ဒီၣ်စဲၢ် ထရၠာစးီးမဲလၢအမ့ၢ်ပှၤခရၠာစးံာ်ဖိခိၣ်နၢ်တဂၤ လၢနံၣ်ကယၤခံဆံ အခၢၣ်သးတဂၤ‚ ပာ်ဖျါထီၣ်၀ဲလၢ လံာ်စီဆှံ မ့ၢ်တၢ်အရၠာစး့ဒိၣ်ကတၢၢ် လၢပှၤခရၠာစးံာ်ဖိ သ့ၣ်တဖၣ် အတၢ်အိၣ်မူအပူၤလီၤႉ အ၀ဲဒၣ်မၤကတၢၢ်၀ဲ တနံၤဘၣ်တနံၤ ခီဖျိ လၢ ‘‘ယွၤအတၢ်စံးအတၢ်ကတိၤလၢခံကတၢၢ်’’လီၤႉ တချုးအ၀ဲမံန့ၣ် အ၀ဲဆိကမိၣ် တၢ် ယိာ်ယိာ်ကလဲာ်လၢ လံာ်စီဆှံအဆၢ လၢအတိၢ်နီၣ် ၀ဲန့ၢ်တဖၣ်အဖီခိၣ် ၀ံၤဘါထုကဖၣ် တၢ်လၢအတၢ်အိၣ် တၢ်ဆိးဒီး တၢ်ဖံးတၢ်မၤအဂီၢ်န့ၣ်လီၤႉ အ၀ဲအဲၣ်ဒိး၀ဲလၢ တၢ်ကတိၤ လၢတၢ်ဆိကမိၣ်တနံၤဒီးတနံၤ အကတၢၢ်န့ၣ် ကဘၣ်မ့ၢ်၀ဲ ‘‘ခရၠာစးံာ်အတၢ်ကတိၤ’’ န့ၣ်လီၤႉ
ပှၤကွဲးလံာ်စံးထီၣ်ပ့တၢၤ စီၤဒၤ၀ံး စံး၀ဲ‚ ‘‘တုၤ ယသ့ၣ်နီၣ်ထီၣ်က့ၤနၤ လၢယလီၢ်မံအဖီခိၣ် ဒီးယဆိ ကမိၣ် လၢနဂ့ၢ်နကျိၤ လၢပှၤဆိးသီတဖၣ် အကတီၢ်အဖၢမုၢ်လီၤႉ အဂ့ၢ်ဒ်အံၤ နမ့ၢ်တၢ်မၤစၢၤယၤ‚ ဒီး ယကသူၣ်ဖှံသးညီ လၢနဒံးဆ့အကဒုပူၤလီၤ’’ (စံး ၆၃း ၆-၇) ႉ ဖဲပအိၣ် လၢတၢ်ကီတၢ်ခဲ အဒိၣ်အမုၢ်မ့ၢ်ဂ့ၤ (မ့) အိၣ်ဒီးတၢ်သူၣ်ခုသးခု‚ တၢ်မုာ်တၢ်ခုၣ်မ့ၢ်ဂ့ၤ‚ ပတၢ် ဆိကမိၣ်လၢခံကတၢၢ် လၢမုၢ်နၤတချုးပမံန့ၣ် မၤဘၣ်လီၢ်ဘၣ်စးပသးသ့၀ဲ လၢတၢ်အိၣ်ဘှံးအိၣ်သါ ဒီးတၢ်မုာ်တၢ်ခုၣ် လၢကစၢ်ယွၤ ဟ့ၣ်လီၤပှၤလီၤႉ ပတၢ်မံန့ၣ် ကကျဲၤလီၤ ပတၢ်ဆိကမိၣ်အဆိကတၢၢ်အသီ လၢခဲမုၢ်ဂီၤအဂီၢ်လီၤႉ
တံၤသကိးတဂၤဒီးအမါ မၤကတၢၢ်မုၢ်နံၤတနံၤ လၢတၢ်ဖးလံာ်စီဆှံ အကလုၢ်ဖးဒိၣ်‚ ဒီးတၢ်ဘူၣ်ထီၣ်ဘါထီၣ်သကိး ဒီးဖိလွံၢ်ဂၤလီၤႉ အ၀ဲသ့ၣ်တူၢ်လိာ် ဖိသၣ်တဖၣ် အတၢ်သံကွၢ်ဒီးတၢ်ဆိကမိၣ် လၢတဂၤဒီးတဂၤအအိၣ်‚ ဒီးစံးကတိၤ သကိး ဘၣ်ဃးဒီးတၢ်ပိာ်ကစၢ်ခရၠာစးံာ်အမံၤ လၢဟံၣ်ဒီးတၢ်မၤလိအလီၢ်န့ၣ် မ့ၢ်တၢ် ဒ်သိးလဲၣ်န့ၣ်လီၤႉ တၢ်မၤဒ်သိးန့ၣ်တဖၣ် ကိး၀ဲလၢ ‘‘တၢ်ပာ်ဖျါထီၣ် ကစၢ်ယွၤ အတၢ်ကတိၤ လၢခံကတၢၢ်’’ ဖဲမုၢ်တနံၤဘၣ်တနံၤအကတၢၢ်န့ၣ်လီၤႉ
မ့ၢ်ကျဲမနုၤအဂ့ၤကတၢၢ်တဘိ လၢပကမၤကတၢၢ်ပ၀ဲ မုၢ်တနံၤဒီးတနံၤ န့ၣ်လဲၣ်ႉ