ဖဲကမျၢၢ်တၢ်ကတိၤဂ့ၢ်လိာ်ပိၢ်ဖးထီၣ်လၢ တၢ်ဂ့ၢ်လိာ်ဘှီလိာ်လၢအဘၣ်ထွဲဒီး စ့ကဖိ အတၢ်သိၣ်တၢ်သီ‚ တၢ်အံၤမၤလီၤဖးကွံာ် ပှၤစူၢ်က့ၤနာ်က့ၤတၢ်တဖၣ်‚ ဃုာ်ဒီးတၢ်ထံၣ် လၢအလီၤဆီလိာ်သးတဖၣ်လီၤႉ ပှၤတနီၤ ကိးပှၤအဂုၤအဂၤလၢ ‘‘ပှၤလၢအသူၣ်အံၣ် သးအံၣ်’’ မ့တမ့ၢ် ပာ်ဒ့ၣ်ပာ်ကမၣ်အ၀ဲသ့ၣ်လၢ ပှၤလၢအမၤတၢ်အၢၣ်လီၤ ခီဖျိတၢ်မၤ ဖိးဒ့လိာ်သးယၢ်ခီယၢ်ခီလၢ တၢ်စူၢ်တၢ်နာ်န့ၣ်လီၤႉ
တၢ်ဂ့ၢ်လိာ်ဘှီလိာ် ဒုးအိၣ်ထီၣ် တၢ်လီၤမုၢ်လီၤဖး နးနးကျံၤကျံၤလၢ ယွၤအဒူၣ်ဖိထၢဖိအကျါ‚ ဟဲစိာ်တၢ်တူၢ်ဘၣ်တၢ်ဒီး မၤသးဟးဂီၤဘၣ် ကမျၢၢ်တဖၣ်လီၤႉ ယကလၢၢ်ဘၣ်လၢ တၢ်သူၣ်အံၣ်သးဆံးလၢ နီၢ်တဂၤအတၢ်နာ်လၢ မ့ၢ်ယမူထွဲမၤထွဲယဲ လံာ်စီဆှံ အတၢ်သိၣ်တၢ်သီ ဒ်လဲၣ်လၢ ယတၢ်အိၣ်မူအပူၤန့ၣ်လီၤႉ ဒီးလီၤတံၢ်လီၤဆဲး လၢ ယအိၣ်ဒီးတၢ်ကမၣ်တုၤသိးသိးလၢ တၢ်ပာ်ဒ့ၣ်ပာ်ကမၢ် ပှၤဂုၤပှၤဂၤလၢ အသးတလီၤပလိာ်ဒီးယၤတဖၣ်န့ၣ်လီၤႉ
ယကမၢကမၣ်ဘၣ်လၢ တၢ်ဂ့ၢ်ကီအံၤ တသူၣ်လီၤသးလၢ တၢ်မနုၤအဖီခိၣ် မ့တမ့ၢ် တုၤဒၣ်လဲာ်လၢ ပပာ်ဖျါထီၣ်ပတၢ်ထံၣ်တဖၣ်‚ မ့မ့ၢ်ဟဲလၢပတၢ်ပာ်သူၣ်ပာ်သး ဖဲပမၤတၢ်အံၤန့ၣ်လီၤႉ မ့ၢ်ပသးတလီၤပလိာ်လိာ်သးလၢတၢ်ထံၣ်အဖီခိၣ် မ့တမ့ၢ် ဃု ထံၣ်တၢ်ကမၤလီၤပှီၢ်ပှၤလၢ အအိၣ်လၢတၢ်အံၤအလီၢ်ခံတဖၣ်န့ၣ်ဧါႉ
တၢ်ဆၢကတီၢ်အိၣ်၀ဲလၢပလိၣ်ဘၣ်တၢ်လၢတၢ်ကပာ်ဖျါထီၣ်တၢ်သိၣ်ကမၣ် သီကမၣ်တၢ် မ့တမ့ၢ် ဆှဲဖျါတၢ်လၢပဆၢထၢၣ်လၢမနုၤအဖီခိၣ်န့ၣ်လီၤႉ အ့းဖ့းစူး ၄း၂-၆ ဒုးပလီၢ်ပှၤ ဒ်သိးပကမၤတၢ်လၢ တၢ်ဆီၣ်လီၤသး‚ တၢ်သူၣ်စူၤသးစူၤ‚ တၢ်သးစူၤ ဒီးတၢ်အဲၣ်တၢ်ကွံလီၤႉ ဒီးလၢတၢ်ခဲလၢာ်အဖီခိၣ်လၢ တၢ်ကမၤတၢ်ဂုာ်ကျဲးစၢးကိးမံၤဆူ ‘‘တၢ်ကဂုာ်ဟံးန့ၢ် (သု) သးတဖျၢၣ်ဃီ’’ (း၃) န့ၣ်လီၤႉ တၢ်ဂ့ၢ်လိာ်ဘှီလိာ်တနီၤ‚ ကအိၣ်တ့ၢ်ဒံးလၢ တၢ်ကဘၣ်ဆၢတဲာ်ဒံးအီၤန့ၣ်လီၤႉ ဘၣ်ဆၣ်‚ ကစၢ်ယွၤအကလုၢ် ကထါ ဒုးပလီၢ်ပှၤလၢ ပဖီတၢၣ်‚ ထီဘိကဘၣ်မ့ၢ် တၢ်မၤထီၣ်မၤထီ ပှၤဂုၤပှၤဂၤ အတၢ်စူၢ်တၢ်နာ်လၢ အတမ့ၢ်ဘၣ် တၢ်ကမၤလီၤပှီၢ်ကွံာ်တၢ် (း၂၉) န့ၣ်ဘၣ်ႉမ့ၢ်ပထုး လီၤကွံာ်ပှၤဂုၤပှၤဂၤလၢ တၢ်ကမၤနၢၤတၢ်လၢ တၢ်ဂ့ၢ်လိာ်ဘှီလိာ်တၢ်တမံၤန့ၣ်ဧါႉ မ့တမ့ၢ်‚ မ့ၢ်ပပျံၤ ကစၢ်ယွၤမၤစၢၤပှၤ ဒ်သိးတၢ်ကနၢ်ပၢၢ် အ၀ဲအတၢ်မ့ၢ်တၢ်တီတဖၣ်လၢ အမံၤဒီး လၢအကျဲအပူၤန့ၣ်ဧါလီၤႉ သ့ၣ်နီၣ်ထီၣ်က့ၤလၢ ပနီၤဟ့ၣ် တၢ်နာ်တမံၤဃီလၢ ကစၢ်တဂၤဃီအပူၤတမ့ၢ်ဘၣ်ဧါ (း၄-၆) ႉ