လၢ၂၀၁၅ နံၣ် လါနိၣ်၀့ဘၢၣ်အပူၤန့ၣ်‚ ယသ့ၣ်ညါ လၢယကဘၣ်တၢ်ကွဲးကါမၤဘျါ ယသးအတၢ်ဆါလီၤႉ လၢတၢ်ကမၢကမၣ်ဒီးတၢ်ကနိးကစုာ်အပူၤ‚ ယဆိကမိၣ်လၢ ယသံသ့န့ၣ်လီၤႉ မ့ၢ်တၢ်မၤလိၤမၤဘၣ်က့ၤ တၢ်ရၠာစး့လိာ်ဘၣ်ထွဲ အတဂ့ၤတဘၣ်တဖၣ် အိၣ်ဧါႉ မ့ၢ်တိၢ်စ့လၢယကဘၣ်မၤလၢပှဲၤထီၣ် လၢယဒူၣ်ဖိထၢဖိအဂီၢ်အိၣ်ဧါႉ တၢ်ကွဲးကါ မၤဘျါတၢ် မ့ၢ်လဲၤအသးဂ့ၤဂ့ၤဒၣ်လဲာ်‚ ယမၤက့ၤတၢ်မၤကကဲအဂီၢ် ကလိၣ်ဒံး၀ဲအဃိ မ့ၢ်တၢ်မၤလၢ ဘၣ်မၤ၀ံၤဆိ အိၣ်ဧါႉ တၢ်မၤလၢပထုးဆၢကတီၢ်တသ့န့ၣ် ဘၣ်မၤဒ်လဲၣ်ႉ ယ့ကၢးဟ့ၣ်ခီလီၤမူဒါ ဆူမတၤတဂၤအအိၣ်လဲၣ်‚ မ့ၢ် ဆၢကတီၢ် လၢဘၣ်မၤတၢ်ဒီး ဘၣ်ထုကဖၣ်တၢ်န့ၣ်လီၤႉ
ယနီၢ်ခိလီၤဘှံးဒီး ယနီၢ်သးလီၤဘှါဒိၣ်မးလီၤႉ တၢ်မၤဆံးကိာ်အညီအဘှါဒၣ်လဲာ် လီၤဂာ်ဒ်ယကမၤအီၤအဂီၢ် ဂံၢ်ဘါတအိၣ်ဘၣ်လီၤႉ ဖဲယကျဲးစၢးထုကဖၣ်တၢ်န့ၣ်‚ ယတၢ်ဆိကမိၣ်လီၤထွံကွံာ် ဆူတၢ်တမုာ်တလၤအပူၤ ဒီးမ့ၢ်၀ဲလၢ ယသးအတၢ်ဆါအဃိ‚ ယသါတလၢသါ ဒီးမံဘၣ်ယသးစ့ၢ်ကီးလီၤႉ တၢ် သးတံးတာ်ဘၣ်ယၤလီၤႉ ယမၤတၢ်တကဲ‚ ယွၤကဒုးမူယၤဒီးဟ့ၣ်အါထီၣ် ဆၢကတီၢ်‚ ဒ်သိးယကအိၣ်ဘၣ်ဒီးဒူၣ်ဖိထၢဖိဒၣ်လဲၣ်န့ၣ် ယဃ့ထုကဖၣ်တကဲဘၣ် န့ၣ်လီၤႉ
ယထုကဖၣ်တၢ် တန့ၢ်တကဲတမံၤန့ၣ် မၤတံးတာ် ယသးဒိၣ်ကတၢၢ်လီၤႉ ဘၣ်ဆၣ် ဒ်ကယဲၢ်ဟီၣ်ခိၣ်ဖိခဲလၢာ် လိၣ်ဘၣ်၀ဲအသိးန့ၣ်‚ တၢ်ဘၣ်တ့ကစၢ် သ့ၣ်ညါ တၢ်မၤသးဒီးယၤန့ၣ်လီၤႉ လၢခံန့ၣ် ယသ့ၣ်နီၣ်က့ၤ လၢတၢ်အိၣ်မူအပူၤ ယွၤကတဲာ် ကတီၤ ကျဲခံဘိလၢ တၢ်ကဲထီၣ်အသးဒ်န့ၣ်န့ၣ်လီၤႉ တၢတမံၤ‚ မ့ၢ်သးမုၢ်စီဆှံ အတၢ်ထုကဖၣ်လၢပဂီၢ်ဖဲ ပဘါထုကဖၣ် တကဲအခါ (ရၠာစးိ ၈း၂၆) ႉ ဒီးခံမံၤတမံၤ‚ မ့ၢ်ပှၤအဂၤတဖၣ် အတၢ်ထုကဖၣ်လၢပခၢၣ်စးလီၤ (ယၤ ၅း၁၆‚ ကလၤ ၆း၂) ႉ
ယသ့ၣ်ညါလၢ သးစီဆှံကစၢ်ဒၣ်လဲဲာ် ဆှၢထီၣ် ယတၢ်ကိၢ်ဂီၤဆူ ပၢ်ယွၤမဲာ်ညါန့ၣ်‚ မၤမုာ်ယသးမးလီၤႉ တုၤယနၢ်ဟူလၢ တံၤသကိးဒီး ဒူၣ်ဖိထၢဖိတဖၣ် ထုကဖၣ်လၢယဂီၢ်‚ မ့ၢ်တၢ်ဟ့ၣ်အဂ့ၤတမံၤလီၤႉ ၀ံၤဒီး တၢ်လီၤကမၢကမၣ်အဂၤ ဟဲပၢၢ်ထီၣ်လီၤႉ တုၤသကိး ဒီး ဒူၣ်ဖိထၢဖိသ့ၣ် သံကွၢ်ယၤ ဘၣ်ထုကဖၣ် တၢ်ဂ့ၢ်မနုၤလဲၣ်န့ၣ်‚ တၢ်မၤအသးအိၣ်ဖျါ ့တၢၢ်ကလာ် လၢယတၢ်စံးဆၢက့ၤန့ၣ် မ့ၢ်တၢ်ထုကဖၣ်လၢ ယွၤနၢ်ဟူ စ့ၢ်ကီးန့ၣ်လီၤႉ
ဆၢကတီၢ်လၢ တၢ်မၤအသးတဖၣ် မ့ၢ်မနုၤမနုၤ တလီၤတံၢ်အခါဒီး ဖဲပဆိကမိၣ် ပကိးထီၣ်ယွၤတန့ၢ်အခါ‚ တၢ်မၤသ့ၣ်နီၣ်ထီၣ်ပှၤလၢ ကစၢ်ယွၤနၢ်ဟူ ပသးအတၢ် ကတိၤန့ၣ်‚ မ့ၢ်တၢ်ဘျုးတၢ်ဟ့ၣ်တမံၤ န့ၣ်လီၤႉ