လါယနူၤအါရံၤ တၢ်ဂ့ၢ်အခိၣ်တီ | တၢ်အုၣ်က့ၤခီၣ်က့ၤ
ကၠိ(Joe)တဂၤ ဘၣ်တၢ်တ့ၢ်နုာ်အီၤဆူဃိာ်ပူၤဝံၤန့ၣ် အသးပူၤတူၢ်ဘၣ်ဝဲ ဒ်အတၢ်အိၣ်မူ ကတၢၢ်လံန့ၣ်လီၤ. အဝဲမၤကမၣ်တၢ်န့ၣ် ဒိၣ်တလၢအဃိ, အဲၣ်ဒိးဃုထံၣ်န့ၢ်ကျဲ (ကမၤသံလီၤ အသး) လၢကမၤဟါမၢ် အတၢ်ကမၣ်ခဲလၢာ်အဂီၢ်န့ၣ်လီၤ
. အပူၤကွံာ် မုၢ်နံၤတဖၣ်န့ၣ်, ကၠိအီသံးမူၤဒီး နီၣ်သိလ့ၣ်အဆၢကတီၢ်န့ၣ်, လဲၤနုာ်လီၤဘျၢၣ်သံဘၣ်ဝဲ ဖိသၣ်မုၣ်, မုၣ်လိၣ်ဘိ တဂၤန့ၣ်လီၤ. ဖဲအဝဲဆ့ၣ်နီၤအိၣ်လၢဃိာ်ပူၤ, အသးပူၤပှဲၤလုၣ်ကွံာ်ဝဲဒၣ်ဒီး တၢ်သးအုး, တၢ်သးဘၣ်ဒိလၢ အမၤတ့ၢ်ဘၣ်ဝဲန့ၣ်လီၤ.
လၢတၢ်သမံသမိး, တၢ်ကစံၣ်ညီၣ်တဲာ်အီၤအဂီၢ် ဘၣ်အိၣ်ခိးဝဲအဆၢကတီၢ်, ပာ်လီၤအသးလၢ, အတၢ်အိၣ်မူအဂီၢ် ကဟ့ၣ်ဝဲတၢ်ခွဲးတၢ်ယာ် လၢခံတဘျီန့ၣ်လီၤ. ဒ်သိးကဒိးန့ၢ်တၢ်မၤစၢၤလၢ အတၢ်အီသံးအီဂာ် တၢ်ဂ့ၢ်ကီအဂီၢ် အဝဲဟ့ၣ်လီၤအမံၤဆူတၢ်ကရၢကရိလၢ ကတဲာ်ကတီၤန့ၢ်တၢ်လၢပှၤဒ်သိးအီၤအဂီၢ် န့ၣ်လီၤ. ဖဲန့ၣ်တၢ်လၢအဃုထံၣ်န့ၢ်ဝဲဒီး ဃာ်လိၤက့ၤအတၢ်အိၣ်မူန့ၣ် မ့ၢ်ဒၣ်အနၢ်ဟူဘၣ်ဝဲ တၢ်သးခုကစီၣ် ဒီးဒိးန့ၢ် ကစၢ်ယ့ၣ်ရှူး ဒ်အမ့ၢ်တၢ်အုၣ်က့ၤခီၣ်က့ၤတၢ်ကစၢ်န့ၣ်လီၤ. တၢ်မၤဘၣ်လိာ်ဘၣ်စးက့ၤတၢ်ဒီး တၢ်ပျၢ်တၢ်ဒဲးဘးအမ့ၢ်အတီန့ၣ်ဟ့ၣ်ထီၣ် ကၠိလၢ တၢ်ရ့လိာ်သးဒီး ကစၢ်ယ့ၣ်ရှူးခရံာ်အဃိဒီး ဒုးအိၣ်ထီၣ်တၢ်မုၢ်လၢ်အသီလၢအဂီၢ် န့ၣ်လီၤ.
ဖဲတၢ်သမံသမိးဟဲတုၤဃီၤဒီးဖျါလၢ ကၠိမၤကမၣ်တၢ်ဒီး ပိာ်မုၣ်မုၣ်လိၣ်ဘိ ဘၣ်သံဝဲအဃိ, ဘၣ်တၢ်စံၣ်ညီၣ်အီၤလၢ အကဘၣ်လီၤဃိၣ် တဆံခံနံၣ်န့ၣ်လီၤ. ဖဲဘၣ်လီၤဃိာ်အဆၢကတီၢ်, တသ့ဖဲအသ့န့ၣ် ကၠိမၤတၢ် လၢပှၤလီၤဃိာ်အဂၤတဖၣ်အဂီၢ်, ဒီးဟ့ၣ်ခီဟ့ၣ်နီၤလီၤဝဲ တၢ်သးခုကစီၣ် ဘၣ်ဃးဒီး ကစၢ်ယ့ၣ်ရှူးအတၢ်အဲၣ်ဒီး အတၢ်ပျၢ်တၢ်ဒဲးဘးအဂ့ၢ်န့ၣ်လီၤ. အကတၢၢ်န့ၣ်ကၠိ ဘၣ်လီၤ ဃိာ်အနံၣ်ပှဲၤထီၣ်ဒီး ဘၣ်တၢ်ပျၢ်လီၤအီၤအဆၢကတီၢ်, အဝဲဃ့တၢ်ခွဲးလၢကထံၣ်လိာ်သးဒီး ပိာ်မုၣ်ဖိလၢအသံတဂၤအဟံၣ်ဖိဃီဖိတဖၣ်န့ၣ်လီၤ. ဖဲပိာ်မုၣ်ဖိ အပၢ်,အမိၢ်ဒီးအဒီပုၢ်ဒီဝဲၢ်တဖၣ် အသးကလၢၢ်ဘၣ်ဝဲလၢ ကၠိန့ၣ်ကဲထီၣ်ပှၤလၢ အတၢ်အိၣ်မူလဲလိာ်တ့ၢ်လံအဃိ, ဟံၣ်ဖိဃီဖိတဖၣ်ပျၢ်အတၢ် ကမၣ် လၢအဒုးသံတ့ၢ်လံပှၤလၢအအဲၣ်ဘၣ်ဝဲအဃိ ကဲထီၣ်တၢ်ကမၢကမၣ်လၢကၠိအဂီၢ်န့ၣ်လီၤ.
ဖဲပဃုထံၣ်န့ၢ် ယ့ၣ်ရှူးအတၢ်ပျၢ်ကတၢ်ဒဲးဘးန့ၣ်ဒီး ကွၢ်ဆိကမိၣ်တၢ်ဆီတလဲအဒိၣ်အယိာ် လၢဟဲအိၣ်ထီၣ်ကဲထီၣ်အသးအဂ့ၢ်, လၢ၂ကရံၣ် ၅:၁၇ အပူၤ စီၤပီလူးစံၣ်တဲၤတဲလီၤဝဲ, “တၢ်လီၢ်လံၤ တဖၣ်ပူၤကွံာ်ဝဲ,ကွၢ်ကွၢ် တၢ်ခဲလၢာ်ကဲလၢအသီလံ”န့ၣ်လီၤ. လၢတၢ်အိၣ်မူအသီအံၤန့ၣ် ဆၢဖိ ၁၈ ပာ်ဖျါဝဲလၢ ပကဒိးန့ၢ်တၢ်မၤဘၣ်လိာ် ဘၣ်စးက့ၤတၢ်ဒီးယွၤ,အစိအကမီၤ, ဒီး ဆၢဖိ ၁၉ စံးဘၣ်ပှၤ တၢ်မၤဘၣ်လိာ်ဘၣ်စးက့ၤ တၢ်အစိအကမီၤအံၤ ကဆီတလဲကွံာ် တၢ်တဂ့ၤတဝါလၢပတၢ်အိၣ်မူအပူၤ ဒ်သိးတၢ်မုၢ်လၢ် လၢအအၢၣ်လီၤတ့ၢ်ဝဲန့ၣ်လီၤ. တၢ်တဖၣ် မ့ၢ်မၤအသးဝံၤန့ၣ်ဒီး ဆၢဖိ ၂၀ ပာ်ဖျါဝဲလၢ ပရၤလီၤတၢ်မၤဘၣ်လိာ်ဘၣ်စးက့ၤတၢ်အဂ့ၢ် အတၢ်ကစီၣ်ဆူ ပှၤဂုၤပှၤဂၤအိၣ်သ့ဝဲဒၣ်န့ၣ်လီၤ.
ဖဲပတူၢ်လိာ် တၢ်ပျၢ်တၢ်ဒဲၤဘးဒီး တၢ်မၤဘၣ်လိာ်ဘၣ်စးက့ၤတၢ် လၢကစၢ်ယ့ၣ်ရှူးဟ့ၣ်ကလီပှၤဝံၤန့ၣ်ဒီး အပူၤကွံာ် တၢ်ပျံၤတၢ်ဖုးတဖၣ် ဃုာ်ဒီး ပတၢ်ဝံဃၢအဒိၣ်အယိာ်တဖၣ်အလီၢ်န့ၣ်, တၢ်မုၢ်လၢ်အသီကအိၣ်ထီၣ်ဝဲဒၣ် န့ၣ်လီၤ.
Dave Branon ၊ ကိၣ်လၢတနံၤဘၣ်တနံၤအပှၤကွဲးလံာ်