ဖဲယနုာ်လီၤဆူ တၢ်ဘါလီၢ်စီဆှံ လၢအပှဲၤဒီးတၢ်သူၣ်၀ံၣ်သးဆၢအခါ‚ ယကွၢ်၀းတရၠာစးံး ဆူကမျၢၣ်တဖၣ် လၢအဟဲပာ်ဖှိၣ်ထီၣ်အသး လၢနံၣ်ထီၣ်သီဟါအဂီၢ်န့ၣ်လီၤႉ တၢ်သးခု စိာ်ထီထီၣ်ယသးဒီး တၢ်မုၢ်လၢ်‚ ဖဲယသ့ၣ်နီၣ်ထီၣ်က့ၤနံၣ်လၢအပူၤကွံာ် အတၢ်ထုကဖၣ် အခါန့ၣ်လီၤႉ ပပှၤကမျၢၢ်တဖၣ် သးအုးသကိးတ့ၢ်လၢ ဖိလၢအလဲၤကမၣ်ကျဲတဖၣ်‚ ပှၤလၢပအဲၣ်တဖၣ်အတၢ်သံ‚ တၢ်ဖံးတၢ်မၤလၢ အလီၤမၢ်တဖၣ်‚ ဒီးတၢ်လီၤမုၢ်လီၤဖးတဖၣ်အဂီၢ်လီၤႉ ဘၣ်ဆၣ်ပလဲၤ ခီဖျိဘၣ်စ့ၢ်ကီး ယွၤအဘျုးအဖှိၣ် ဖဲပသ့ၣ်နီၣ်ထီၣ်က့ၤသး လၢအလဲလိာ်တဖၣ် ဒီးတၢ်ဘၣ်ထွဲ လၢအဘၣ်လိာ်ဘၣ်စး က့ၤတဖၣ်အခါန့ၣ်လီၤႉ ပသဂၢၢ်တ့ၢ် တၢ်မၤန့ၢ်မၤနၢၤ တဖၣ်‚ တၢ်ဖျီတဖၣ်‚ တၢ်ဖျိထီၣ်ကၠိတဖၣ်‚ ဒီးတၢ်ဒိးဘျၢထံ ဆူယွၤအဒူၣ်ဖိထၢဖိအပူၤန့ၣ်လီၤႉ ပတူၢ်လိာ်မုာ်တ့ၢ်ဘၣ် ဖိဆံးဖိ လၢအအိၣ်ဖျဲၣ်ထီၣ်သ့ၣ်တဖၣ်‚ ဖိလၢ အဘၣ်တၢ်လုၢ်ဖိအီၤတဖၣ်‚ မ့တမ့ၢ် ဘၣ်တၢ်ပာ်စီဆှံထီၣ် ဆူယွၤအအိၣ်တဖၣ်‚ ဒီးတၢ်ဂ့ၢ် အါန့ၢ်အန့ၣ်တဖၣ်လံန့ၣ်လီၤႉ
ဖဲပကွၢ်ထံဆိကမိၣ်ကဒါက့ၤတၢ်မၤကွၢ်တဖၣ် လၢတၢ်အိၣ်ဖှိၣ်အပှၤဟံၣ်ဖိ တဖၣ် ဘၣ်ကွၢ်ဆၢၣ်မဲာ်တ့ၢ်၀ဲအခါန့ၣ်‚ ဒ်၀ံယံးရၠာစးမံယၤ သ့ၣ်နီၣ်ထီၣ်က့ၤ ‘အတၢ်နး တၢ်ဖှီၣ်’ ဒီး ‘တၢ်အၢလၢအဘၣ် (အီၤ) ’ အသိး‚ ယနာ်လၢ ‘မ့ၢ်ယွၤအဘျုးအဖှိၣ်‚ မ့ၢ်အသး တတူာ်ဘၣ်သတးဒီး‚ ပတတုၤဘၣ်လၢ တၢ်ဟးဂူာ်ဟးဂီၤဘၣ်လီၤ’ (း၂၂) ႉ ဒ်၀ံမၤမုာ် မၤကျၢၤက့ၤအသး ဒီးယွၤအတၢ်မၤအီၤအကလုၢ်လၢအပူၤကွံာ်အသိးန့ၣ်‚ အတၢ် ကတိၤအဖျၢၣ်တဖၣ် မၤမုာ်ထီၣ်က့ၤယၤလီၤႉ ‘‘ပှၤလၢအကွၢ်လၢ်ယွၤအကျဲ‚ ပှၤလၢ အသး ဃုယွၤတဖၣ်န့ၣ် ယွၤမ့ၢ်တၢ်ဂ့ၤလၢအဂီၢ်လီၤ’’ (း၂၅) ႉ
ဖဲမုၢ်နၤအ၀ဲန့ၣ်န့ၣ်‚ ပှၤတဂၤစုာ်စုာ် လၢကမျၢၢ်ပူၤတဖၣ် ဆၢထၢၣ် ဒ်ခၢၣ်စး လၢတၢ်ပာ်ဖျါထီၣ် ယွၤအတၢ်အဲၣ်လၢအလဲလိာ်သးသမူသ့၀ဲအဂီၢ်လီၤႉ နံၣ်လၢ အကဟဲဒံးတဖၣ်အပူၤ‚ ပမ့ၢ်ဘၣ်ကွၢ်ဆၢၣ်မဲာ် မနုၤဂ့ၤမနုၤဂ့ၤ‚ ဒ်ခရၠာစးံာ်အနီၢ်ခိက့ၢ်ဂီၤ လၢဆၢထၢၣ်သန့ၤလိာ်သးတဖၣ် အသိးန့ၣ်‚ ပသန့ၤပသးလၢယွၤသ့၀ဲလီၤႉ ဖဲပဃုအီၤ ဒီးမၤစၢၤလိာ်ပသး ကဒဲကဒဲအခါန့ၣ်‚ ဒ်၀ံယံးရၠာစးမံယၤအသိး‚ ပကထံၣ်န့ၢ် တၢ်မုၢ်လၢ်လီၤႉ ဖဲပသ့ၣ်နီၣ်ထီၣ်က့ၤ လၢယွၤမ့ၢ်တၢ်ဒ်အလီၢ်လီၢ် ဒီးပသန့ၤ ပသးလၢယွၤ သ့လီၤန့ၣ်‚ ပတၢ်နာ်ကဆူၣ်ထီၣ်အါထီၣ်လီၤႉ