ဖဲယဖိခွါ အဲၣ်လၢၣ် အိၣ်ဖျဲၣ်ထီၣ်၀ံၤ အဂီၤ၀ဲန့ၣ်‚ ကသံၣ်သရၠာစးၣ်ဆ့ၣ်နီၤလီၤ ဖဲယလီၢ်မံ အခီၣ်ထံးလာ်ဒီးစံး၀ဲ ‘‘တၢ်တမံၤမံၤကမၣ်၀ဲလံ’’ န့ၣ်လီၤႉ ပဖိခွါဖိ‚ တၢ်လၢအဖျါလၢခိန့ၣ် လၢပှဲၤမး‚ ဘၣ်ဆၣ် အ၀ဲအိၣ်ဒီး တၢ်အိၣ်ဖျဲၣ်အတၢ်တလၢတပှဲၤ လၢအတၤအသးသမူ‚ ဒီးလိၣ်ဘၣ်၀ဲလၢ ကဘၣ်လဲၤဆူတၢ်ဆါဟံၣ် အိၣ်ယံၤဒီးအမံးလာ် ၇၀၀ ဒ်သိး ကဘၣ်ဒိးကွဲးကါအသးန့ၣ်လီၤႉ
ဖဲကသံၣ်သရၠာစးၣ်စံးဘၣ်နၤလၢ တၢ်တမံၤမံၤကမၣ်လံ လၢနဖိန့ၣ်အလိၤ‚ နသးသမူဆီတလဲသးလီၤႉ တၢ်ပျံၤ ဘၣ်ဃး တၢ်ကဟဲဘၣ်နၤဆူညါ မၤသ့ၣ်ဖးနသးဒီး နဟး ကနူၤကပၤ‚ ဒီးသန့ၤနသးလၢ ကစၢ်ယွၤတဂၤ လၢအကဒုး ဆူၣ်ထီၣ်နဂံၢ်နဘါအဃိ နမၤစၢၤနဖိကန့ၢ်၀ဲအဂီၢ်န့ၣ်လီၤႉ ‘‘ကစၢ်လၢ အလၢပှဲၤဒီးတၢ်အဲၣ်တဂၤအံၤ ကပျဲတၢ်မၤ အသးဧါ’’ နဆိကမိၣ်ထီၣ်ဒ်န့ၣ်လီၤႉ မ့ၢ်အ၀ဲကဟုကယာ် ယဖိဧါႉ အ၀ဲအိၣ်ဖဲန့ၣ် ကစီဒီဧါႉ တၢ်သံကွၢ်ဒ်အံၤတဖၣ်ဒီး တၢ်ဆိကမိၣ်အဂၤ မၤဟူး၀းယတၢ်နာ်န့ၣ်လီၤႉ
ဖဲန့ၣ် ယ၀ၤသးဘိ ဟံၣ်ရၠာစးဲမ် ဟဲတုၤဒီး နၢ်ဟူ တၢ်ကစီၣ်အံၤလီၤႉ ဖဲကသံၣ် သရၠာစးၣ်ဟးထီၣ်၀ံၤန့ၣ် ဟံၣ်ရၠာစးဲမ် စံး၀ဲလၢ ‘‘ကၠိလံန်‚ ပကထုကဖၣ်မီၤ’’ႉ ယဖျးယခိၣ်ဒီး အ၀ဲဟံးန့ၢ်ယစုလီၤႉ ‘‘ပၢ်သးဘိဧၢ‚ တၢ်ဘျုးလၢ နဟ့ၣ်ပှၤ အဲၣ်လၢၣ် အဃိလီၤႉ အ၀ဲမ့ၢ်နတၢ်လီၤ‚ ကစၢ်ဧၢ တမ့ၢ်ပတၢ်ဘၣ်ႉ နအဲၣ်အီၤတချုးလၢ ပသ့ၣ်ညါအီၤဒံးဘၣ် အခါ အ၀ဲမ့ၢ်ဒၣ် နတၢ်လီၤႉ ၀ံသးစူၤ အိၣ်ဒီးအီၤ ဖဲပအိၣ်တသ့အခါတက့ၢ်ႉ အၤမ့ၣ်’’
ဟံၣ်ရၠာစးဲမ် မ့ၢ်ပှၤတဂၤလၢ အတၢ်ကတိၤစှၤ၀ဲထီဘိလီၤႉ အ၀ဲတနါစိၤ ပာ်ဖျါ အတၢ်ဆိကမိၣ်ဘၣ်‚ မ့ၢ်လၢ အသ့ၣ်ညါ၀ဲလၢ ယအိၣ်ဒီး တၢ်ကတိၤဖျၢၣ်တဖၣ် အါမးလၢ ယကမၤပှဲၤ တၢ်ဘရၣ်တၢ်ဘှီၣ်အဂီၢ်န့ၣ်လီၤႉ ဘၣ်ဆၣ်မုၢ်နံၤ ဖဲယသးဘၣ်ဒိဒီး ယနီၢ်သးဘျဲး၀ဲဒီး ယတၢ်နာ်ဟါမၢ်၀ဲန့ၣ်‚ ကစၢ်ယွၤ ဟ့ၣ်သါအီၤ တၢ်ဂံၢ်တၢ်ဘါ ဒ်သိး အကကတိၤတၢ် လၢယစံးကတိၤယဲတန့ၢ်န့ၣ်လီၤႉ လၢတၢ်ဖိးဃာ် ယ၀ၤသးဘိ အစု‚ အိၣ်လၢ တၢ်ဘရၣ်ဘှီၣ်ယိာ်ဒီး မဲာ်ထံမဲာ်နိအပူၤ‚ ယကလၢၢ်ဘၣ်လၢ ယွၤအိၣ်ဘူးဒီးယၤ အဂ့ၢ်လီၤႉ