တၢ်တနီၤနီၤ တဂိာ်တသီၣ်ဖဲလၢ နတလဲၤခီဖျိဘၣ်အီၤန့ၣ်လီၤႉ ဖဲယဒၢထီၣ် ယဖိ၀ဲၢ်ကိ ကတီၢ်‚ ယဖးလံာ်အကလုာ်ကလုာ်လၢ အဘၣ်ထွဲဒီးတၢ်ဆံးစၢ်ဖိဒီး ဒိကနၣ်တၢ်လၢ ပိာ်မုၣ်လၢအဂၤအဆံဘျဲၣ်လၢ အအိၣ်ဒီးတၢ်လဲၤခီဖျိလၢ တၢ်ဆံးစၢ်အဖိတဖၣ်န့ၣ်လီၤႉ ဘၣ်ဆၣ်‚ ယတယာ်ဆိတသ့လၢ တၢ်ကကဲထီၣ်သးနီၢ်နီၢ်နီတမံၤလၢ တၢ်အံၤ ကမၤသး ဒ်လဲၣ်ဘၣ်န့ၣ်လီၤႉ တၢ်လၢယနီၢ်ခိကဘၣ်မၤ၀ဲအံၤ‚ ဖျါလၢ အကဲထီၣ်သးတသ့၀ဲဘၣ် န့ၣ်လီၤႉ
ထဲသိးဒီး စီၤပီလူးပာ်ဖျါထီၣ် တၢ်အိၣ်ဖျဲၣ်ထီၣ်လၢ ယွၤအဘီအမုၢ်အပူၤလၢ ၁ ကရၠာစးံၣ်သူး အပူၤလၢ အမ့ၢ်တၢ်အုၣ်က့ၤခီၣ်က့ၤလၢ ယွၤဟ့ၣ်လီၤပှၤ ခီဖျိကစၢ်ခရၠာစးံာ် န့ၣ် ဖျါလၢ တၢ်နၢပၢၢ်အီၤတန့ၢ်လၢ ပှၤလၢအတလဲၤခီဖျိဘၣ်တ့ၢ် တၢ်အံၤန့ၣ်ဘၣ်လီၤႉ တၢ်အံၤဖျါလီၤဂာ်မး ဒ် ‘တၢ်ကလီကလီ’‚ လၢကစံးလၢတၢ်အုၣ်က့ၤခီၣ်က့ၤ ဟဲခီဖျိသ့၀ဲလၢ ထူၣ်စုညါဒီး တၢ်သံလၢ အဘၣ် တၢ်ပာ်ပနီၣ်လၢ တၢ်ဂံၢ်စၢ်ဘါစၢ်‚ တၢ်ဃၣ်ကွံာ်သးဒီး တၢ်မဲာ်ဆှးလီၤႉ ဘၣ်ဆၣ်‚ ‘တၢ်ကလီကလီ’ အံၤ မ့ၢ်တၢ်အုၣ်က့ၤ ခီၣ်က့ၤလၢ စီၤပီလူး စံၣ်တဲၤတဲလီၤ၀ဲန့ၣ်လီၤႉ
တၢ်အုၣ်က့ၤခီၣ်က့ၤ ဒ်သိးအံၤန့ၣ် တမ့ၢ်တၢ်လၢ ပှၤတဂၤဂ့ၤတဂၤဂ့ၤ ကဆိ ကမိၣ်၀ဲလၢ ကျဲဒ်သိးအံၤန့ၣ်ဘၣ်ႉ ပှၤတနီၤဆိကမိၣ်လၢ တၢ်အုၣ်က့ၤခီၣ်က့ၤ ကဟဲခီဖျိ လၢ ခိၣ်နၢ်လၢအမၤထံဂ့ၢ်ကီၢ်ဂ့ၢ်လၢ အဂံၢ်ဆူၣ်တဂၤ မ့တမ့ၢ် တၢ်ပနီၣ်လီၤလး န့ၣ်လီၤႉ ဒီး တနီၤကဆိကမိၣ်လၢအ၀ဲသ့ၣ်အတၢ်သ့တၢ်ဘၣ် မ့တမ့ၢ် အတၢ်မၤ ကဲထီၣ်လိၣ်ထီၣ် တၢ်လၢ တၢ်ဆိကမိၣ်ဆိကမးတၢ်‚ ကမ့ၢ်အ၀ဲသ့ၣ် အတၢ်အုၣ်က့ၤခီၣ်က့ၤ (၁ ကရၠာစးံၣ် ၁း၂၂) လီၤႉ ဘၣ်ဆၣ် ယွၤ‚ မၤကမၢကမၣ် ပှၤကိးဂၤလၢ ဟဲစိာ် တၢ်အုၣ်က့ၤခီၣ်က့ၤလၢ ကျဲလၢအကဲထီၣ်လိၣ်ထီၣ်တၢ်လၢ ပှၤလၢအစူၢ်နာ်တၢ်ဒီး ပှၤလၢအလဲၤခီဖျိဘၣ်တၢ်အံၤ န့ၣ်လီၤႉ
ယွၤဟံးထီၣ်တၢ်လၢ တၢ်မဲာ်ဆှးဒီးတၢ်ဂံၢ်စၢ်ဘါစၢ်လၢ အမ့ၢ်တၢ်သံလၢ ထူၣ်စုညါအလိၤဒီး ဒုးကဲထီၣ်တၢ်အံၤလၢခီၣ်တဃၣ်လၢ တၢ်ကူၣ်သ့ဒီးတၢ်စိကမီၤ န့ၣ်လီၤႉ ယွၤမၤတၢ်လၢတၢ်ဆိကမိၣ်ထီၣ်တန့ၢ်ဘၣ်န့ၣ်လီၤႉ အ၀ဲဃုထၢထီၣ် တၢ်ဂံၢ်စၢ် ဘါစၢ် ဒီးတၢ်ကလီကလီလၢဟီၣ်ခိၣ်အံၤလၢ ကမၤမဲာ်ဆှးတၢ်လၢ ပှၤကူၣ်ဘၣ်ကူၣ်သ့ (း၂၇) န့ၣ်လီၤႉ
ဒီးအ၀ဲအတၢ်မၤ လီၤကမၢကမၣ်တၢ်‚ ကျဲလၢအမၤကမၢကမၣ်ပှၤအသး တဖၣ်‚ ထီဘိမ့ၢ်ကျဲလၢအဂ့ၤကတၢၢ်တဖၣ်န့ၣ်လီၤႉ