တၢ်အံၤမ့ၢ်တၢ်လၢအထုးသူၣ်ထုးသး လၢကကွၢ်ပှၤကညီတဖၣ်အတၢ်သးဆူၣ်ဒီး တၢ်လုၢ်ထီၣ်သးလၢ ကလူၤပိာ်ထွဲတၢ်လၢ အ၀ဲသ့ၣ်အတၢ်မံမီၢ်တဖၣ်န့ၣ်လီၤႉ ပိာ်မုၣ် သးစၢ်လၢ ယသ့ၣ်ညါအီၤတဂၤ‚ တယံာ်ဖျိထီၣ်လၢ ခီလ့ၣ်ကၠိလၢ တၢ်မၤလိသၢနံၣ်၀ံၤ ၀ဲ ဒ်အ၀ဲလုၢ်ထီၣ်သးလၢာ်လၢာ်ဆ့ဆ့ ဒ်သိးကဒိးန့ၢ်၀ဲန့ၣ်လီၤႉ တံၤသကိးတဂၤ လိၣ်ဘၣ် သိလ့ၣ်လီၤလီၤဆီဆီတဆိ‚ ဒီးလၢတၢ်အံၤအဃိ အ၀ဲမၤတၢ်ဆူၣ်ဆူၣ်လၢတၢ်ဘှီဒီး ဆါကိၣ်ခ့းတဖၣ် တုၤအ၀ဲ မၤလၢပှဲၤတၢ်လၢအတိာ်၀ဲတစုလီၤႉ ပှၤလၢအဆါတၢ်ပရၤတၢ် တဂၤ ဃုထံၣ်န့ၢ် ပှၤအဂၤတကယၤလၢ ကဆါတၢ်ပရၤတၢ်အဂီၢ် လၢကိးနွံဒဲးန့ၣ်လီၤႉ
ဖဲတၢ်အံၤဂ့ၤ၀ဲလၢ တၢ်ကဃုထံၣ်န့ၢ်တၢ်လၢ အဘၣ်တၢ်ပာ်လုၢ် ပာ်ပရၤလၢ ဟီၣ်ခိၣ် ဒီးဖဲအံၤတၢ်လၢအကါဒိၣ်န့ၢ်ဒံး တၢ်အံၤတမံၤ မ့ၢ်တၢ်လၢပကဘၣ်ဆိကမိၣ် ထီၣ်လၢ ပကဘၣ်ဃုအီၤန့ၣ်လီၤႉ
လၢတၢ်မုၢ်လၢ်ဆံးစှၤဒီး တၢ်ဘၣ်ဂုာ်ကျဲးစၢးလၢ မဲးမုၣ်ခိၣ်အပူၤ‚ စီၤပၤဒၤ၀ံး ကွဲးဖျါထီၣ်လၢ ‘‘ယွၤဧၢ‚ နမ့ၢ်ယကစၢ်လီၤႉ ယဃုနၤဂီၤဂီၤ ယသးအံၤ သူအသးလၢ နၤႉႉႉ’’ (စံး ၆၃း၁) လီၤႉ ဒ်စီၤဒၤ၀ံးကိးထီၣ်တၢ်ဆူ ကစၢ်ယွၤအအိၣ်ဒီး ကစၢ်ယွၤ သုးဘူးသးဆူ စီၤပၤလၢအလီၤဘှံးလီၤဘှါအံၤ အအိၣ်လီၤႉ စီၤဒၤ၀ံးအသးလၢ အသူ ကစၢ်ယွၤယိာ်ယိာ်အံၤ‚ အသးမံဘၣ်ဖဲ အ၀ဲအိၣ်ဘၣ်လၢ ယွၤအမဲာ်ညါန့ၣ်လီၤႉ
စီၤပၤဒၤ၀ံးသ့ၣ်နီၣ်ထီၣ်က့ၤ အ၀ဲအတၢ်ထံၣ်လိာ်သးဒီးယွၤ လၢ ‘‘တၢ်လီၢ်စီဆှံ’’ (း၂) ‚ လဲၤခီဖျိဘၣ်အ၀ဲအတၢ်မၤနၢၤတၢ်ကိးမံၤလၢတၢ်အဲၣ်တၢ်ကွံ (း၃) ‚ ဒီးစံးထီၣ်ပ့တၢၤအီၤ တနံၤဘၣ်တနံၤ‚ ဒီးထံၣ်န့ၢ် တၢ်သးမံနီၢ်နီၢ်လၢအ၀ဲအပူၤ လၢအတလီၤဂာ်ဘၣ်ဒီး တၢ်သးခုသးမံဘၣ်လၢ တၢ်ဘျဲးအီၣ်ဘျဲးအီ (း၄-၅) န့ၣ်ဘၣ်ႉ တုၤဒၣ်လဲာ်လၢမုၢ်နၤ ကတီၢ်‚ အ၀ဲဆိကမိၣ်ထီၣ် ကစၢ်ယွၤအတၢ်ဒိၣ်တၢ်မုၢ်‚ သ့ၣ်ညါနီၣ်အ၀ဲအတၢ်မၤစၢၤဒီး တၢ်ဒီတဒၢ (း၆-၇) န့ၣ်လီၤႉ
တနံၤအံၤ‚ ယွၤအသးစီဆှံ မိၤပှၤဆူ ပကဃုထံၣ်ကစၢ်ယွၤလၢ တၢ်သူၣ်ဆူၣ် သးဆူၣ်န့ၣ်လီၤႉ ဒ်ပစဲဘူးဆူ အ၀ဲအအိၣ်‚ အ၀ဲအစိကမီၤဒီး အတၢ်အဲၣ်တၢ်ကွံ ကဟံးဃာ်ပှၤ ဃုာ်ဒီးအစုထွဲလၢ အဆူၣ်န့ၣ်လီၤႉ ခီဖျိသးစီဆှံ အတၢ်ဆှၢတၢ်တွၤပှၤ‚ ပကသုးဘူးဘၣ်ပသးအါထီၣ် ဆူပှၤလၢအဒုးကဲထီၣ်တၢ်လၢအဂ့ၤ ကိးမံၤန့ၣ်လီၤႉ