မုၢ်တနံၤလၢ ယ၀ၤသးဘိ ဒဲၣ်န် ဒီးယၤ‚ ပစးထီၣ်ပတၢ်ကဟုကယာ် အတၢ်လဲၤ‚ ဃုာ်ဒီး ပမိၢ်ပၢ်သးပှၢ်တဖၣ်န့ၣ်‚ ပဖီၣ်စဲဘူး ပစုဒုၣ်တဖၣ် မၤသးဒ်ပစံၣ်လီၤလၢ လၢၢ်ကၢၢ်ခိၣ် ဖးထီန့ၣ်လီၤႉ လၢတၢ်ဟ့ၣ်တၢ်ကဟုကယာ်အတၢ်မၤပူၤအံၤ မူဒါတၢ်မၤ အကီကတၢၢ် လၢပကဘၣ်သဂၢၢ်န့ၣ် မ့ၢ်တၢ်ပျဲပသးတဖၣ်လၢ တၢ်ကဃုထံၣ်ဒီးဘှီအီၤ‚ ဒီးပျဲယွၤ ဒ်သိးကသူ တၢ်ဆၢကတီၢ်လီၤဆီအံၤ လၢကမၤကဲထီၣ်ပှၤ ဒ်သိးဒီးအီၤ လၢကျိၤကျဲအသီတဖၣ်လီၤႉ တၢ်အံၤ ယတသ့ၣ်ညါတ့ၢ်ဘၣ်
မုၢ်နံၤတဖၣ် ဖဲယကလၢၢ်ဘၣ်ယဲ လၢယတၢ်စံၣ် လီၤတဲာ် လၢတၢ်လီၤတဲာ်အိၣ်ဒီး တၢ်ပၢၤဃာ်တန့ၢ်ဘၣ်န့ၣ်‚ ယွၤဒုးနဲၣ်ယၤ လၢယတၢ်အိၣ်ဖှိၣ်အတၢ်ဂ့ၢ်‚ ယတၢ်သးဒ့ဒီ တဖၣ်‚ ယတၢ်ပျံၤတၢ်ဖုး‚ ယတၢ်ပာ်ကဖၢလၢသး‚ ဒီး ယတၢ်အဲၣ်လီၤက့ၤသးတဖၣ်လီၤႉ အ၀ဲသူ ယတၢ်ကၢ်လီၤကလဲ အလီၢ်တဖၣ် ဒ်သိးကဒုးနဲၣ်ယၤ အတၢ်အဲၣ်ဒီး အတၢ်ပျၢ် ယတၢ်ကမၣ်တဖၣ်န့ၣ်လီၤႉ
ယတၢ်အိၣ်ဖှိၣ်သရၠာစးၣ်စံး၀ဲလၢ ‘‘နံၤအဂ့ၤကတၢၢ်န့ၣ် မ့ၢ်နံၤလၢနထံၣ်လီၤက့ၤ နသး လၢနမ့ၢ်မတၤလဲၣ်ႉ ခရၠာစးံာ်မ့ၢ်တအိၣ်ဒီးနၤဘၣ်ဒီး တၢ်မုၢ်လၢ်လၢ နဂီၢ်တအိၣ်ဘၣ် န့ၣ်လီၤႉ တၢ်န့ၣ်၀ံၤ‚ ထံၣ်လီၤက့ၤနသး ဒ်ယွၤထံၣ်နၤအသိး‚ လၢနလၢပှဲၤလၢ အပူၤသ့၀ဲန့ၣ် တက့ၢ်’’ႉ တၢ်အံၤမ့ၢ်တၢ်ဆိၣ်ဂ့ၤ အိၣ်ဟဲလၢတၢ်ဟ့ၣ်တၢ်ကဟုကယာ်တၢ်မၤလၢ ယသးသမူအပူၤန့ၣ်လီၤႉ ဒ်ယထံၣ်လီၤက့ၤယသး လၢကစၢ်ယွၤတ့လီၤယၤ ဒ်ယမ့ၢ်တၢ်အံၤ‚ ယဃၣ်က့ၤသးဒီး ဃ့ၢ်ဟီၣ်လၢ အသးနါပှၢ်ပူၤလီၤႉ ယကိးပသူထီၣ် ဒ်ပှၤကွဲးလံာ် ထါစံးထီၣ်ပ့တၢၤ စံး၀ဲအသိး ‘‘ကစၢ်ဧၢ‚ ဃုကွၢ်ယၤဒီး သ့ၣ်ညါယသးတက့ၢ်ႉ မၤကွၢ်ယၤ ဒီးသ့ၣ်ညါယတၢ်ဆိကမိၣ်တက့ၢ်’’ (စံး ၁၃၉း၂၃) န့ၣ်လီၤႉ
အအံၤမ့ၢ်ယတၢ်ထုကဖၣ်လၢနဂီၢ် လၢနထံၣ်လီၤက့ၤနသး ဒ်တၢ်အိၣ်အသး မၤအသးဒီးနၤအသိး‚ နကဃၣ်က့ၤဒီး ဃ့ၢ်နုာ်ဆူူ ကစၢ်ယွၤအသးနါပှၢ် လၢအိးထီၣ် အသး‚ ပှဲၤဒီးတၢ်အဲၣ်‚ ဒီးပျၢ်နတၢ်ကမၣ်တဖၣ်အပူၤတက့ၢ်ႉ