ကစၢ်ယွၤအဲၣ်ဘၣ် တၢ်စူးကါပှၤကူပှၤကညီတဖၣ်လၢ အဘၣ်တၢ်လဲၤကပာ်ကွံာ်အီၤ လၢ ဟီၣ်ခိၣ်န့ၣ်လီၤႉ ၀့လယၢၢ်ခဲရၠာစး့ၣ် မ့ၢ်ပှၤလၢအဘၣ် တၢ်ဒုးဒိၣ်ထီၣ်အီၤလၢ သ၀ီဆံးဆံးဖိတဖျၢၣ် ဖဲ ၁၇၀၀ နံၣ် ဒီးထီၣ်ဘၣ်ကၠိတဆံးတက့ၢ်လီၤႉ အ၀ဲအတၢ်မၤနၢၤ တၢ်လၢတၢ်ကူၣ်တၢ်ကၤဆံးစှၤအဃိ‚ ဘၣ်အိၣ်မူ၀ဲ ဖှီၣ်ဖှီၣ်ယာ်ယာ်လီၤႉ ဘၣ်ဆၣ်‚ ကစၢ်ယွၤဟ့ၣ်အီၤ တၢ်သးဆူၣ်လၢ ကနီၤဟ့ၣ်တၢ်သးခုကစီၣ်ဒီး ကိးအီၤ ဒ်သိး ကကဲထီၣ် ပှၤစိာ်တၢ်သးခုကစီၣ်တဂၤန့ၣ်လီၤႉ ခဲရၠာစး့ၣ် စးထီၣ်မၤလိဟ့းလ့ၣ်‚ ဧ့ၤ့ဘံၤ ဒီးလဲးတ့ၣ် အကျိာ် ဒီး ကျိာ်ထံလံာ်စီဆှံအသီတက့တူၢ်လၢ ဘ့ၣ်ကၣ်လံၣ်အကျိာ်လီၤႉတနံၤအံၤ‚ အ၀ဲဘၣ်တၢ်ပာ်အီၤ ဒ် ‘‘စိၤခဲအံၤ ပှၤစိာ်တၢ်သးခုကစီၣ်တဖၣ်အပၢ်’’ အသိးလီၤႉလၢအလံာ်ပရၠာစးၢဆူ အဖိဒိၣ်ခွါအအိၣ်န့ၣ် အ၀ဲကွဲးဖျါထီၣ် အတၢ်အိၣ်သးလၢ တၢ်ဆီၣ်လီၤ သးလၢ အဘၣ်ထွဲဒီးအတၢ်သ့တၢ်ဘၣ် ဒ် ‘‘ယမ့ၢ်ခါထီၣ်ခီၣ်ခါဃၢဃၢ သ့၀ဲလီၤႉ ယအိၣ်ဒီးတၢ်သးစွံကတုၤလီၤ’’ႉ
ဖဲကစၢ်ယွၤ ကိးပှၤလၢ တၢ်မၤအခါန့ၣ် အ၀ဲဟ့ၣ်စ့ၢ်ကီးပှၤလၢ တၢ်ဂံၢ်ဆူၣ်ဘါဆူၣ်လၢ ကမၤကဲထီၣ်တၢ်အံၤ‚ ဖဲလၢပတၢ်အိၣ်သး ကအိၣ်ဒ်လဲၣ်ဂ့ၤဒ်လဲၣ်ဂ့ၤ န့ၣ်လီၤႉ လၢလံာ်စံၣ်ညီၣ်ကွီၢ် ၆း၁၂‚ ကစၢ်ယွၤအကလူး ဟဲဖျါထီၣ်လၢ စီၤကံးဒဧိၣ်ဒီး စံး ‘ယွၤအိၣ်ဒီးနၤ‚ ပှၤသုးဖိအဆူၣ်တဂၤဧၢ’ႉ ၀ံၤ‚ ကလူးအံၤ စံးဘၣ်အီၤလၢ‚ ကမၤပူၤဖျဲး ပှၤအံၣ်စရၠာစး့လးဖိလၢ ပှၤမံးဒယၣ်အစုပူၤလၢ အမၤဟးဂီၤ‚ ဂုာ်ဆူၣ်ပျိဆူၣ် အ၀ဲသ့ၣ်အ၀့ၢ်ဒီးအစံၣ်ပျီတဖၣ်လီၤႉ ဘၣ်ဆၣ်‚ စီၤကံးဒဧိၣ်လၢ အတမ့ၢ်ဘၣ် ပှၤလၢအအိၣ်ဒီး လီၢ်လၤလၢ အမ့ၢ် ‘ပှၤသုးဖိအဆူၣ်’ လၢတၢ်ဆီၣ်လီၤသး အပူၤ စံးဆၢက့ၤ တၢ်လၢ ‘ယကအုၣ်က့ၤခီၣ်က့ၤ အံၣ်စရၠာစး့လးလၢမနုၤတမံၤလဲၣ်ႉႉႉ ကွၢ်ကွၢ်‚ ယမ့ၢ်ပှၤဖှီၣ်ဖိယာ်ဖိ လၢမနၤဒီးၣ်အပူၤ’’ (း၁၅) လီၤႉ ဘၣ်ဆၣ်‚ ကစၢ်ယွၤ စူးကါဒံးဒၣ်အီၤ ဒ်သိး ကမၤပူၤဖျဲးကွံာ် အပှၤဂီၢ်မုၢ်န့ၣ်လီၤႉ
နီၣ်၀ံာ်ခံလၢ စီၤကံးဒဧိၣ် အတၢ်မၤနၢၤတၢ်န့ၣ် မ့ၢ်တၢ်ကတိၤအဖျၢၣ်တဖၣ် လၢအမ့ၢ် ‘ယွၤအိၣ်ဒီးနၤ’ (း၁၂) န့ၣ်လီၤႉ ဒ်ပဆီၣ်လီၤသးဒီးလဲၤသကိးတၢ်လၢ ပကစၢ် လၢအအုၣ်က့ၤခီၣ်က့ၤပှၤဒီး သန့ၤထီၣ်သးလၢ အ၀ဲအတၢ်ဂံၢ်ဆူၣ်ဘါဆူၣ်‚ အ၀ဲကဟ့ၣ်ဆူၣ်ထီၣ်ပှၤ ဒ်သိးကမၤလၢပှဲၤတၢ်လၢ‚ အကဲထီၣ်သ့ထဲဒၣ်လၢ အဟဲခီဖျိလၢအီၤဧိၤန့ၣ်လီၤႉ