ယဖုဟါရၠာစး့းစ်ဒီး ဖံဟါရၠာစး့းစ် တအိၣ်ဒီး တိၢ်အါအါဂီၢ်ဂီၢ်ဘၣ်‚ ဘၣ်ဆၣ် အ၀ဲသ့ၣ်ဃုမၤ ခရၠာစးံာ်အိၣ်ဖျဲၣ်အမူးလၢ အကဲထီၣ် တၢ်သ့ၣ်နီၣ်လၢ ယတခွါဒီးယၤအဂီၢ်လီၤႉ ခရၠာစးံာ် အိၣ်ဖျဲၣ်အမူးပူၤ အိၣ်ဒီးတၢ်အီၣ်တၢ်အီအါအါဂီၢ်ဂီၢ်‚ တၢ်လီၤသးခု ဒီးတၢ်အဲၣ်တၢ်ကွံ တဖၣ်န့ၣ်လီၤႉ လၢပနီၢ်ဆံးလံၤလံၤ ပမၤလိဘၣ်လၢ ပှၤလၢအဒုးကဲထီၣ် တၢ်မူးသးဖှံအံၤ မ့ၢ်ဒၣ် ကစၢ်ခရၠာစးံာ်န့ၣ်လီၤႉ
ပသးအိၣ်ပာ်တ့ၢ်တၢ်ဟ့ၣ်သါတမံၤဃီ‚ ဒ်သိးအံၤဆူ ပဖိပလံၤတဖၣ်လီၤႉ ဖဲပထံၣ်လိာ်သကိးသးဒီး ပဒူၣ်ဖိထၢဖိ ဖဲအပူၤကွံာ် လါဒံၢ်စ့ဘၢၣ် ခရၠာစးံာ်အိၣ်ဖျဲၣ်အမူးန့ၣ် ပနၢ်ပၢၢ်လၢ တၢ်လီၤစၢၤလုၢ်ဒိၣ်ပရၤဒိၣ်အံၤ စးထီၣ်သးလၢ ဖုဒီးဖံတဖၣ် န့ၣ်လီၤႉ အ၀ဲသ့ၣ် ပာ်တ့ၢ်န့ၢ် ပှၤတၢ်န့ၢ်သါ ဘၣ်ဃး ကျိၣ်စ့ တန့ၢ်ဘၣ်‚ ဘၣ်ဆၣ်အ၀ဲသ့ၣ် အိၣ်ဒီးတၢ်ပာ်လုၢ်ပာ်ပရၤလၢ အသူၣ်လီၤတ့ၢ် တၢ်ချံတဖၣ်လၢအမ့ၢ် တၢ်အဲၣ်‚ တၢ်ပးကဲ‚ ဒီးတၢ်စူၢ်တၢ်နာ်ဒ်သိး ပ၀ဲ‚ အဖိတဖၣ်အဖိ‚ ကမၤထွဲ အ၀ဲသ့ၣ် အတၢ်ဟ့ၣ်ဒိဂ့ၤတဲာ်ဘၣ်န့ၣ်လီၤႉ
လၢလံာ်စီဆှံအပူၤ ပဖးဘၣ်ဖံနီၢ်လိၤအ့ၣ်ဒီး မိၢ်နီၢ်အူၤနံက့ၤ လၢအဟ့ၣ်ခီဟ့ၣ်နီၤ တၢ်နာ်နီၢ်နီၢ်ဆူ စီၤတံၤမသ့းန့ၣ်လီၤ ( ၂တံၤ ၁း၅) ႉ အ၀ဲသ့ၣ်အတၢ်ဒိၣ်ဘၢဖိတဂၤအံၤ ကဲထီၣ်တၢ်ကတဲာ်ကတီၤလၢ ကနီၤဟ့ၣ်တၢ်သးခုကစီၣ် ဆူ ပှၤဂုၤပှၤဂၤန့ၣ်လီၤႉ
ခီဖျိတၢ်အိၣ်မူဘၣ်ထွဲလိာ်သးဒီးယွၤ ဘူးဘူးတံၢ်တံၢ်န့ၣ် ပမၤကဲထီၣ် နီၢ်သး အတၢ်ဟ့ၣ်သါလၢ ပှၤလၢပအိၣ်မူဒိၣ်ဘၢအီၤတဖၣ် သ့၀ဲန့ၣ်လီၤႉ ဖဲပအိၣ်မူ လၢဟီၣ်ခိၣ် အံၤ‚ ပပာ်ဖျါ ယွၤအတၢ်အဲၣ် လၢပတၢ်အိၣ်မူပူၤသ့ ခီဖျိ ပတအိၣ်ဒီး တၢ်နီၤဖးတၢ်အဆၢ အကွာ်လၢ ပှၤဂၤအဖီခိၣ်‚ ဒုးနဲၣ်ပတၢ်သးစဲ လၢအ၀ဲသ့ၣ်အတၢ်ဆိကမိၣ်ဒီး အတၢ်မၤ အပူၤ‚ ဒီးမူမၤသကိးတၢ်ဒီးအ၀ဲသ့ၣ်န့ၣ် မ့ၢ်ပပာ်ဖျါ ယွၤအတၢ်အဲၣ်လၢ ပတၢ်အိၣ်မူပူၤ နီၢ်နီၢ်န့ၣ်လီၤႉ ပကဘၣ်ကွဲမုာ်အ၀ဲသ့ၣ်လၢ ကဟဲသးခုဃုာ်ဒီးပှၤ လၢ ပတၢ်သးခုတဖၣ်အပူၤန့ၣ်လီၤႉ ဖဲပတၢ်အိၣ်မူတဖၣ် ပာ်ဖျါထီၣ်က့ၤ ယွၤအတၢ်အဲၣ် လၢတၢ်မ့ၢ်တၢ်နီၢ်နီၢ်န့ၣ် မ့ၢ်ပပာ်တ့ၢ်တၢ်န့ၢ်သါလၢ အမ့ၢ်တၢ်လီၤစိၤ လၢပှၤဂုၤပှၤဂၤအဂီၢ်န့ၣ်လီၤႉ