မိၢ်‚ ယဒီပုၢ်၀ဲၢ်မုၣ်တဖၣ်ဒီးယၤ ပအိၣ်လၢ ပၢ်အလီၢ်မံကပၤ‚ ဖဲအ၀ဲအတၢ်သါထီၣ် သါလီၤ ကဘၢကဘၢစၢ်လီၤစၢ်လီၤ တုၤတသါလၢၤက့ၤတစုန့ၣ်လီၤႉ လၢတၢ်ကတီၢ် ဖုၣ်ဖုၣ် စှၤနံၤစှၤသီလၢ ပၢ်အသးအနံၣ်အလါ ၈၉ နံၣ်‚ အ၀ဲအသး ဟးထီၣ်ဘရၣ်ဘရၣ် ဘီှၣ်ဘှီၣ်ဒီး က့ၤဆူတၢ်လီၢ်လၢ ယွၤအိၣ်ခိးအီၤန့ၣ်လီၤႉ အ၀ဲအတၢ်ဟးထီၣ် ပာ်တ့ၢ်ပှၤ လၢ တၢ်လီၤဖျဲၣ်လီၤဟိလၢ တဘျီအ၀ဲမံလီၤ၀ဲအလီၢ် ဒီးထဲတၢ်သ့ၣ်နီၣ်တမံၤဧိၤ‚ ဒုးသ့ၣ်နီၣ်ပှၤလၢအ၀ဲန့ၣ်လီၤႉ ဘၣ်ဆၣ်‚ ပအိၣ်ဒီး တၢ်မုၢ်လၢ်လၢမုၢ်တနံၤန့ၣ် ပကက့ၤပာ်ဖှိၣ်လိာ်ဘၣ်ပသးန့ၣ်လီၤႉ
ပတၢ်အိၣ်ဒီးတၢ်မုၢ်လၢ်အ၀ဲန့ၣ် မ့ၢ်လၢပနာ်လၢ ပၢ်အံၤက့ၤအိၣ်လၢ ပၢ်ယွၤ အဂီၤထံးလၢ အသ့ၣ်ညါအီၤဒီးအဲၣ်အီၤ အဃိန့ၣ်လီၤႉ ဖဲယပၢ် စးထီၣ်တၢ်သါ အဆိ ကတၢၢ်‚ ကစၢ်ယွၤအိၣ်ဖဲန့ၣ် လၢအသါနုာ်တၢ်သါလၢ အပသိၣ်အပူၤန့ၣ်လီၤ (ယ့ှှါ ၄၂း၅) ႉ တုၤဒၣ်လဲာ်လၢ တချုး အ၀ဲအတၢ်သါအဆိကတၢၢ်ဃုာ်ဒီး တၢ်သါထီၣ် သါလီၤကိးဘျီအဘၢၣ်စၢၤ‚ ကစၢ်ယွၤ ဘူးဘူးတံၢ်တံၢ်ပၣ်ဃုာ်လၢ တၢ်ကိးမံၤလီၤတံၢ် လီၤဆဲးလၢ ယပၢ်အသးသမူ ဒီတစိၤ‚ ဒ်နၤဒီးယၤအသိးန့ၣ်လီၤႉ တၢ်အံၤ မ့ၢ်ကစၢ်ယွၤ အတၢ်မၤလီၤလးဒီး တၢ် ‘တ့’အီၤ တပူၤဃီလၢ မိၢ်အဒၢလီၢ် (စံး ၁၃၉း၁၃-၁၄) အပူၤန့ၣ်လီၤႉ ဒီးဖဲယပၢ်သါ တၢ်သါလၢခံကတၢၢ်‚ ကစၢ်ယွၤအသးစီဆှံ အိၣ်စ့ၢ်ကီး ဖဲန့ၣ်‚ ဟံးဃာ်အီၤလၢ တၢ်အဲၣ်တၢ်ကွံဒီး စိာ်ထီၣ်အီၤလၢ ကက့ၤအိၣ်ဒီးအီၤ (း၇-၁၀) န့ၣ်လီၤႉ
တၢ်အံၤ မ့ၢ်၀ဲတီ၀ဲလၢ ပ၀ဲကိးဂၤစ့ၢ်ကီးလၢ အမ့ၢ်ကစၢ်ယွၤအဖိတဖၣ်န့ၣ်လီၤႉ တၢ်အကတီၢ်ကိးကတီၢ်ဒဲးလၢ ပသးသမူဖုၣ်ကိာ်လၢဟီၣ်ခိၣ်အံၤ‚ ဘၣ်တၢ်သ့ၣ်ညါလၢ ယွၤန့ၣ်လီၤ (း၁-၄) ႉ ပ၀ဲကိးဂၤ ပအိၣ်ဒီးပလုၢ်ပပရၤလၢယွၤအအိၣ်န့ၣ်လီၤႉ လၢတနံၤ စုာ်စုာ်လၢ ပနံၤပသီလၢအအိၣ်တ့ၢ်ဒီး တၢ်အိၣ်မူလၢခဲကိာ်တဃၣ်‚ မ်ပကပာ်ဖှိၣ်တၢ် ဃုာ်ဒီး ‘ကယဲၢ်တၢ်သး၀ံၣ်စံးထီၣ်ပ့တၢၤယွၤတက့ၢ်’ (စံး ၁၅၀း ၆) ႉ