ယကလၢၢ်ဘၣ်တၢ်ကနိးကစုာ်လၢ ယဘၣ်သိၣ်လိ တၢ်သိၣ်လိလၢတၢ်ထုဖၣ်လၢယဲၢ်နွံ အတီၢ်ပူၤဒီး လၢယတူၢ်လိာ်လၢယကသိၣ်လိ ဆူလီၢ်က၀ီၤတၢ်အိၣ်ဖှိၣ်တဖုန့ၣ်လီၤႉ ‘‘မ့ၢ်ပှၤမၤလိတၢ်ဖိ ကဘၣ်သူၣ်ဘၣ်သးတၢ်အံၤဧါႉ မ့ၢ်အ၀ဲသ့ၣ် ကဘၣ်အသးလၢယၤ ကစီဒီဧါ’’ န့ၣ်လီၤႉ ယတၢ်သူၣ်ကိၢ်သးဂီၤ မ့ၢ်တၢ်လၢ အကဲထီၣ် တၢ်ဘၣ်ယိၣ်တၢ် တလၢကွံာ်‚ ဒီးယကတဲာ်ကတီၤသးလၢ တၢ်သိၣ်လိအဂီၢ် တလၢကွံာ် အခၢးတဖၣ်‚ လၢၢ်ဘ့ၣ်ဘၣ်လၢ ကပာ်ဖျါထီၣ်တၢ်ဒီး နီၤဟ့ၣ်လံာ်ခီလၢ အဘၣ်ထွဲဒီးတၢ်သိၣ်လိန့ၣ်လီၤႉ တုၤဒၣ်လဲာ်လၢ ယကသိၣ်လိ တၢ်ဘူးထီၣ်တနွံ‚ ယတအိၣ်ဒီး တၢ်ကဟ့ၣ်ဂံၢ် ဟ့ၣ်ဘါပှၤအါဂၤ ဒ်သိးကထီၣ်တၢ်သိၣ်လိအံၤဘၣ်န့ၣ်လီၤႉ
ဘၣ်ဆၣ်‚ လၢတၢ်ထုကဖၣ်အပူၤ‚ ယဘၣ်တၢ်ဒုးသ့ၣ်နီၣ်ထီၣ်ယၤလၢ တၢ်မၤလိအံၤ မ့ၢ်တၢ်လၢ အကလီၣ်ဖျါထီၣ် ယွၤအလၤကပီၤန့ၣ်လီၤႉ မ့ၢ်လၢသးမုၢ်စီဆှံ ကစူးကါတၢ်မၤလိအံၤ ဒ်သိးကနဲၣ်ပှၤလၢအဟဲထီၣ်တၢ်လၢ ပၢ်လၢမူခိၣ်အဃိ‚ ယကွၢ်ကပာ်ကွံာ် ယတၢ်သူၣ်ကနိးသးကနိးလၢ ကသိၣ်လိတၢ်မၤလိလၢကမျၢၢ်အမဲာ်ညါသ့၀ဲန့ၣ်လီၤႉ ဖဲကစၢ်ယ့ၣ့်ှှူး သိၣ်လိ အပျဲၢ်အဘီၣ်လၢ အတၢ်ကစီၣ်လၢကစၢၢ်ဒီခိၣ်‚ ကစၢ် စံးဘၣ်အ၀ဲသ့ၣ်လၢ ‘သု၀ဲဒၣ်အံၤ‚ သုမ့ၢ် ဟီၣ်ခိၣ်အကပီၤလီၤႉ ၀့ၢ်တ၀့ၢ်လၢ အိၣ်၀ဲလၢ ကစၢၢ်ဒီခိၣ်န့ၣ် အိၣ်တဒၢတသ့ဘၣ်’ႉ ပှၤဒွဲၣ်ထီၣ်မ့ၣ်အူဒၢဒီး ပာ်အီၤလၢ နာ်အဖီလာ်န့ၣ် တအိၣ်ဘၣ် နီတဂၤဘၣ်ႉ မ့ၢ်အပာ်အီၤလၢ မ့ၣ်အူဒၢအလီၢ်အဖီခိၣ်‚ ဒီးကပီၤထီၣ်န့ၢ် ပှၤလၢဟံၣ်ပူၤ ခဲလၢာ်လီၤ’ (မးသဲ ၅း၁၄-၁၅) ႉ
ယဖးဘၣ် ယွၤအကလုၢ်ကထါအံၤဒီး လၢယဆှၢလီၤ တၢ်ဘိးဘၣ်သ့ၣ်ညါလၢ ကမျၢၢ်အအိၣ်လၢပှာ်ဘျးစဲလၢ တၢ်သိၣ်လိအံၤအဂီၢ်န့ၣ်လီၤႉ တကီၢ်ခါ‚ ပှၤကိးဂၤဃၣ် ဃၣ် စးထီၣ်ဆဲးလီၤအမံၤ ပာ်ဖျါထီၣ်တၢ်စံးဘျုးဒီးတၢ်သူၣ်ဟူးသးဂဲၤန့ၣ်လီၤႉ ခီဖျိလၢ တၢ်ထံၣ်ဘၣ်အ၀ဲသ့ၣ် အတၢ်မၤဆၢက့ၤတၢ်ဒ်သိးအံၤ‚ ယလီၣ်ဖျါထီၣ်အါထီၣ် ယ့ၣ့်ှှူးအတၢ်သိၣ်လိလၢအမ့ၢ်‚ ‘‘ႉႉႉသုတၢ်ကပီၤန့ၣ် ဒုးကပီၤထီၣ်အီၤလၢ ပှၤကညီအမဲာ်ညါ ဒ်သိး အကထံၣ်ဘၣ်သုတၢ်မၤဂ့ၤ ဒီးကစံးထီၣ်ပ့တၢၤ သုပၢ်အိၣ်လၢမူခိၣ် ႉႉႉ (း၁၆) ႉ
ဃုာ်ဒီးတၢ်ထံၣ်အ၀ဲန့ၣ်‚ ယသိၣ်လိတၢ်မၤလိအံၤလၢ တၢ်သးခုန့ၣ်လီၤႉ ယဃ့ထုကဖၣ်လၢ ယတၢ်ဖံးတၢ်မၤယိယိဖိအံၤ ကကဲထီၣ်တၢ်ကပီၤဒီး တၢ်ဟ့ၣ်ဂံၢ်ဟ့ၣ်ဘါ ဆူပှၤဂုၤပှၤဂၤ ဒ်သိးအ၀ဲသ့ၣ် ကကပီၤထီၣ်အတၢ်ကပီၤ လၢယွၤအဂီၢ်စ့ၢ်ကီးန့ၣ်လီၤႉ