တၢ်အိၣ်ဖှိၣ်သရၣ်ကရၢဖဲ ဝ့ၢ်ခါ(လ)ဘၢး(Carlsbad) လၢအအိၣ်ဝဲဖဲ ကီၢ်နယူမဲးကစံၣ်ကိၣ် (New Mexico) တခါ ဆီၣ်ထွဲမၤစၢၤ ၦၤဂီၢ်မုၢ်လၢလီၢ်ကဝီၤပူၤတဖၣ် ခီဖျိတၢ်ဟ့ၣ်တၢ်အီၣ်တၢ်အီ လၢ အလီၤလၢ တိၤ ၂၄,၀၀၀ ပီၣ် ကိးလါဒဲးလီၤ. ကရၢခိၣ်နၢ်တဲဝဲ “ၦၤတဖၣ် ဟဲဆူအံၤသ့, ပကတူၢ်လိၥ်အီၤ ဒီးထံၣ်လိၥ်သးဒီးအီၤ ဖဲအအိၣ်တၢ် တပူၤလၢ်လၢ်န့ၣ်လီၤ. ပဖီတၢၣ်န့ၣ် မ့ၢ်…ဒ်သိးကမၤစၢၤမၤထီၣ်ဘး အဝဲသ့ၣ်အနီၢ်ခိ တၢ်လိၣ်တဖၣ်, ဒ်သိးအဝဲသ့ၣ် ကတုၤအိၣ် အနီၢ်သးအတၢ်လိၣ်တဖၣ်အဂီၢ်လီၤ. ” ဒ်ၦၤစူၢ်က့ၤနၥ်က့ၤ ခရံၥ်တဖၣ်အသိးန့ၣ် ကစၢ်ယွၤအဲၣ်ဒိး လၢပကဒိးသူတၢ်လၢအဟ့ၣ်ၦၤတဖၣ် ဒ်သိး ကကဲထီၣ်တၢ်ဆိၣ်ဂ့ၤလၢၦၤဂၤအဂီၢ်, ဒ်သိး ကထုးဘူးက့ၤ ၦၤဂီၢ်မုၢ်တဖၣ်ဆူအအိၣ်လီၤ. မ့ၢ်ပကမၤဂ့ၤအါထီၣ် သးလၢအမၤစၢၤတၢ် လၢအဟ့ၣ်ထီၣ် တၢ်လၤကပီၤဆူယွၤ ကသ့ဒ်လဲၣ်.

ပမၤဂ့ၤအါထီၣ်သးလၢအမၤစၢၤတၢ် ခီဖျိပသံကွၢ်ယွၤလၢကဒုးနဲၣ်ၦၤကျဲလၢ ပကဒိးသူ တၢ်ဟ့ၣ်လၢအဝဲဟ့ၣ်ၦၤ ဒ်သိးကကဲဘျုးလၢၦၤဂၤအဂီၢ်န့ၣ်လီၤ (၁ ပ့း ၄: ၁၀). လၢကျဲဒ်အံၤ, ပဟ့ၣ်ဆၢ “တၢ်ပၥ်ဖျါတၢ်ဘျုးဆူယွၤအိၣ်” လၢအတၢ်ဆိၣ်ဂ့ၤ အါအါဂီၢ်ဂီၢ်အဃိလီၤ (၂ ကရံၣ် ၉: ၁၂).

တၢ်မၤဂ့ၤၦၤဂၤန့ၣ် မ့ၢ်စၢ်ယ့ၣ်ၡူးအတၢ်မၤလၢအကါဒိၣ်တမံၤလီၤ. ဖဲကစၢ်ယါဘျါ ၦၤဆူးၦၤဆါ ဒီးလုၢ်အီၣ်ၦၤလၢအသၣ်ဝံၤန့ၣ်, ၦၤအါဂၤသ့ၣ်ညါက့ၤ ကစၢ်ယွၤ အတၢ်ဂ့ၤဒီးအတၢ်အဲၣ်လီၤ. ခီဖျိတၢ်အံးထွဲကွၢ်ထွဲ ၦၤလၢပလီၢ်ကဝီၤပူၤန့ၣ် မ့ၢ်ပပိၥ်ကစၢ်အတၢ်မၤဒိ ဘၣ်ဃးတၢ်မ့ၢ်ပျဲၢ်မ့ၢ်ဘီၣ်လီၤ. ကစၢ်ယွၤအတၢ်ကူၣ်သ့မၤနီၣ်ၦၤလၢ ဖဲပဒုးနဲၣ်ဖျါထီၣ်ယွၤအတၢ်အဲၣ်ခီဖျိပတၢ်မၤန့ၣ် “ၦၤဂုၤၦၤဂၤကစံးထီၣ်ပတြၢၤယွၤလီၤ ” (:၁၃). တၢ်မၤဂ့ၤန့ၣ် တမ့ၢ်လၢပနီၢ်ကစၢ် ပတၢ်ဂ့ၤအဂီၢ်ဘၣ်. မ့ၢ်တၢ်ဒုးနဲၣ်ၦၤဂၤလၢ ယွၤအတၢ်အဲၣ် ဒီးယွၤအတၢ်မၤလီၤလး ခီဖျိၦၤလၢဘၣ်တၢ်ကိးလၢယွၤအမံၤတဖၣ် အပူၤလီၤ.