ပူၤကွံာ်မုၢ်ဃုနံၤ မူၢ်ထူၣ်လီၤန့ၣ် ပဟံၣ်ဖိဃီဖိတဖၣ်‚ ပဟံးန့ၢ်မုၢ်ဆါ အတၢ်အီၣ် ဖဲပလီၢ် က၀ီၤတၢ်အီၣ်ကျးအပူၤန့ၣ်လီၤႉ ဖဲပှၤခိးတၢ်အီၣ်ဖိလၢတၢ်အီၣ်ကျး ပာ်လီၤ တၢ်အီၣ်လၢ စီၢ်နီၤခိၣ်‚ ယ၀ၤကွၢ်ထီၣ် ပှၤအံၤအမဲာ်ဒီး သံကွၢ်၀ဲ မ့ၢ်အမံၤဒ်လဲၣ်န့ၣ်လီၤႉ ၀ံၤ‚ သံကွၢ်၀ဲ လၢ‚ ‘‘တချုးလၢ ပဟံးန့ၢ်တၢ်အီၣ် ဒ်ဟံၣ်ဖိဃီဖိတဖၣ်အသိး ပဃ့ထုကဖၣ်တၢ်လီၤႉတနံၤအံၤ‚ မ့ၢ်တၢ်လၢ ပကဘၣ်ဃ့န့ၢ်လၢနဂီၢ် အိၣ်၀ဲတမံၤမံၤဧါ’’ န့ၣ်လီၤႉ အဲလၢာ် လၢ မံၤလၢပသ့ၣ်ညါဘၣ်ခဲအံၤ‚ ကွၢ်ပှၤလၢတၢ်ကမၢကမၣ် ဒီးတၢ်သူၣ်ကိၢ်သးဂီၤအပူၤလီၤႉ တၢ်ဘရၣ်တၢ်ဘှီၣ်တစိၢ်ဖိ‚ တချုးဖဲအ၀ဲစံးပှၤလၢ တနၤစုာ်စုာ်‚ အ၀ဲဘၣ်မံလၢအတံၤသကိးအလီၢ်ဆ့ၣ်နီၤဖးထီအလိၤ‚ အသိလ့ၣ်ဟးဂီၤဒီးအ၀ဲဘၣ်ဒိဘၣ်ထံးန့ၣ်လီၤႉ
ယ၀ၤသးဘိ ဃ့ထုကဖၣ်လၢ ကစၢ်ယွၤကမၤပှဲၤက့ၤတၢ် လၢ အဲလၢာ်ဒီး လီၣ်ဖျါထီၣ်အတၢ်အဲၣ်လၢ အ၀ဲအလိၤအဂီၢ်န့ၣ်လီၤႉ ယဆိကမိၣ်ထီၣ်ပတၢ်ထုကဖၣ်လၢပှၤအံၤအဂီၢ်န့ၣ် လီၤဂာ်ဒ်အဟဲကဲထီၣ် ဖဲသးစီဆှံ ဟံးထီၣ်တၢ်လၢ ပဃ့ထုကဖၣ် ဒီး ဆဲးကျိးန့ၢ်ပှၤလၢ ကစၢ်ယွၤန့ၣ်လီၤႉ လၢပတၢ်လိၣ်ဘၣ် တၢ်အဒိၣ်ကတၢၢ် အကတီၢ်တဖၣ်‚ ဖဲပသ့ၣ်ညါလၢ ပကဟံးထီၣ် သးသမူအတၢ်ကွၢ်ဆၢၣ်မဲာ်လၢ ပကစၢ်ဒၣ် ပ၀ဲတသ့‚ ဖဲပတသ့ၣ်ညါ မ့ၢ်ပကဘၣ်တဲကစၢ်ယွၤ ဒ်လဲၣ်ကတီၢ်န့ၣ် ‘‘သးစီဆှံ ဃ့န့ၢ်တၢ် လၢယွၤအပှၤဂီၢ်မုၢ်အဂီၢ်’’ (ရၠာစးိမ့ၤ ၈း၂၇) လီၤႉ တၢ်လၢ သးစီဆှံဃ့၀ဲ မ့ၢ်တၢ်လၢ အလီၤကမၢကမၣ်အံၤ မၤလီၤတံၢ်န့ၢ်ပှၤလၢ‚ ထီဘိမ့ၢ်တၢ်လၢ အဘၣ်ဘျိးဘၣ်ဒါဒီး ယွၤအတၢ်ဘၣ်သးလၢ ပတၢ်အိၣ်မူအပူၤန့ၣ်လီၤႉ
လၢခံတဘျီ ဖဲနမ့ၢ်ဃ့ထုကဖၣ်လၢ ကစၢ်ယွၤအတၢ်နဲၣ်ကျဲ‚ တၢ်မၤပှဲၤ ဆီၣ်ထွဲဒီး တၢ်ကဟုကယာ်ဒီတဒၢတၢ်လၢ ပှၤတဂၤဂၤအတၢ်အိၣ်မူအဂီၢ်န့ၣ် မ်တၢ်အဲၣ် တၢ်သးကညီၤ ဒုးသ့ၣ်နီၣ်ထီၣ်နၤလၢ နသးအတၢ်လိၣ်တဖၣ်စ့ၢ်ကီး‚ ဘၣ်တၢ်စိာ်ထီၣ်ဆူ ကစၢ်ယွၤလၢ အသ့ၣ်ညါနမံၤနသၣ်ဒီး အသးအိၣ်စ့ၢ်ကီးနၤလၢ တၢ်ဂ့ၢ်ကီတဖၣ်လၢ နဘၣ်ကွၢ်ဆၢၣ်မဲာ်အီၤန့ၣ်တက့ၢ်ႉ