ယဖိခွါ ၄ နံၣ်ဖိတဂၤန့ၣ် သံကွၢ်သံဒိးတၢ်ဆူၣ်မး‚ ဒီးကတိၤတၢ် အဆၢတလီၤတူာ် နီတဘျီဘၣ်ႉ ယသးခုကတိၤတၢ်ဒီးအီၤ ဘၣ်ဆၣ်ဒီး အ၀ဲမၤလုၢ်မၤလၢ်အသးတမံၤ လၢတမၤမုာ်ယသးအိၣ်တမံၤလီၤႉ တၢ်န့ၣ် မ့ၢ်ဒၣ်ဖဲအကတိၤတၢ်ဒီးယၤအခါ ဒီအချၢလၢယၤလီၤႉ အဃိဒီးတဘျီဘၣ်တဘျီ ယတဲအီၤ လၢယတနၢ်ဟူနၤဘၣ်‚ ၀ံသးစူၤကွၢ်ယမဲာ် ဖဲနကတိၤတၢ်ဒီးယၤအခါတက့ၢ် န့ၣ်လီၤႉ
တဘျီဘျီ ယဆိကမိၣ်ထီၣ်စ့ၢ်ကီး ကစၢ်ယွၤ ကအဲၣ်ဒိးတဲယၤ ဒ်ယတဲယဖိခွါအသိးန့ၣ်လီၤႉ တၢ်န့ၣ် တမ့ၢ်လၢ အတနၢ်ဟူစဲဃဲၤဘၣ်ႉ မ့ၢ်ဒၣ်လၢ ပကတိၤ တၢ်ဒီးအီၤ‚ ပတကွၢ် အမဲာ်နီၢ်နီၢ်အဃိလီၤႉ ပဘါ ထုကဖၣ်ကစီဒီ‚ ဘၣ်ဆၣ်ဒီး ပသးစဲဘူးဒၣ်လၢ ပတၢ်ဂ့ၢ်တၢ်ကျိၤ‚ ပတၢ်သံကွၢ် တဖၣ်ဒီး ပတၢ်ထံၣ်တီတခီမ့ၢ်ဒၣ်ပနီၢ်ကစၢ်လီၤႉ ပသးပ့ၤနီၣ် ပှၤလၢပကိးထီၣ်တၢ် ဆူအအိၣ်တဂၤန့ၣ်လီၤႉ လီၤဂာ်ဒ်ယဖိခွါအသိး ပသံကွၢ်တၢ်ဘၣ်ဆၣ် ပတကွၢ် ပှၤလၢပကတိၤတၢ်ဒီးအီၤတဂၤဘၣ်န့ၣ်လီၤႉ
ဖဲပမၤသ့ၣ်နီၣ်ထီၣ်ပသးလၢ ယွၤမ့ၢ်မတၤဒီး အ၀ဲမၤတ့ၢ် တၢ်မနုၤလဲၣ်န့ၣ်‚ တၢ်လၢပတဲအီၤ ပတၢ်ဂ့ၢ်တဖၣ်န့ၣ် ကတုၤထီၣ်ဆူအအိၣ်ဂ့ၤဂ့ၤဘၣ်ဘၣ်လီၤႉ ခီဖျိ‚ ပကွၢ်စူၣ်ဃီၤဆူအအိၣ်န့ၣ် ပမၤန့ၢ်တၢ်သးမုာ် လၢပှၤလၢအအဲၣ်ပှၤ‚ ပှၤလၢအပျၢ် ပတၢ်ကမၣ်‚ ဒီးပှၤစိဒိၣ်ကမီၤထီ‚ ဒီးဘျုးဒိၣ်ဖှိၣ်အါ ကစၢ်ယွၤအနီၢ်ကစၢ်ဒၣ်၀ဲ အအိၣ်န့ၣ်လီၤႉ
ပှၤကွဲးထါစံးထီၣ်ပ့တၢၤ နာ်၀ဲလၢ ပ့ကၢးဃုယွၤအမဲာ်တဘိယူၢ်ဃီန့ၣ်လီၤ (စံး ၁၀၅း၄) ႉ ဖဲစီၤဒၤ၀ံးဃုထၢထီၣ်ခိၣ်နၢ်တဖၣ်လၢ တၢ်ဘူၣ်တၢ်ဘါဒီး တၢ်ထုကဖၣ်အဂီၢ်န့ၣ်‚ အ၀ဲဟ့ၣ်ဂံၢ်ဟ့ၣ်ဘါပှၤဂီၢ်မုၢ် လၢကစံးထီၣ်ပ့တၢၤယွၤ အလၤကပီၤဒီး‚ ဘိးဘၣ်သ့ၣ်ညါ အမၤတ့ၢ်တၢ်တီတီလိၤလိၤအဂ့ၢ်န့ၣ်လီၤ (၁ ကွဲး ၁၆း၈-၂၇) ႉ
ဖဲပကွၢ်ထီၣ်ဆူယွၤအမဲာ်အဃံအလၤန့ၣ်‚ ပကထံၣ်န့ၢ်တၢ်ဂံၢ်တၢ်ဘါဒီး တၢ်သးမုာ် လၢအဟံးဃာ်ပၢၤဃာ်ပှၤ လၢတၢ်သံကွၢ်တဖၣ် လၢအတၢ်စံးဆၢ တအိၣ်ဘၣ် အကတီၢ်ဒၣ်လဲာ်န့ၣ်လီၤႉ