လါစဲးပထ့ဘၢၣ် တၢ်ဂ့ၢ်အခိၣ်တီ | စိၤဆၢကတီၢ်လၢခံအကတၢၢ်
ကစၢ်ယ့ၣ်ရှူးစံးကတိၤဝဲအတၢ်ဟဲက့ၤကဒါက့ၤတၢ်အဂ့ၢ်န့ၣ် ကမ့ၢ်ဝဲတၢ်မၤမုာ်ထီၣ်က့ၤတၢ်အဒိၣ်ကတၢၢ် လၢအပျဲၢ်အဘီၣ်တဖၣ်အဂီၢ်န့ၣ်လီၤ. တချုးလၢဘၣ်တၢ်မၤသံအီၤလၢထူၣ်စုညါလိၤ, ဒီးဖဲအဝဲသ့ၣ်မၤဘူၣ်လဲၤကပာ်ဒီး အီၣ်ဟါတၢ်အီၣ်လၢဒၢးဖးဒိၣ်, လၢတၢ်ထီၣ်ထီတတီၤန့ၣ်အဆၢကတီၢ်, ကစၢ်ယ့ၣ်ရှူးစံးဘၣ်အပျဲၢ်အဘီၣ်တဖၣ်လၢ “သုဝဲသ့ၣ်အံၤ, သုတသူၣ်ကိၢ်သးဟးဂီၤတဂ့ၤ, စူၢ်က့ၤနာ်က့ၤယွၤ ဒီးစူၢ်က့ၤနာ်က့ၤယၤစ့ၢ်ကီးတက့ၢ်.-တၢ်အိၣ်အလီၢ် လၢယပၢ်အဟံၣ်ပူၤန့ၣ်,အိၣ်အါပူၤလီၤ. မ့တမ့ၢ်ဘၣ်ဒီး, ယကစံးဘၣ်တဲဘၣ်တ့ၢ်သုလီၤ. ယလဲၤကတဲာ်ကတီၤသုလီၢ် တပူၤဒီး, ယကဟဲက့ၤကဒီးဆူသုအိၣ်လီၤ. ဒီးယကဟံးက့ၤသုဆူယကစၢ်ဒၣ်ယဲအအိၣ် ဒ်သိးဖဲယအိၣ်အလီၢ်န့ၣ်, သုကအိၣ်စ့ၢ်ကီးလီၤ” န့ၣ်ဖျါဖဲ လံာ်ယိၤဟၣ် ၁၄:၁-၃ အပူၤန့ၣ်လီၤ.
ကစၢ်ယ့ၣ်ရှူးအတၢ်ကတိၤ “ယကဟဲက့ၤကဒီး” န့ၣ်လီၤတံၢ်ထဲလဲၣ်, ပာ်သူၣ်ပာ်သး တက့ၢ်. ဖဲအပျဲၢ်အဘီၣ်တဖၣ် ဘၣ်ဂဲၤလိာ်အသးဒီး တၢ်ကစီၣ်လၢအမ့ၢ် ကစၢ်ယ့ၣ်ရှူးကလဲၤသဒၣ်အဝဲသ့ၣ်အဂီၢ်, ကစၢ်ယ့ၣ်ရှူးဟ့ၣ်ထီၣ် အတၢ်အၢၣ်လီၤလၢ အကဟဲက့ၤကဒီး, ဒီးဟံးက့ၤ အပှၤဂီၢ်မုၢ်တဖၣ်ဆူအပၢ်အဟံၣ်, ဒ်သိးကမၤမုာ်ထီၣ်အပျဲၢ်အဘီၣ်တဖၣ်အဂီၢ်န့ၣ်လီၤ. လၢခ့ခါတၢ်အိၣ်အသး, မၤအသးလၢဟီၣ်ခိၣ်ချၢအံၤ, ပှၤကညီတဖၣ်လၢအဘၣ် ဂုာ်ကျဲးစၢၤဂဲၤလိာ် အသးဒီး တၢ်သးဒ့ဒီ, ဒီးတၢ်ပျံၤတၢ်ဖုးတဖၣ်အဂီၢ် တၢ်ထံၣ်ဆိကမိၣ် ဟံၣ်မုၣ်အထူအယိာ်န့ၣ် ဒုးအိၣ်ထီၣ် တၢ်မုၢ်လၢ်အဒိၣ်အအါန့ၣ်လီၤ. ပာ်သူၣ်ပာ်သး လံာ်တၢ်လီၣ်ဖျါ ၂၁:၃-၄ အပူၤ စီၤယိၤဟၣ်ဒုးနဲၣ်ဖျါ ဟံၣ်အသီအံၤ “ဒီးယနၢ်ဟူတၢ်ကလုၢ်သီၣ်ဖးဒိၣ်လၢမူခိၣ်စံးဝဲဒၣ်, ကွၢ်ကွၢ်, ယွၤအဒဲအိၣ်ဒီးပှၤကညီ, ဒီးကစၢ်ကအိၣ်ဝဲဆိးဝဲဒီးအီၤ, “ဒီးအဝဲသ့ၣ်ကမ့ၢ် အပှၤဂီၢ်မုၢ်, ဒီးယွၤ အကစၢ်ဒၣ်ဝဲကအိၣ်ဒီးအီၤ, ဒီးကကဲထီၣ်အကစၢ်လီၤ.- ဒီးယွၤကထွါကွံာ် အမဲာ်ထံခဲလၢာ်လၢ အမဲာ်, ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုးတအိၣ်လၢၤဘၣ်, ဒီးတၢ်ဟီၣ်တၢ်ယၢၤ တအိၣ်လၢၤဘၣ်, ဒီးတၣ်ဘှံးသူၣ်ဘှံးသးတအိၣ်လၢၤဘၣ်, အဂ့ၢ်ဒ်အံၤ, တၢ်အိၣ်လၢအခီၣ်ထံး
တဖၣ်ပူၤကွံာ်လံ” န့ၣ်လီၤ.
ကစၢ်ယ့ၣ်ရှူးအတၢ်ဟဲက့ၤကဒါက့ၤတၢ်ခံဘျီတဘျီန့ၣ် ကပာ်ဖျါဝဲ ကစၢ်ယွၤအတၢ်လီၣ်ဖျါထီၣ်အသးအလၢအပှဲၤ, တၢ်မၤဝံၤဘှါဆှဲ တၢ်လၢအပိာ်ထွဲထီၣ်သးတဖၣ် ခီဖျိလၢတၣ်ဒဲးဘးအဃိ, ဒီးကမၤမုာ်ထီၣ်က့ၤ ကယဲၢ်ပှၤလၢ အဘၣ်တၢ်နးတၢ်ဖှီၣ်ဒီးသူၣ်အုးသးအုးတဖၣ်အဂီၢ်န့ၣ် မ့ၢ်လၢတၢ်သးဘၣ်ဒိဆါတဖၣ်အံၤန့ၣ် ဘၣ်တၢ်က့ၤမၤဂ့ၤမၤဘၣ် တ့ၢ်လံ အဃိန့ၣ်လီၤ.
လံာ်စီဆှံပာ်ဖျါဝဲလၢ ဟီၣ်ခိၣ်ချၢအံၤ သုးဘူးအသးဆူ စိၤဆၢကတီၢ်လၢခံကတၢၢ် လၢအပှဲၤဒီးတၢ်လၤတၢ်ကပီၤအဂ့ၢ် န့ၣ်လီၤ. ဒ်ပသ့ၣ်ညါဝဲအသိး ပကြၢးထံၣ်ဆိကမိၣ် ဟီၣ်ခိၣ်အကတၢၢ်အဂ့ၢ်အံၤဒ်လဲၣ်. ဒီးတၢ်အိၣ်အသး, မၤအသးအံၤ ကြၢးတ့စိးပျၤ ခ့ခါပတၢ်အိၣ်မူအိၣ်ဂဲၤဒ်လဲၣ်.
Bill Crowder | ကိၣ်လၢတနံၤဘၣ်တနံၤ ပှၤကွဲးလံာ်