ကသံၣ်သရၠာစးၣ်အတၢ်ကတိၤ လၢအမ့ၢ်၀ဲ ‘‘တၢ်အံၤမ့ၢ်၀ဲဒၣ် တၢ်ဆါအုၣ်လီၤသလဲးအသး (ခဲစၢၣ်) တကလုာ်’’ အံၤ ဟဲလီၤဆဲးတူၢ်လီၤအသးလီၤႉ ဖဲအ၀ဲ ဆိကမိၣ်ထီၣ်အဖိဒီး အ၀ၤအကတီၢ်န့ၣ် လၢအ၀ဲဒၣ်အဂီၢ် ဟီၣ်ခိၣ်အံၤ အိၣ်ကတီၢ်န့ၢ်အီၤလီၤႉ အ၀ဲသ့ၣ် ထုကဖၣ် ကိးနံၤဒဲး လၢတၢ်မုၢ်လၢ်အပူၤ‚ ဒ်သိး တၢ်ဆါအံၤ ကဆီတလဲက့ၤ အသးဆူ တၢ်ဆါအဂုၤအဂၤန့ၣ်လီၤႉ ခါဆူညါန့ၣ် အ၀ဲသ့ၣ် ကဘၣ်မၤ၀ဲဒ်လဲၣ်ႉ လၢမဲာ်ထံမဲာ်နိတဖၣ် ဟဲယွၤလီၤ၀ဲ လၢအဘိးပၤအပူၤ ဒီးလၢကလုၢ်ကပုာ်လုာ်အပူၤ စံး၀ဲ‚ ‘‘တၢ်အံၤ ပျံထီၣ်ကွံာ် ဟီၣ်ခိၣ်အတၢ်ပၢၤဃာ်လံႉ ယွၤဧၢ‚ ဟ့ၣ်ယၤ တၢ်ဂံၢ်တၢ်ဘါတက့ၢ်’’
ဖဲတၢ်ဆူးတၢ်ဆါ အတၢ်နဲၣ်ဖျါ မ့ၢ်၀ဲ တၢ်ဟးဂီၤ လၢာ်လၢာ်ဆ့ဆ့ဒီး ပပၢၤဃာ်တန့ၢ်လၢၤဘၣ် အဆၢကတီၢ်န့ၣ်‚ ပကဃၣ်ကဒါက့ၤပသးဆူလဲၣ်ႉ ၀ံဃဘးကူာ် ပၢၤဃာ် က့ၤ‚ တၢ်လၢအမၤအသးလၢအီၤတန့ၢ်လၢၤဘၣ်ဒီး‚ အတၢ် ပျံၤတၢ်ဖုးသ့ၣ်တဖၣ် မၤလီၤပျံၤက့ၤအီၤလီၤႉ တၢ်စံၣ်ညီၣ်လၢ အကဟဲသ့ၣ်တဖၣ် မ့ၢ်၀ဲ တၢ်တတဲာ်တနါ လၢကတူၢ်ဘၣ်၀ဲလီၤ (ဃဘး ၃း၁၆-၁၇) ႉ
လၢတၢ်သဘံၣ်ဘုၣ် လၢအကမၤတ့ၢ်အသးအပူၤ‚ ၀ံဃဘးကူာ် စံၣ်ညီၣ်တဲာ် ၀ဲလၢ ကအိၣ်၀ဲလၢ အတၢ်စူၢ်တၢ်နာ်အပူၤ (ဃဘး ၃း၄) ‚ ဒီးအိၣ်ဒီး တၢ်သးခုလၢ ယွၤအပူၤလီၤ ( ၃း၁၈) ႉ အ၀ဲဒၣ် တပာ်လီၤ အတၢ်သူၣ်မံသးမံဒီး အတၢ်နာ်လၢ တၢ်ကဲထီၣ် သ့ၣ်တဖၣ်အပူၤ အတၢ်သ့တၢ်ဘၣ် (မ့တမ့ၢ်) အကစၢ်ဒၣ်၀ဲ အက့ၢ်အစီ အပူၤဘၣ်ႉ မ့မ့ၢ် တခီ‚ အ၀ဲဒၣ်ပာ်လိၤ၀ဲဆူ တၢ်ဂ့ၤတၢ်၀ါဒီး တၢ်ဒိၣ်ကတၢၢ် ကစၢ်ယွၤအစုပူၤ တခီလီၤႉ လၢအ၀ဲဒၣ် အတၢ်တီ လၢကစၢ်ယွၤအပူၤသတးဒီး‚ ဒိးန့ၢ်ဘၣ် တၢ်ဟ့ၣ်ဆူၣ်ထီၣ်အီၤ ဒ်သိးကဒုးနဲၣ်ဖျါထီၣ်၀ဲလၢ ‘‘ယွၤယကစၢ်မ့ၢ်ယဂံၢ်ယဘါလီၤႉ မၤယခီၣ် ဒ်တၢ်ဟိမိၢ် အခီၣ်အသိး‚ ဒုးလဲၤယၤ လၢယလီၢ်ထီၣ်ထီအဖီခိၣ်လီၤ’’ (ဃဘး ၃း၁၉) ႉ
ဖဲပဘၣ်သဂၢၢ်ဒီး တၢ်ကဲထီၣ် အကီအခဲလၢအမ့ၢ်‚ တၢ်ဆူးတၢ်ဆါ‚ ဟံၣ်ဖိဃီဖိ အတၢ်သဘံၣ်ဘုၣ်‚ ကျိၣ်စ့အတၢ်ကီတၢ်ခဲ အကတီၢ်န့ၣ်‚ ပ၀ဲကိးဂၤဒဲးစ့ၢ်ကီး ပကဘၣ် ပာ်ထီၣ်တၢ်သ့ၣ်တဖၣ် လၢပတၢ်နာ်အပူၤ ဒီးတီလၢယွၤအပူၤလီၤႉ အ၀ဲအိၣ်ဒီးပှၤ လၢ တၢ်လီၢ်ကိးပူၤဒဲး‚ ဖဲတၢ်လၢပဘၣ်ကွၢ်ဆၢၣ်မဲာ်သ့ၣ်တဖၣ်အပူၤလီၤႉ