လါဒံၢ်စ့ဘၢၣ် တၢ်ဂ့ၢ်အခိၣ်တီ | တၢ်လုၣ်ဘၢစိကမီၤဒိၣ်လၢပှၤကညီတဖၣ်အလိၤ
ပှၤကွဲးလံာ် ကၠ့(မ) ဘီ(လ)ဒဝ့ၤ ကွဲးပာ်ဖျါဝဲ “ဖိသၣ်တဖၣ်ကဒိကနၣ်ပှၤ သးပှၢ်အကလုၢ်ဂ့ၤဂ့ၤဘၣ်ဘၣ်န့ၣ် တအိၣ်နီတဘျီဘၣ်ဆၣ်, တၢ်ကဘၣ်မၤလိ, မၤဒိးတၢ်, ဒ်သိးပှၤသးပှၢ်မၤဝဲအဂီၢ်န့ၣ်, မၤဝဲတသ့, တန့ၢ်တအိၣ် နီတဘျီဘၣ်“ န့ၣ်လီၤ.
တၢ်ပာ်ဖျါတထံၣ်အံၤ မ့ၢ်တၢ်ဒုးသ့ၣ်နီၣ်ထီၣ်က့ၤတၢ်ဒ်အမ့ၢ် ပှၤကညီတဖၣ်, တမ့ၢ်ထဲဖိသၣ်သ့ၣ်တဖၣ်ဘၣ်, အဝဲသ့ၣ်မ့ၢ်ဃုထၢဝဲလၢ တပာ်ဒိကနၣ်ဝဲ ပတၢ်စံးကတိၤတၢ်ဆူအဝဲသ့ၣ်ဘၣ်ဆၣ်, ပတၢ်အိၣ်မူအိၣ်ဂဲၤလၢအစံးကတိၤ ပာ်ဖျါထီၣ်တၢ်တဖၣ်န့ၣ် ပှၤအါဂၤမ့ၢ်တတူၢ်လိာ် တသ့ဘၣ်န့ၣ်လီၤ. ပတၢ်အိၣ်မူအိၣ်ဂဲၤ, ပတၢ်ဖံးတၢ်မၤတၢ်တဖၣ် ဂ့ၤမ့ၢ်ဂ့ၤ, အၢမ့ၢ်ဂ့ၤ လုၣ်ဘၢစိကမီၤဒိၣ်လၢ ပှၤဂုၤပှၤဂၤအဖီခိၣ်န့ၣ်လီၤ. ပတၢ်စံးကတိၤအုၣ်အသးတၢ်လၢကစၢ် ယ့ၣ်ရှူးခရံာ်အဂ့ၢ်, မ့ၢ်တလီၤပလိာ်အသးဒီး ပတၢ်အိၣ်မူအိၣ်ဂဲၤ ဘၣ်န့ၣ်ဒီး, တၢ်ကမၤအသးသ့ဝဲဒၣ်လၢ ပှၤဂုၤပှၤဂၤတဖၣ် တမ့ၢ် ကဒိကနၣ် ပတၢ်စံးတၢ်ကတိၤလၢၤဘၣ်န့ၣ်လီၤ. ဒ်န့ၣ်အသိး, ပတၢ်အိၣ်မူအိၣ်ဂဲၤလၢအပာ်ဖျါထီၣ် ကစၢ်ယ့ၣ်ရှူးခရံာ်အတၢ်အဲၣ်န့ၣ်, တၢ်အံၤကသ့လုၣ်ဘၢစိကမီၤဒိၣ်တၢ်လၢ ပှၤတဂၤဂၤအတၢ်ဂ့ၤအဂီၢ်န့ၣ်လီၤ.
လံာ်စီဆှံအပူၤ, တၢ်အဒိအတဲာ်တဖၣ်အိၣ်ပှဲၤဝဲဒီး ပှၤလၢလုၣ်ဘၢစိကမီၤဒိၣ်တၢ်လၢ ပှၤဂုၤပှၤဂၤအဖီခိၣ် ခီဖျိအတၢ်အိၣ်မူအိၣ်ဂဲၤ ဂ့ၤဒိၣ်န့ၢ်ဒ် အတၢ်စံးတၢ်ကတိၤတဖၣ်န့ၣ်လီၤ. မၤတၢ် ၁၆:၁၄-၁၅ အပူၤ, နီၢ်လူၤဒံဒိးဘျၢ အသးလၢထံဝံၤ အဟံၣ်ဖိဃီဖိတဖၣ် စ့ၢ်ကီးလူၤပိာ်ထွဲ ဒိးစူၢ်ဒိးဘျၢအသးန့ၣ်လီၤ. ဆၢဖိ ၂၅-၃၄ အပူၤ ပကထံၣ်ဘၣ် ပှၤဃိာ်ဒိၣ်တဂၤအဂ့ၢ်န့ၣ်လီၤ. ဖဲအထံၣ်ဘၣ် စီၤပီလူးဒီး စီၤစံလၤအတၢ်စံးတၢ်ကတိၤတဖၣ် ဒီးအတၢ်မၤတဖၣ်ဝံၤန့ၣ် ကဲထီၣ်ပှၤစူၢ်က့ၤနာ်က့ၤယ့ၣ်ရှူးခရံာ်န့ၣ်လီၤ. ဖဲဟီၣ်ခိၣ်ဟူးဝးဝဲ သတူၢ်ကလာ် ဒီးဃိာ်အတြဲၤတဖၣ်အိးထီၣ် အသးအဆၢကတီၢ်, ပှၤဃိာ်ဖိတဖၣ်ကဘၣ်ဃ့ၢ်ပူၤဖျဲးအသးအလီၢ်န့ၣ် ဃုထၢဝဲလၢ အကအိၣ်ဒၣ်ဖဲဃိာ်ပူၤန့ၣ်လီၤ.
ယနီၢ်ကစၢ်ဒၣ်ယဲ, ယဘၣ်သူၣ်ဘၣ်သးဒီး စီၤပီလူးအတၢ်ကတိၤဆူစီၤတံၤမသ့းန့ၣ်ဖျါဖဲ ၂ တံၤ ၁:၅ အပူၤန့ၣ်လီၤ. စီၤပီလူးအၢၣ်လီၤ ပာ်ပနီၣ်ဝဲ ပိာ်မုၣ်ခံဂၤလၢအလုၢ်ဒိၣ်ထီၣ်စီၤတံၤမသ့း- လၢအမ့ၢ် မိၢ်နီၢ်အူၤနံဒီး အဖံနီၢ်လိၤအ့ၣ် န့ၣ်လီၤ. စီၤတံၤမသ့းအတၢ်အိၣ်မူဒီတစိၤ ထံၣ်ဘၣ်အဝဲသ့ၣ်အတၢ်စူၢ်တၢ်နာ် လၢညီနုာ်တၢ်အိၣ်မူအိၣ်ဂဲၤတနံၤဘၣ် တနံၤအပူၤဃုာ်ဒီး တၢ်ဂ့ၢ်တၢ်ကျိၤလီၤလီၤဆီဆီတဖၣ်အပူၤစ့ၢ်ကီးန့ၣ်လီၤ. အမိၢ်ဒီးအဖံတဖၣ်အတၢ်စူၢ်တၢ်နာ်န့ၣ် လုၣ်ဘၢစိကမီၤဒိၣ်ဝဲလၢစီၤတံၤမသ့းအလိၤန့ၣ် ပသမၢအလီၢ်တအိၣ်ဘၣ်န့ၣ်လီၤ.
လၢကစၢ်ယွၤအဂီၢ်, လၢပကစၢ်ဒၣ်ဝဲအဂီၢ်, ဒီးပှၤလၢအခိးကွၢ်ထံပှၤတဖၣ်အဂီၢ်, ပတၢ်အိၣ်မူအိၣ်ဂဲၤဒ်လဲၣ် ဒ်လဲၣ်န့ၣ် မ့ၢ်တၢ်လၢအကါဒိၣ်ဝဲဒၣ်န့ၣ်လီၤ. ပှၤကညီတဖၣ် တမ့ၢ်ပှၤလၢကလူၤထွဲမၤထွဲ ပတၢ်စံးတၢ်ကတိၤဘၣ်ဆၣ်, သပှၢ်တၢၢ်န့ၣ်, အဝဲသ့ၣ်ကမၤဒိး ကမၤထွဲ တၢ်လၢပမၤတဖၣ်သ့ဝဲဒၣ်န့ၣ်လီၤ.
Katara Patton, ကိၣ်လၢတနံၤဘၣ်တနံၤအပှၤကွဲးလံာ်