ပိာ်မုၣ်တဂၤသးအိၣ်ဘါထုကဖၣ်တၢ် ဒီးဟံးဖီၣ်ထီၣ်လီၢ်ဆ့ၣ်နီၤလီၤဟိတဖျၢၣ်ဒီး တီၤလီၤ၀ဲလၢ လီၤဆ့ၣ်နီၤအမဲာ်ညါန့ၣ်လီၤႉ လၢမဲာ်ထံမဲာ်နိအပူၤ‚ အ၀ဲစံး‚ ‘‘ပၢ်သးဘိယွၤဧၢ‚ ၀ံသးစူၤဆ့ၣ်နီၤ ဖဲအံၤတက့ၢ်ႉ နၤဒီးယၤ ပကဘၣ်ကတိၤတၢ်န့ၣ်လီၤ’’ ၀ံၤ ကွၢ်၀ဲလိၤလိၤ ဆူလီၢ်ဆ့ၣ်နီၤ လၢအလီၤဟိတဖျၢၣ် ဒီးဘါထုကဖၣ်တၢ်န့ၣ်လီၤႉ အ၀ဲပာ်ဖျါထီၣ် အတၢ်နာ်န့ၢ်လီၤသး လၢအသုးဘူးသးဆူ ယွၤအအိၣ်န့ၣ်လီၤႉ အ၀ဲဆိကမိၣ်ထံၣ်မှံ၀ဲ လၢကစၢ်ဆ့ၣ်နီၤ လၢလီၢ်ဆ့ၣ်နီၤလိၤ ဒီးနာ်၀ဲလၢကစၢ်ဒိကနၣ် အတၢ်ဃ့ သကွံာ်ကညးန့ၣ်လီၤႉ
တၢ်ဆၢကတီၢ်ဒီး ကစၢ်ယွၤမ့ၢ် တၢ်ဆၢကတီၢ်လၢ အကါဒိၣ်ဖဲ ပအၢၣ်လီၤအီလီၤကတိၤသကိးတၢ်ဒီး ယွၤသ့ တၢ်လၢာ်န့ၣ်လီၤႉ ကစၢ်ယွၤ သုးဘူးအသး ဆူပအိၣ် ဖဲပဟဲ သုးဘူးအသးဆူအအိၣ် လၢခံခီယၢ်ဘးပၣ်ဃုာ်အသးအခါ န့ၣ်လီၤ (ယၤ ၄း၈) ႉ အ၀ဲဟ့ၣ်ပှၤတၢ်နာ်လၢ‚ ‘‘ယအိၣ်ဒီး သုကိးမုၢ်နံၤမုၢ်နၤ’’ န့ၣ်လီၤ (မး ၂၈း၂၀) ႉ ပပၢ်အိၣ်လၢမူခိၣ် အိၣ်ခိးပှၤထီဘိ လၢပကဟဲဆူအအိၣ် ဒီးထီဘိန့ၣ် အိၣ်ကတဲာ်ကတီၤအသး လၢကဒိကနၣ်ပှၤန့ၣ်လီၤႉ
ပအိၣ်ဒီး တၢ်ဆၢကတီၢ်ကီခဲလၢ ပဘၣ်ဂဲၤပျုၢ် ဘါထုကဖၣ်တၢ် မ့ၢ်လၢပလီၤဘှံး‚ မံခ့မံသပ့ၤ‚ အိၣ်တမုာ်တလၤ‚ ဒီးဂံၢ်ဘါစၢ်အခါ န့ၣ်လီၤႉ ဘၣ်ဆၣ် ယ့ၣ်။း သးအိၣ်ပှၤ ဖဲပဂံၢ်စၢ်ဘါစၢ် မ့တမ့ၢ် ဘၣ်ကွၢ်ဆၢၣ်မဲာ်ဒီး တၢ်လ့ပစီအခါန့ၣ်လီၤ (ဧ့ၤ ၄း၁၅) ႉ အဃိယမၤသ့လၢ‚ ‘‘မၤသးဒ်န့ၣ်ဒီး‚ ဒ်သိးပကဒိးန့ၢ် တၢ်သးကညီၤ‚ ဒီးထံၣ်န့ၢ် တၢ်ဘျုးတၢ်ဖှိၣ် ဖဲတၢ်မၤစၢၤအဆၢကတီၢ်အပူၤဒီး‚ မ်ပသုးဘူးပသး အိၣ်ဒီးပသးခူတလ့ၢ် ဆူတၢ်ဘျုးတၢ်ဖှိၣ်အလီၢ်ပစိာ်န့ၣ်တက့ၢ်ႉ’’ (း၁၆) ႉ