ဖဲမုၢ်တဂီၤ တၢ်ခုၣ်ဒီးဘရၣ်လီၤအကတီၢ်‚ ယၤဒီးယဖိမုၣ် ပလဲၤဟးဆူကၠိအခါ ပထံၣ်ကလံၤလၢ ပသါထုးထီၣ်ကွံာ်အီၤတဖၣ် ကဲထီၣ်ကလံၤအသ၀ံန့ၣ်ဒီး ပသးခုဒိၣ်မးန့ၣ် လီၤႉ ပကွၢ်ကလံၤအသ၀ံလၢ လၢပသါထုးထီၣ်ကွံာ်အီၤန့ၣ် လီၤဂာ်ဒီး တၢ်အၢၣ်ဖိတဖၣ်အဃိ ပနံၤဃဲးနံၤဃိးလီၤႉ တၢ်ဆၢကတီၢ်ဖိလၢ ယအိၣ်ဘၣ်ဒီးယဖိမုၣ် ဒီးယအိၣ်မူ ဘၣ်ဒံးန့ၣ် မ့ၢ်တၢ်သးမုာ်ဖးဒိၣ်ဒီး ယတူၢ်လိာ်အီၤ ဒ်တၢ်ဟ့ၣ် တမံၤလီၤႉ
ပတၢ်သါန့ၣ် ညီနုၢ်ပထံၣ်အီၤတသ့ဘၣ် ပထံၣ်န့ၢ်အီၤသ့ဒၣ် ဖဲကလံၤခုၣ်အဆၢကတီၢ်ဒီး ဒုးဆိကမိၣ်ထီၣ်ယၤ ဘၣ်ဃး တၢ်ဘၣ်တ့အကစၢ်ယွၤလၢ အမ့ၢ် ပတၢ်သါဒီး ပတၢ်မူအဂံၢ်ထံးန့ၣ်လီၤႉ အ၀ဲဒုးအိၣ်ထီၣ် စီၤအၤဒၣ်လၢ ဟီၣ်ခိၣ်အကမူၣ်ဒီး ဟ့ၣ်၀ဲတၢ်မူအသါအသိးန့ၣ် ဟ့ၣ်တၢ်မူ ဆူပ၀ဲဒီး တၢ်ဘၣ်တ့ခဲလၢာ်အအိၣ်န့ၣ်လီၤ (၁ မိၤ ၂း၇) ႉ တၢ်ခဲလၢာ် ဟဲကဲထီၣ်၀ဲဒၣ်အသးလၢ ယွၤဒီး ပတၢ်သါလၢ ပသါထုးထီၣ်ကွံာ်အီၤလၢ ပတဆိကမိၣ်လၢအဂ့ၢ်ဒၣ်လဲာ် ဟဲ၀ဲဒၣ်လၢ ယွၤလီၤႉ
ပအိၣ်မူလၢမုၢ်မဆါတနံၤအံၤ ဖဲတၢ်ကိးမံၤဒဲး ဘၣ်လီၢ်ဘၣ်စး၀ဲဒီး စဲးဖီကဟၣ် တၢ်သ့တၢ်ဘၣ် အိၣ်အါမးအခါ‚ ဘၣ်သ့ၣ်သ့ၣ် ပကဘၣ် တၢ်လ့ပစီပှၤ ဒ်သိး ပကသးပ့ၤနီၣ် တၢ်အခီၣ်ထံးတဖၣ်ဒီး ပကသးပ့ၤနီၣ် ယွၤလၢအဟ့ၣ်ပှၤတၢ်မူန့ၣ်လီၤႉ ဘၣ်ဆၣ် ဖဲပအိၣ်ပတုာ်လၢ ပကသ့ၣ်နီၣ်ထီၣ်က့ၤ ယွၤလၢအမ့ၢ်တၢ်ဘၣ်တ့ကစၢ်န့ၣ်ဒီး‚ ကဒုးအိၣ်ထီၣ် သးလၢအစံးဘျုးစံးဖှိၣ်တၢ် လၢပတၢ်အိၣ်မူ တနံၤဘၣ်တနံၤအပူၤလီၤႉ ပဃ့ကစၢ်ယွၤ ဒ်သိးကမၤစၢၤပှၤ ဒီးပကတူၢ်လိာ်သးသမူ အတၢ်ဟ့ၣ်လၢ တၢ်ဆီၣ်လီၤသးလၢ တၢ်စံးဘျုးအပူၤ သ့၀ဲန့ၣ်လီၤႉ မ်ပတၢ်စံးဘျုးအံၤ ပုာ်ထီၣ်ယွၤလီၤဒီး ထိးဘၣ် ပှၤအဂၤတဖၣ် ဒ်သိးအ၀ဲသ့ၣ်စ့ၢ်ကီး ကသ့စံးဘျုး ကစၢ်ယွၤလၢ အတၢ်မၤဂ့ၤဒီး အတၢ်သးတီအဃိန့ၣ်တက့ၢ်ႉ
ဗာပ Bသကခ့နမ ာ်ပန