ဖဲယဖိခွါအတီၤလဲလိာ်အသး လၢအတၢ်မၤလိအပူၤန့ၣ်‚ ကိးသBတီထီၣ် ဒီးစံး၀ဲ ယအဲၣ်ဒိးဒၣ် ယသရၠာစးၣ်မုၣ်အံၤ တစိၤယသးလီၤႉ ပအိၣ်ဒီးပမူဒါ လၢပကဘၣ်ဒုးသ့ၣ်ညါအီၤ လၢတၢ်လဲလိာ်သရၠာစးၣ် လၢတၢ်မၤလိအပူၤန့ၣ်‚ မ့ၢ်ဒၣ်တၢ်အပတီၢ်တမံၤ လၢပသးသမူအပူၤန့ၣ်လီၤႉ ပကဘၣ်ဆိကမိၣ်စံၣ်ညီၣ်တဲာ်လၢ တၢ်ဘၣ်ထွဲလိာ်ပသးလၢ ပသးသမူတစိၤအပူၤန့ၣ် အိၣ်၀ဲတမံၤမံၤဧါန့ၣ်လီၤႉ
စီၤယၤကိာ် လၢအမ့ၢ်ဒူၣ်ထၢအခိၣ်သ့ၣ်ညါ၀ဲ လၢ အသးသမူတစိၤအပူၤန့ၣ် ပှၤလၢအဘၣ်ထွဲလိာ်အသး ဒီးအီၤအိၣ်၀ဲတဂၤလီၤႉ ဖဲအ၀ဲဒၣ် အိၣ်၀ဲလၢတၢ်လဲလိာ် လၢအလီၤကမၢကမၣ်ဖးဒိၣ်သ့ၣ်တဖၣ်‚ ဖဲအ၀ဲဒၣ်အဖိ လၢအအဲၣ်ဒိၣ်၀ဲ လီၤမၢ်ကွံာ်အကတီၢ်န့ၣ်‚ သ့ၣ်ညါ၀ဲလၢ ယွၤအိၣ်ဒီးအီၤထီဘိလီၤႉ အ၀ဲထုကဖၣ်တၢ်ဒီးစံး၀ဲ ‘‘မ်ယွၤ -လၢအမ့ၢ်ယပှၤကွၢ်သိ တုၤမုၢ်မဆါတနံၤအံၤ‚ ဆိၣ်ဂ့ၤဘၣ်ဖိသၣ်တဖၣ်တက့ၢ် (၁ မိၤ ၄၈း၁၅-၁၆) န့ၣ်လီၤႉ
စီၤယၤကိာ်မ့ၢ် ပှၤကွၢ်သိတဂၤလီၤႉ အဃိအ၀ဲဒိလီၤ အတၢ်ဘၣ်ထွဲဒီးယွၤ လၢပှၤကွၢ်သိဒီးသိဖိလီၤႉ စးထီၣ်လၢ သိဖိဖှံလီၤ တုၤလၢ အဒိၣ်ထီၣ်ဒီးသးပှၢ်အကတီၢ် န့ၣ် မုၢ်ဆါဂ့ၤ‚ မုၢ်နၤဂ့ၤ ပှၤကွၢ်သိကွၢ်ထွဲအခံလီၤႉ အ၀ဲဒၣ် နဲၣ်၀ဲအသိအကျဲ လၢမုၢ်ဆါ‚ ဒီးဒီသဒၢအီၤ လၢမုၢ်နၤလီၤႉ စီၤဒၤ၀ံးစ့ၢ်ကီး ဒ်အမ့ၢ် ပှၤကွၢ်သိတဂၤအသိး အိၣ်၀ဲ ဒီးအတၢ်ထံၣ် ဒီးအတၢ်ဆိကမိၣ် ဒ်သိးဒီးအီၤလီၤႉ ဘၣ်ဆၣ် ဒုးဖျါထီၣ် တၢ်လီၤထူလီၤယိာ် ဖဲအစံး၀ဲ ‘‘ဒီးယကအိၣ်ကဆိး လၢယွၤအဟံၣ်လီၤစိၤလီၤထီလီၤ’’ (စံး ၂၃း၆) ႉ
တၢ်လဲလိာ်သရၠာစးၣ်န့ၣ် မ့ၢ်၀ဲ တၢ်အပတီၢ်တပတီၢ် လၢသးသမူအပူၤလီၤႉ ဘၣ်ဆၣ် ဖဲပသ့ၣ်ညါလၢ ပအိၣ်ဒီး ကစၢ်တဂၤ လၢပသးသမူတစိၤအပူၤန့ၣ် မ့ၢ်တၢ်သးခုဒိၣ်မး လၢပဂီၢ်လီၤႉ ကစၢ်လၢအမ့ၢ် ပပှၤကွၢ်သိ‚ အၢၣ်လီၤ၀ဲလၢကအိၣ် လၢပကပၤ ဖဲပသးသမူတစိၤ လၢဟီၣ်ခိၣ်အံၤလီၤ (မးသဲ ၂၈း၂၀) ႉ ဒီးဖဲပသးလၢ ဟီၣ်ခိၣ်ကတၢၢ်၀ဲန့ၣ် ပကအိၣ်ဘူးထီၣ်ဆူအအိၣ် လီၤထူလီၤယိာ်လီၤႉ