ဖဲမုၢ်လီၤနုၢ်အဆၢကတီၢ်န့ၣ် ပှၤကူပှၤကညီတဖၣ် ညီနုၢ်ဆိကတီၢ်တၢ်လၢ အ၀ဲသ့ၣ် မၤ၀ဲ ဒီးကွၢ်ကီ၀ဲ‚ ဒိန့ၢ်၀ဲတၢ်ဂီၤ ဒီးမုာ်လၤသးခု လၢမုၢ်လီၤနုာ်အတၢ်ဃံတၢ်လၤအံၤလီၤႉ
ဖဲတယံာ်တမီၢ်ဒံးအခါ ယၤဒီးယမါ ပကွၢ်ကီမုၢ်လီၤနုာ်အတၢ်ဃံတၢ်လၤ လၢ မဲးကစံၣ်ကိၣ်အပီၣ်လဲၣ်ထံက့ၣ်ကျီၤန့ၣ်လီၤႉ ပှၤဂီၢ်မုၢ်အါမး အိၣ်လၢပကပိာ်ကပၤန့ၣ်လီၤႉ အါတက့ၢ် အ၀ဲသ့ၣ်မ့ၢ် ပှၤစီစၣ်တဖၣ် လၢအဟဲဆူပီၣ်လဲၣ်နံၤ ဒ်သိးကကွၢ်ကီ တၢ်မၤအသးကိးနံၤဒဲးတမံၤအံၤလီၤႉ ဖဲလၢမုၢ်လီၤနုၢ်ကွံာ် လၢမူဟီၣ်ထံးန့ၣ် ပှၤဂီၢ်မုၢ်သးခု ကိးပသူဒဲစုပှီၢ်ခီၣ်လီၤႉ
ဘၣ်မနုၤ ပှၤကညီသ့ၣ်တဖၣ် ကဲထီၣ်အသး ဒ်အံၤလဲၣ်ႉ လံာ်ထါစံးထီၣ်ပ့တၢၤပာ်ဖျါ၀ဲ‚ တစဲးလီၤႉ ပှၤလၢအကွဲးထါတဂၤ ကွဲး၀ဲ ဘၣ်ဃးကစၢ်ယွၤမၤလိာ်မုၢ် လၢကစံးထီၣ်ပ့တၢၤ ပှၤလၢအတ့လီၤအီၤန့ၣ်လီၤ (စံး ၁၄၈း ၃) ႉ ဒီးတၢ်လီၢ်တပူၤလၢ်လၢ် ဖဲမုၢ်အယဲၤဆဲးကပီၤ လၢဟီၣ်ခိၣ်န့ၣ် ပှၤကူပှၤကညီသ့ၣ်တဖၣ်စ့ၢ်ကီး အသးဟူးဂဲၤ ဒီးစံးထီၣ်ပ့တၢၤယွၤ ဃုာ်ဒီး မုၢ်အတၢ်ကပီၤန့ၣ်လီၤႉ နှဆၢၣ်အတၢ်ဃံတၢ်လၤ ကတိၤတၢ်ဒီးပှၤ ဒ်တၢ်စှၤမံၤ ကတိၤတၢ်ဒီးပှၤအသိးန့ၣ်လီၤႉ နှဆၢၣ်တၢ်ဃံတၢ်လၤ ထုးန့ၢ်ပသး ဒီးဆိကတီၢ် ပတၢ်လဲၤကျဲ တကးဒံးဘၣ် အိၣ်ဒီးစိကမီၤလၢ ပကဃၣ်ဃီၤပသး ဆူပှၤလၢအဒုးအိၣ်ထီၣ် တၢ်ဃံတၢ်လၤတဂၤန့ၣ်လီၤႉ
ယွၤအတၢ်ဘၣ်တ့ဖးဒိၣ် အတၢ်လီၤလးအံၤ ဒုးအိၣ်ပတုာ်ဒီး ဒုးသ့ၣ်နီၣ်ထီၣ်ပှၤ တၢ်လၢအကါဒိၣ်နီၢ်နီၢ်တဖၣ်လီၤႉ အဒိၣ်ကတၢၢ်န့ၣ် ဒုးသ့ၣ်နီၣ်ထီၣ်ပှၤ လၢမုၢ်တနံၤ အတၢ်စးထီၣ်ဒီးအတၢ်မၤကတၢၢ်အလီၢ်ခံန့ၣ် ပှၤတ့လီၤတၢ်အိၣ်၀ဲတဂၤန့ၣ်လီၤႉ ပှၤတဂၤအံၤ အဲၣ်ဘၣ်ဟီၣ်ခိၣ် လၢအတ့လီၤ၀ဲဒိၣ်မးသတးဒီး ဟဲလီၤဆူဟီၣ်ခိၣ်အံၤ ဒ်သိးကပရၤက့ၤအီၤ ဒီးဟ့ၣ်ကဒါက့ၤအီၤန့ၣ်လီၤႉ