ဖဲပတၢ်တ့တၢ်ဖျီဆၢက့ၤအမုၢ်နံၤန့ၣ်‚ ယ၀ၤသးဘိလဲၤဒိးလဲလ့ၣ်ယီၢ်ခီၣ် လၢပှၤဒိးတၢ်ဖိ ခံဂၤအဂီၢ် ဒ်သိးပကယီၢ်သကိးဒီး လဲၤတၢ်လၢကျဲလၢ ပဘၣ်အိၣ်ဒီး တၢ်သးဒူန့ၣ်လီၤႉ ဖဲပစးထီၣ်ယီၢ်လ့ၣ်န့ၣ် ဒီးယပာ်သူၣ်ပာ်သးလၢ ယမ့ၢ်ပှၤအိၣ်လၢ လီၢ်ခံအဃိ အ၀ဲအဖံထံခိၣ် နိးဃာ်အသးဒီး ယတထံၣ်ဘၣ်ကျဲလၢ ယမဲာ်ညါန့ၣ် ဘၣ်လီၤႉ ဒ်န့ၣ်အသိး လ့ၣ်ယီၣ်အစုဟံးဘိတဖၣ်စ့ၢ်ကီး ယမၤဟူးအီၤ တန့ၢ်ဘၣ်အဃိ ယဃၣ်လ့ၣ်ယီၣ်ခီၣ် ဆူန့ၢ်ဆူအံၤ တသ့ဘၣ်န့ၣ်လီၤႉ ထဲဒၣ်လ့ၣ်ယီၣ်အစုဟံးဘိ လၢအမဲာ်ညါတဖၣ် ဒုးဃၣ်လ့ၣ်ယီၣ်ခီၣ် လၢစုစ့ၣ်စုထွဲသ့၀ဲ န့ၣ်လီၤႉ လၢအလီၢ်ခံတခါန့ၣ် မ့ၢ်ဒၣ်လၢကပၢၤဃာ် ယနီၢ်ကစၢ်အဖီခိၣ်တခီန့ၣ်လီၤႉ တၢ်ဃုထၢလၢယဂီၢ် အိၣ်ဒၣ်ခံမံၤလီၤႉ ယပၢၤဃာ် လ့ၣ်ယီၣ်ခီၣ်အတၢ်ဃ့ၢ်တသ့အဃိ ယကမၤ တံာ်တာ်ယသးဧါႉ မ့တမ့ၢ်ဘၣ်ဒီး ယကလဲၤတၢ်မုာ်မုာ် ဒီးနုာ်ဒီးပျဲ မၢး လၢကဆှၢယၤဂ့ၤဂ့ၤလၢပတၢ်လဲၤတဘျီ အပူၤအံၤဧါန့ၣ်လီၤႉ
ဖဲလၢကစၢ်ယွၤမၢ စီၤအၤ့ဘၣ် ဟးထီၣ်ကွံာ် လၢအိၣ်ဆိးအလီၢ်ဒီး အဒူၣ်ဖိထၢဖိ အခါန့ၣ်‚ ကစၢ်ယွၤတတဲအီၤ တၢ်ဂ့ၢ်တၢ်ကျိၤအါအါဘၣ်ဃး ဒီးတၢ်လီၢ် လၢကဘၣ် လဲၤ၀ဲန့ၣ်ဘၣ်ႉ ဟီၣ်ခိၣ်ဂီၤအပနီၣ် တအိၣ်ဘၣ်ႉ တၢ်လီၢ်အသီ လၢကဘၣ်လဲၤ၀ဲ အတၢ်ပာ်ဖျါမ့ၢ်ဂ့ၤ‚ အန့ဆၢၣ်ဂံၢ်ထံးတဖၣ်အဂ့ၢ်မ့ၢ်ဂ့ၤ တအိၣ်ဘၣ်ႉ ကလဲၤတုၤ၀ဲအဂီၢ် တၢ်ဆၢကတီၢ်ကယံာ်ထဲလဲၣ်ဒၣ်လဲာ် တတဲဖျါ၀ဲဘၣ်ႉ ကစၢ်ယွၤ စံးဘၣ်အီၤထဲဒၣ် လၢ က ‘‘လဲၤ’’ ၀ဲဆူ တၢ်လီၢ်လၢအ၀ဲကဒုးနဲၣ်၀ဲနှၣ်လီၤႉ တၢ်ဂ့ၢ်တၢ်ကျိၤကိးမံၤဒဲး လီၤတံၢ်လီၤဆဲး လၢပှၤအါဂၤသးလီ၀ဲ မ့ၢ်တအိၣ်ဘၣ်ဆၣ်‚ စီၤအၤ့ဘၣ် ဒိကနၣ်တ့ၢ်၀ဲအဃိ ဘၣ်တၢ်ပာ်ကဲအီၤ ဒ်တၢ်နာ်အပၢ်အသိးန့ၣ်လီၤ (ဧ့ၤ ၁၁း၈) ႉ
ပမ့ၢ်ထံၣ်လီၤပသး လၢပဂဲၤလိာ်ပ@ၢ်ဃာ်‚ ဖီၣ်ဃာ်တၢ်တလီၤတံၢ်လီၤဆဲး သ့ၣ်တဖၣ်မ့ၢ်ဂ့ၤ‚ တၢ်လၢကပၢၤတၢ်တအိၣ်အဃိမ့ၢ်ဂ့ၤဒီး‚ မ်ပကဟံးန့ၢ်သကိး စီၤအၤ့ဘၣ် အဒိအတဲာ် ဘၣ်ဃး တၢ်နာ်‚ တၢ်သန့ၤသး ဒီး တၢ်ပိာ်ယွၤအခံန့ၣ်တက့ၢ်ႉ ကစၢ်ယွၤ ကဆှၢပှၤဂ့ၤဂ့ၤကလဲာ်န့ၣ်လီၤႉ