‘‘ခရၠာစးံာ်အိၣ်ဖျဲၣ်ကတုၤအဂီၢ်လိၣ်ဒံးထဲလဲၣ်’’ ဖဲယဖိတဖၣ်အနီၢ်ဆံးဒံးအခါ‚ အ၀ဲသ့ၣ် သံကွၢ်တၢ်ဒ်အံၤ တဘျီ၀ံၤတဘျီ‚ တဘျီ၀ံၤတဘျီလီၤႉ ယသူဒၣ်ကယၢာ် ဖိသၣ်တၢ်ဂီၤ လံာ်နံၣ်လံာ်လါဖိဒီး ကတဲာ်ကတီၤပသး လၢတၢ်ကတုၤအိၣ် ခရၠာစးံာ်အိၣ်ဖျဲၣ် ဘၣ်ဆၣ်‚ တၢ်ဘၣ်အိၣ်ခိးတၢ်အံၤ လီၤကၢၣ်ဘၣ်အီၤလီၤႉ
ဖိသၣ်တဂၤ ဘၣ်အိၣ်ခိးတၢ်အံၤကီ လၢအဂီၢ်ထဲလဲၣ်န့ၣ် ပနၢ်ပၢၢ်သ့ညီညီဖိဘၣ်ဆၣ် လၢယွၤအပှၤဂီၢ်မုၢ်ကဘၣ် အိၣ်ခိးတၢ်အဂီၢ်တမ့ၢ် ပကဒွးတၢ်ဒိၣ်ဒိၣ်မုၢ်မုၢ်ကဲၣ်ဆိးဘၣ်ႉ ဆိကမိၣ်ကွၢ်အဒိ‚ ပှၤတဖၣ်လၢအဒိးန့ၢ်၀ံမံကၤအတၢ်ကစီၣ်‚ လၢအအိၣ်ဒီးတၢ်အၢၣ်လီၤလၢ ‘‘ပှၤတဂၤလၢအကပၢ အံၣ်စရၠာစး့လး‚ ပှၤလၢကဆၢထၢၣ်ဒီးကွၢ်ကစၢ်အသိ လၢ ယွၤအဂံၢ်အဘါတဂၤန့ၣ်တက့ၢ်’’ႉ တၢ်စံးပာ်စးထီၣ် လၢထီၣ်ပှဲၤထီၣ် ဖဲယ့ၣ်။းအိၣ်ဖျဲၣ်ထီၣ် လၢဘ့ၤသလ့ဃ့ၣ် (မးသဲ ၂း၁) ‚ ဖဲပှၤဂီၢ်မုၢ်အိၣ်ခိးကွၢ်လၢ်တၢ် အနံၣ် ၇၀၀ ၀ံၤ အလီၢ်ခံလီၤႉ ဘၣ်ဆၣ်‚ တၢ်စံးပာ်တနီၤလၢ ကဘၣ်လၢထီၣ်ပှဲၤထီၣ်န့ၣ် အိၣ်ဒံး၀ဲလီၤႉ အဂ့ၢ်ဒ်အံၤ ပအိၣ်ခိး ယ့ၣ်။းအတၢ်ဟဲကဒါက့ၤ လၢတၢ်လၢတၢ်မုၢ်လၢ်အပူၤ‚ ဖဲယွၤအပှၤဂီၢ်မုၢ်ခဲလၢာ် ကအိၣ်လၢတၢ်ဘံၣ်တၢ်ဘၢအပူၤ‚ ဒီးအ၀ဲဲဒၣ် ကဒိၣ်၀ဲတုၤဟီၣ်ခိၣ် အကတၢၢ်လီၤ (မံကၤ ၅း၄) ႉ ဖဲန့ၣ် ပကသူၣ်ဖှံသးညီဒိၣ်ဒိၣ်မုၢ်မုၢ် မ့ၢ်လၢပတၢ်အိၣ်ခိး ဖးယံာ်ဖးထီအံၤ ပူၤကွံာ်၀ဲလံအဃိလီၤႉ
လၢပ၀ဲအါဂၤအဂီၢ် တၢ်အိၣ်ခိးအံၤ တညီဘၣ်ပှၤဘၣ်‚ ဘၣ်ဆၣ်ပနာ်ပ၀ဲသ့လၢ ယွၤကမၤလၢပှဲၤအတၢ်အၢၣ်လီၤ လၢကအိၣ်ကဆိးလၢပသးပကျါ ဖဲပအိၣ်ခိးတၢ် အခါန့ၣ်လီၤ (မး ၂၈း၂၀) ႉ အဂ့ၢ်ဒ်အံၤ‚ ဖဲယ့ၣ်။းအိၣ်ဖျဲၣ်ထီၣ်လၢ ဘ့ၤသလ့ဃ့ၣ် ၀့ၢ်ဆံးအခါ‚ ဒ်အစံးပာ်၀ဲအသိး ပာ်ဖျါထီၣ်၀ဲလၢ အတၢ်အိၣ်မူပူၤ အလၢအပှဲၤလီၤ (ကွၢ် ယိၤဟၣ် ၁၀း၁၀) ႉ တနံၤအံၤ‚ ကစၢ် အိၣ်ဒီးပှၤ လၢပတၢ်အိၣ်မူပူၤ ဖဲပအိၣ်ခိး ကစၢ်အတၢ်ဟဲက့ၤ လၢတၢ်သူၣ်ဆူၣ်သးဆူၣ်အပူၤန့ၣ်လီၤႉ