” (ကလီး ၁:၁၆). ဒီး“ယွၤအသး ဟုဝဲလၢ ထံဖံးခိၣ်“လီၤ(၁ မိၤ ၁:၂).
လၢတၢ်အုၣ်က့ၤခီၣ်က့ၤ အတၢ်မၤစ့ၢ်ကီး ပၢ်ကစၢ် အဲၣ်ပှၤဟီၣ်ခိၣ်ဖိ တုၤအဟ့ၣ်လီၤကွံာ်အဖိခွါအိၣ်တဂၤဃီလီၤ (ယိၤ ၃:၁၆). ခရံာ်ဂဲၤဆၢထၢၣ် သမူထီၣ်က့ၤဒီး က့ၤထီၣ်ဆူမူခိၣ်ဝံၤအလီၢ်ခံ ပၢ်ကစၢ်ဒီးဖိကစၢ် ဆှၢလီၤသးမုၢ်စီဆှံန့ၣ်လီၤ (၁၄:၁၆, ၁၆:၇).
တၢ်လီၤဆီလိာ်သးလၢ ပှၤသၢဂၤအဘၢၣ်စၢၤန့ၣ် အိၣ်ဖျါဝဲဂ့ၤဂ့ၤဖဲ ခရံာ်ဒိးစုၣ်ဒိးဘျၢ အသးအခါန့ၣ်လီၤ. “ဒီးယ့ၣ်ရှူး ဒိးဘျၢအသးဝံၤဒီး လဲၤထီၣ်တကီၢ်ခါလၢထံကျါ ဒီးမူခိၣ် အိးထီၣ်အသးလၢအဂီၢ်, ဒီးထံၣ်ယွၤအသး ယုၢ်လီၤ ဒ်ထိၣ်လွံၢ်အသိး ဒီးဟဲလီၤလၢအလိၤန့ၣ်လီၤ. ဒီးကွၢ်ကွၢ် တၢ်ကလုၢ်သီၣ်လီၤလၢမူခိၣ်ဒီး စံးဝဲဒၣ်, အဝဲတဂၤအံၤ မ့ၢ်ယဖိခွါလၢယအဲၣ်, ဒီးဘၣ်ယသးလၢအီၤလီၤ“ (မး ၃:၁၆-၁၇). ဒီးဖဲအစံးဘၣ်အပျဲၢ်အဘီၣ်တဖၣ် လၢ “လဲၤဒုးကဲထီၣ် ပှၤအကလုာ်တဖၣ်ခဲလၢာ် လၢယပျဲၢ်ယဘီၣ်…. ဒီးဘျၢအီၤလၢ ပၢ်, ဒီးဖိခွါ, ဒီးသးစီဆှံအမံၤအပူၤတက့ၢ်“န့ၣ် (၂၈:၁၈-၁၉) ခရံာ် မၤလီၤတံၢ် ယွၤသၢဂၤတဂၤ အတၢ်မ့ၢ်တၢ်န့ၣ်လီၤ.
ယွၤသၢဂၤတဂၤ လၢအမ့ၢ် ယွၤထဲတဂၤဧိၤအပူၤ, ပၢ်အိၣ်လၢမူခိၣ်ကစၢ်ယွၤအံၤ အဲၣ်ပှၤ, ဒီးဆှၢလီၤအဖိခွါ ဒ်သိးကတူၢ်သံ အသးလၢ တၢ်အုၣ်က့ၤခီၣ်က့ၤပှၤအဂီၢ်န့ၣ်လီၤ. ယ့ၣ်ရှူး ခရံာ် ဟဲလိၣ်ထီၣ်အသးဒ်ပှၤကညီ ဒ်သိးကမ့ၢ်တၢ်တမံၤဃီဒီးပှၤ ဒီးကတူၢ်တၢ်ဒီး ဟ့ၣ်ကၣ် ပတၢ်ဒဲးဘးအဘူးအလဲန့ၣ်လီၤ.သးမုၢ်စီဆှံကစၢ် လၢအမ့ၢ် ပှၤလၢ အမၤစၢၤပှၤဒီး မၤသူၣ်မံသးမံပှၤတဂၤန့ၣ် အိၣ်ဆိးဝဲလၢပပူၤ ဒီး မၤစၢၤပှၤ ဒ်သိးပကမၤနၢၤ တၢ်ဒဲးဘး န့ၣ်လီၤ.
“ဒီးတၢ်သၢမံၤန့ၣ် အုၣ်အသးလၢ တၢ်တမံၤဃီလီၤ” (၁ ယိၤ ၅ :၈). ဖဲပဃ့ထုကဖၣ်တၢ်ဒီး ယွၤသၢဂၤတဂၤဃီအံၤ နၢ်ဟူဝဲလီၤ. ဖဲပဘၣ်တူၢ်ဘၣ်ခီၣ်ဘၣ်တၢ်ဒီး အဝဲနၢ်ပၢၢ်ပှၤဒီး ကဆှၢပှၤ, ကအံးက့ၤကွၢ်က့ၤပှၤ တုၤတၢ်လၢတၢ်ပှဲၤတစု ဒီးဒုးအိၣ်ဘှံးပှၤလၢ ဟံၣ်လၢမူခိၣ်န့ၣ်လီၤ.
ပၢ်ကစၢ်, ဖိကစၢ်, သးစီဆှံကစၢ် ယွၤသၢဂၤတဂၤဃီအဂ့ၢ် တၢ်သိၣ်တၢ်သီပီညါအံၤ မ့ၢ်တၢ်လၢပနၢ်ပၢၢ်အီၤကီဒီး အမၤတံာ်တာ် ပသးန့ၣ်လီၤ. ပှၤတနီၤနီၤ ကဆိကမိၣ်ဝဲလၢ မ့ၢ်မနုၤအဃိ ပကြၢးပာ်ဒိၣ်ထီၣ် တၢ်ဂ့ၢ်အံၤန့ၣ်လဲၣ်. တလါညါအံၤ ပကမၤလိသကိး ယွၤသၢဂၤတဂၤဃီ အခီပညီဒီး အတၢ်အိၣ်သးန့ဆၢၣ်တဖၣ်န့ၣ်လီၤ.