လါနိၣ်ဝ့ဘၢၣ် တၢ်ဂ့ၢ်အခိၣ်တီ | တၢ်မၤတၢ်ဆၢတဲာ်ပာ်လီၤသး
ဖၠၣ်စိမိၤလၢမုၢ်နုာ်တၢ်လီၢ်ကဝီၤအခၢၣ်သးတဖျၢၣ်န့ၣ်ဆဲးကျိးတၢ်ဆူယဝၤအအိၣ်ခီဖျိ စိၣ်ရှဲၣ် မံၣ်ဒယၣ် (Social Media) အဃိ ယဝၤန့ၣ် ဆှၢလီၤဝဲလံာ်ပတံထီၣ်တၢ်လၢတၢ်ဖံးတၢ်မၤအဂီၢ်န့ၣ်လီၤ. ဝံၤ အဝဲ စံးဘၣ်ယၤ “ပမ့ၢ် တလဲၤဘၣ်ဒီး ကစၢ်ယွၤကကးတံာ်ဃးတြဲၤန့ၣ်လီၤ.” ဖဲန့ၣ်ယစံးဘၣ်အီၤလၢ, “နစံးတၢ်အံၤန့ၣ်တမ့ၢ်တၢ်လၢအဘၣ် ကိးဘျီဒဲးအဂီၢ်ဘၣ်, တဘျီတခီၣ်န့ၣ်, ကစၢ်ယွၤပျဲပှၤလၢ ပကကွၢ်ထံဆိကမိၣ်တၢ် ဖဲလၢပမၤတၢ်ဆၢတဲာ်ပာ်လီၤသး အကတီၢ်န့ၣ်လီၤ.”
ပထုကဖၣ်တၢ်လၢ တဂၤအလီၢ်တဂၤအလီၢ်ဒၣ်ဝဲဒီးစံးကတိၤသကိး တၢ်လၢကဟဲကဲထီၣ်အသးသ့တဖၣ် ဘၣ်ထွဲဒီး တၢ်ဂံၢ်ဆူၣ်ဒီး တၢ်ဂံၢ်စၢ်တဖၣ်န့ၣ်လီၤ. လၢခံတလါအတီၢ်ပူၤန့ၣ် ပလဲၤဆူတၢ်လီၢ်ဖဲန့ၣ်လီၤ. ယသးသယုၢ် ယဟံၣ်ဒီး ပတၢ်သုးလီၢ်သုးကျဲတဘျီအံၤ လၢယဂီၢ်အခီပညီတအိၣ်ဘၣ်ဆၣ်, ယသ့ၣ်ညါဘၣ်လၢ ကစၢ်ယွၤအဲၣ်ဒိး ပအိၣ်ဆိးလၢ တၢ်လီၢ်အံၤအဃိ, မ့ၢ်ပမၤတၢ်ဆၢတဲာ်ပာ်လီၤသး လၢအဘၣ်န့ၣ်လီၤ.
ဖဲပမၤတၢ်ဆၢတဲာ်ပာ်လီၤသးတလီၢ်လီၢ်န့ၣ် ဖျါလၢအခီပညီမ့ၢ်တအိၣ်ဘၣ်ဆၣ်, လၢခံန့ၣ်ဒီး တၢ်လီၢ်လၢ ကစၢ်ယွၤအဲၣ်ဒိးဝဲလၢ ပကအိၣ်ဆိးတၢ်အဂီၢ်န့ၣ် ပကဘၣ်ဆၢတဲာ်ပာ်လီၤပသးသပှၢ်တၢၢ်လီၤန့ၣ် ကဲထီၣ်တၢ်အုၣ် အသးလၢပဂီၢ်န့ၣ်လီၤ. ပသုးလီၢ်သုးကျဲဒီး အိၣ်ဆိးလၢ ဝ့းကိၣ်စ့ၣ် (Wisconsin) န့ၣ်မ့ၢ်တၢ်မၤအသးဒ်သိးအံၤန့ၣ်လီၤ. လၢပတၢ်ဆၢတဲာ်ပာ်လီးသးအပတီၢ်တဖၣ်အပူၤန့ၣ် တၢ်ပာ်ထီၣ်ထီသးအဂီၢ် အလီၢ်တအိၣ်ဘၣ်န့ၣ်လီၤ.
လံာ်ယၤကိာ် ၁:၂-၃ အပူၤ တၢ်မၢဖိစီၤယၤကိာ်စံးဘၣ်ပှၤ, လၢတၢ်မၤကွၢ်ပတၢ်စူၢ်တၢ်နာ်အဂီၢ်န့ၣ် ပကဘၣ် ကွၢ်ဆၢၣ်မဲာ်ဒီး တၢ်လ့ပစီအကလုာ်ကလုာ်န့ၣ်လီၤ. အဆၢဖိ ၄ အပူၤ အဝဲဆှၢနုာ်တၢ်ကတိၤဘၣ်ထွဲဒီး တၢ်ဆၢတဲာ်ပာ်လီၤသး အပတီၢ်တဖၣ်လၢ ကကဲထီၣ် တၢ်မၤလၤကပီၤယွၤဒီး ကမၤအါထီၣ် တၢ်ဝံသးစူၤအဂ့ၢ်န့ၣ်လီၤ. အဆၢဖိ ၅ အပူၤ စံးဘၣ်ပှၤ, ပမ့ၢ်တအိၣ်ဒီးတၢ်ကူၣ်သ့ကူၣ်ဘၣ်န့ၣ် ဂ့ၤပ“ဃ့လၢယွၤ, လၢအဟ့ၣ်တၢ်ညီလၢပှၤခဲလၢာ်ဒီး တဒုၣ်ဒွဲၣ်ဘၣ်တၢ်ဘၣ်န့ၣ်တက့ၢ်“ န့ၣ်လီၤ. ဆၢဖိ ၆ စံးဘၣ်ပှၤလၢ ပမ့ၢ်ဃ့ထုကဖၣ်တၢ်န့ၣ် “မ်အဃ့တၢ်လၢ တၢ်နာ်တက့ၢ်. မ်အသးသုတဒ့ဒီနီတမံၤတဂ့ၤ. အဂ့ၢ်ဒ်အံၤ, ပှၤလၢအသးဒ့ဒီန့ၣ်မၤအသး ဒ်ပီၣ်လဲၣ်လပီလၢကလံၤအူ ဘၣ်အီၤ, ဒီးဟူးဝးဝဲအသိးန့ၣ်လီၤ.” ဖဲပအိၣ်ဒီးတၢ်သးဒ့ဒီအကတီၢ်န့ၣ်, ပသးကဒံကဒါဝဲလၢ တၢ်နာ်ယွၤဒီး တၢ်နာ် လီၤက့ၤပတၢ်သ့တၢ်ဘၣ်တဖၣ်အဘၢၣ်စၢၤန့ၣ်လီၤ. မ့ၢ်ဒၣ်ပတၢ်သးဒ့ဒီလၢ ကစၢ်ယွၤအတၢ်တီတၢ်လိၤဒီး အတၢ်ဂ့ၤ တၢ်ဝါအလိၤန့ၣ်လီၤ.
ဖဲပမၤတၢ်ဆၢတဲာ်ပာ်လီးသးဒိၣ်မ့ၢ်ဂ့ၤ, ဆံးမ့ၢ်ဂ့ၤန့ၣ်, တၢ်မၤဘၣ်ထွဲ,ဘျးစဲလိာ်သးဒီးကစၢ်ယွၤတပယူၢ်ဃီန့ၣ် မ့ၢ်ခီၣ်ခါဆိ ဒ်သိး ပကဒိၣ်ထီၣ်အါထီၣ်လၢ တၢ်ကူၣ်သ့ကူၣ်ဘၣ်ဒီး နီၢ်သးအတၢ်ဒိၣ်တုာ်ခိၣ်ပှဲၤအဂီၢ်န့ၣ်လီၤ. ဒ်ပလူၤ ပိာ်ထွဲကစၢ်ယွၤအတၢ်နဲၣ်ဆှၢပှၤ, ခီဖျိလၢသးစီဆှံမၤလၢမၤပှဲၤ ပတၢ်သူၣ်ဒူသးဒူဃုာ်ဒီး တၢ်နာ်န့ၢ်လီၤသးလၢကစၢ်ယွၤ အကတီၢ်, ထီဘိန့ၣ်ကစၢ်ယွၤ ကတဲာ်ကတီၤန့ၢ်ပှၤ အတၢ်ရဲၣ်တၢ်ကျဲၤအလၢအပှဲၤ, လၢတၢ်ဆၢကတီၢ်ကိးဆၢ ကိးကတီၢ်ဒဲးအပူၤဒီး လၢအလီၤပလိာ်သးဒီးလံာ်စီဆှံအတၢ်ပာ်ဖျါတဖၣ်န့ၣ်လီၤ.
Xochitl Dixon | ကိၣ်လၢတနံၤဘၣ်တနံၤအပှၤကွဲးလံာ်