လါအီးကထိဘၢၣ် တၢ်ဂ့ၢ်အခိၣ်တီ | နီၢ်သးအတၢ်ဒိၣ်တုာ်ခိၣ်ပှဲၤ
လၢယနီၢ်ဆံးအဆၢကတီၢ်, ခလဲး(ဒ) (Clyde) မ့ၢ်ဆၣ်နဲၣ်ကျဲလၢယဂီၢ်န့ၣ်လီၤ. အဝဲမ့ၢ်ပှၤလိာ်ကွဲ ဖျၢၣ်ဂုာ်ကွံာ် စဲၣ်နီၤတဂၤလၢအခီလ့ၣ်ကၠိ ပှၤလိာ်ကွဲတၢ်အကျါန့ၣ်လီၤ. ယလိာ်ကွဲစ့ၢ်ကီး ဂ့ၢ်ကွီၤ ပှၤလိာ်ကွဲလၢယီၢ်ဒ့န့ၣ်လီၤ. ဘၣ်ဆၣ် ခလဲး(ဒ) အတၢ်ဂ့ၤတဖၣ်အိၣ်အါမးန့ၣ်လီၤ. ကျိၤကျဲတဖၣ်လၢ စံးကတိၤတၢ်, ဟူးဂဲၤဖံးမၤတၢ်, ဒီးအတၢ် ရ့လိာ်ဘၣ်ထွဲလိာ်သးဒီးပှၤဂုၤပှၤဂၤတဖၣ်န့ၣ် ထုးန့ၢ်ယသးနီၢ်နီၢ်န့ၣ်လီၤ. ခလဲး(ဒ) ဆဲးကပီၤဖျါဝဲ ကစၢ်ယ့ၣ်ရှူး အတၢ်အဲၣ်, ဒီးကျိၤကျဲတဖၣ်န့ၣ်လီၤ.
ဖဲယဆိကမိၣ်ထီၣ် ခလဲး(ဒ) အဂ့ၢ်န့ၣ်, ယဘၣ်တၢ်ဒုးသ့ၣ်နီၣ်ထီၣ်က့ၤယၤလၢ, တၢ်ဒိၣ်တုာ်ခိၣ်ပှဲၤဒီး, တၢ်စူၢ်တၢ်နာ်ဒိၣ်ထီၣ်အါထီၣ်လၢ ကစၢ်ယ့ၣ်ရှူးခရံာ်အပူၤ စံးတၢ်န့ၣ် ကလီၤဂာ်ဒီးတၢ်မနုၤလဲၣ်အဂ့ၢ်န့ၣ်လီၤ. နီၢ်သးအတၢ်ဒိၣ်တုာ်ခိၣ်ပှဲၤလၢ ပဝဲခဲလၢာ်အဂီၢ် စီၤပ့းတရူးပာ်ဖျါဝဲဆှဲဆှဲဖိ လၢအတၢ်ကွဲး ခံဘ့ၣ်တဘ့ၣ်အပူၤန့ၣ်လီၤ.
- နီၢ်သးအတၢ်ဒိၣ်တုာ်ခိၣ်ပှဲၤ အဂံၢ်ထံးန့ၣ်မ့ၢ်ဒၣ် ယ့ၣ်ရှူးန့ၣ်လီၤ. ပှၤလၢအအိၣ်ဒီးတၢ်စူၢ်တၢ်နာ် လၢအဒိၣ်တုာ်ခိၣ်ပှဲၤတဂၤန့ၣ် သ့ၣ်ညါနၢ်ပၢၢ်ဝဲ ဒ် ၂ပ့း ၁:၃-၄ စံးဘၣ်ပှၤအသိး, တၢ်အံၤမ့ၢ် “ယွၤအစိကမီၤ” ဒီး “အတၢ်စံးပာ်တဖၣ်“ လၢကမၤစၢၤပှၤ ကျိၤကျဲလၢပကအိၣ်မူမၤလၤကပီၤယွၤအဂီၢ်န့ၣ်လီၤ. ဖံ ၂:၁၅ ပာ်ဖျါဝဲ ယွၤအသးစီဆှံကတဲာ်ကတီၤန့ၢ်ပှၤတၢ်လၢပလိၣ်, ဒ်သိးပက ကပီၤထီၣ်တၢ်လၢကစၢ်ယွၤအဂီၢ်, ပကမ့ၢ် ဒ်ဆၣ်လၢမုၢ်နၤတၢ်ခံးယိာ် အဆၢကတီၢ်ဒီး (ကွၢ်လၢ ယိၤ ၃:၆, ၂ကရံၣ်၅:၁၂, ၁ ပ့း ၁:၂၂-၂၃ စ့ၢ်ကီးတက့ၢ်.) ယွၤအသးစီဆှံဆှၢ ဘူးထီၣ်ပှၤ ဒ်သိးပကလဲၤတၢ်ဒီးယ့ၣ်ရှူးခရံာ်လၢ တၢ်ဆီၣ်လီၤသးအပူၤ, ဒီးကယဲၢ်အတၢ်မၤခဲလၢာ်အဂီၢ် ပသးပူၤ ကပှဲၤလုာ်ကွံာ်ဝဲလၢ တၢ်စံးဘျူးစံးဖှိၣ်ကစၢ်ယွၤန့ၣ်လီၤ.
- နီၢ်သးအတၢ်ဒိၣ်တုာ်ခိၣ်ပှဲၤလီၣ်ဖျါထီၣ်အသးလၢ ပတၢ်အိၣ်မူအိၣ်ဂဲၤ ဒ်လဲၣ်ဒ်လဲၣ်အပူၤန့ၣ်လီၤ. ၂ ပ့း ၁:၅-၉ စံးဘၣ်ပှၤဖဲလၢ ယ့ၣ်ရှူး မၤဒိၣ်ထီၣ်အါထီၣ် ပတၢ်စူၢ်တၢ်နာ်အဆၢကတီၢ်, နီၢ်သးအတၢ်ဒိၣ်တုာ်ခိၣ်ပှဲၤန့ၣ် ဟဲအိၣ်ဖျါထီၣ်လၢ ပစံးကတိၤတၢ်ဒီး ပဟူးဂဲၤဖံးမၤတၢ်ဒ်လဲၣ်, ဒီးကယဲၢ်ပတၢ်မ့ၢ်တၢ်ခဲလၢာ်အပူၤန့ၣ်လီၤ. ဆၢဖိ ၅ ပာ်ဖျါဝဲ တၢ်မၤအသးအံၤကဒုးနဲၣ်ဖျါက့ၤ ပတၢ်စူၢ်တၢ်နာ် ဒိၣ်ထီၣ်အါထီၣ်လၢ ယွၤဃုာ်ဒီးအတၢ်တိာ်ကျိၤကျဲ တဖၣ်, ဆၢဖိ ၆ ပာ်ဖျါဝဲလၢ ပကအိၣ်ဒီးတၢ်အိၣ်မူလုၢ်လၢ်လၢအလီၤဂာ်ဒီးခရံာ် ဒ်အမ့ၢ် လၢတၢ်မၤကွၢ်တဖၣ် အဆၢကတီၢ် ပကအိၣ်ဒီးတၢ်ကီၤသူၣ်ကီၤသး, တၢ်ဝံသးစူၤ, ဒီးဆၢဖိ ၇ ပာ်ဖျါဝဲလၢ ပကလဲၤတၢ်ဒီးယွၤ လၢတၢ်ဒိကနၣ်, လၢတၢ်အဲၣ်တၢ်ကွံ, ဒီးလၢတၢ်အဲၣ်ပုၢ်အဲၣ်ဝဲၢ်အပူၤန့ၣ်လီၤ. တၢ်အိၣ်မူလုၢ်လၢ်ဒ်သိးအံၤန့ၣ်ကမ့ၢ် တၢ်ဟ့ၣ်ခီဟ့ၣ်နီၤလီၤ ပတၢ်စူၢ်တၢ်နာ်လၢ အကထုးန့ၢ်ပှၤအသးန့ၣ်လီၤ.
တဘျီန့ၣ် ခလဲး(ဒ) အတၢ်အိၣ်မူကဲထီၣ်တ့ၢ်တၢ်ကွၢ်လိလၢယဂီၢ်အသိး, ပတၢ်စူၢ်တၢ်နာ်မ့ၢ်ဒိၣ်ထီၣ်အါထီၣ် န့ၣ်ဒီး တၢ်မၤအသးအံၤ ကသ့မၤစၢၤတၢ်လၢ ပှၤဂုၤပှၤဂၤစ့ၢ်ကီး ကကဲထီၣ်တၢ်ကပီၤလၢယ့ၣ်ရှူးအဂီၢ်န့ၣ်လီၤ. ပနီၢ်သးအတၢ်ဒိၣ်တုာ်ခိၣ်ပှဲၤ ကဒိၣ်ထီၣ်အါထီၣ်အဂီၢ် ယ့ၣ်ရှူးမၤစၢၤပှၤအသိး, အလီၢ်အိၣ်လၢ ပကမၤကပီၤ အါထီၣ် ယ့ၣ်ရှူးအကျိၤကျဲတဖၣ်န့ၣ်လီၤ. ပကလီၤဂာ်အါထီၣ်, အါထီၣ်ဒီး ယ့ၣ်ရှူးခရံာ်, လၢအမ့ၢ် ပဆၣ်နဲၣ်ကျဲနီၢ်နီၢ်တဂၤအသိးန့ၣ်တက့ၢ်.
Bill Crowder | ကိၣ်လၢတနံၤဘၣ်တနံၤ ပှၤကွဲးလံာ်
တၢ်ဒိၣ်ထီၣ်ထီထီၣ်လၢ တၢ်စူၢ်တၢ်နာ်အပူၤ, ဒီးတုၤထီၣ်,ထီၣ်ဘးဆူ နီၢ်သးအတၢ်ဒိၣ်တုာ်ခိၣ်ပှဲၤ လၢကစၢ်ယ့ၣ်ရှူးခရံာ် အပူၤစံးတၢ်န့ၣ် ကမ့ၢ်တၢ်အခီပညီမနုလဲၣ်. တလါအံၤ, ပကမၤလိဆိကမိၣ်သကိး တၢ်လၢနီၢ်သးအတၢ်ဒိၣ်တုာ်ခိၣ်ပှဲၤ စံးတၢ်န့ၣ် ကဖျါလီၤဂာ်ဒီးတၢ်မနုလဲၣ်, ဒီးပကသ့ၣ်ညါ, ကလၢၢ်ဘၣ်အီၤကသ့ဒ်လဲၣ်အဂ့ၢ်န့ၣ်လီၤ. ဘၣ်ထွဲဒီး လါအီးကထိဘၢၣ် တၢ်ဂ့ၢ်အခိၣ်တီ “နီၢ်သးအတၢ်ဒိၣ်တုာ်ခိၣ်ပှဲၤ” အဂ့ၢ်န့ၣ် ဘၣ်တၢ်ပာ်ဖျါအါထီၣ်စ့ၢ်ကီးလၢ လါအီးကထိဘၢၣ် ၁, ၉, ၁၆, ဒီး ၂၃သီ တၢ်ကွဲးတဖၣ်အပူၤန့ၣ်လီၤ.