ပမၤလၢတၢ်သူၣ်ဆူၣ်သးဆူၣ် ဒ်သိးပကမၤစၢၤပဖိခွါ လၢကဘျါက့ၤဒီးကမၤဘၣ် လိာ်က့ၤ အတၢ်အိၣ်မူအသီ လၢပဟံၣ်ဖိဃီဖိန့ၣ်လီၤႉ အတၢ်လဲၤခီဖျိတမုာ်တလၤ လၢအနီၢ်ဆံးခါအိၣ်ဘၣ်၀ဲ လၢဖိၣ်ဃဲကၠိအံၤ ဒုးကဲထီၣ်အတၢ်ပာ်သူၣ်ပာ်သး လၢအတဂ့ၤတဖၣ်န့ၣ်လီၤႉ ဖဲလၢယအိၣ်ဒီးတၢ်အဲၣ်တၢ်သးအိၣ်ဒိၣ်ဒိၣ်မုၢ်မုၢ် လၢတၢ်ကီတၢ်ခဲတဖၣ် လၢအလဲၤခီဖျိဘၣ်၀ဲ လၢအနီၢ်ဆံးခါအဆၢ ကတီၢ်‚ ယပလၢၢ်လီၤဘၣ်ယသး လၢယစးထီၣ် ဂုၤက့ၤလီၤ ယသးမ့ၢ်လၢအတၢ်ပာ်သူၣ်ပာ်သး ဒ်သိးအံၤတဖၣ်အဃိ လီၤႉ လၢတၢ်မဲာ်ဆှးအပူၤ‚ ယဟ့ၣ်ခီဟ့ၣ်နီၤ ယတၢ်ဂဲၤပျုၢ် ကျဲးစၢးတဖၣ်အံၤ လၢပှၤလၢကူစါယါဘျါအီၤန့ၣ်လီၤႉ အ၀ဲ အတၢ်စံးဆၢ ကပုာ်လုးဖိ ဒုးနၢ်ပၢၢ်ယၤ‚ ‘‘အ၀ဲလိၣ်ဘၣ်နၤ လၢနကလဲၤလၢညါ ႉႉႉ ဒီးဒုးနဲၣ်အီၤ လၢအ၀ဲန့ၣ့်ကၢး၀ဲဒီးတၢ်အဲၣ် တချုးလၢအ၀ဲမၤ၀ဲ ကန့ၢ်ဒ်န့ၣ်အသိးန့ၣ်လီၤႉ’’
စီၤယိၤဟၣ်ဆီၣ်ပှၤ လၢအဒိးန့ၢ် အလံာ်တဖၣ် ဆူတၢ်အဲၣ်လီၤလးယိာ်အပူၤ‚ ယၢၤထီၣ်၀ဲ ယွၤအတၢ်အဲၣ် ဒ်အမ့ၢ်တၢ်ဂံၢ်ထံးဒီးတၢ်ဂ့ၢ်လၢပကဘၣ်အဲၣ်လိာ်သး တဂၤ ဒီးတဂၤန့ၣ်လီၤ (၁ ယိၤ ၄း၇‚ ၁၁) ႉ ယအၢၣ်လီၤ လၢတဘျီဘျီန့ၣ် ယလီၤတူာ်လီၤကာ် လၢယကပာ်ဖျါတၢ်အဲၣ်ဆူပှၤဂၤ‚ ပှၤတမှံၤတပျီၤမ့ၢ်ဂ့ၤ‚ တံၤသကိးတဖၣ်မ့ၢ်ဂ့ၤ‚ ယနီၢ် ကစၢ်အဖိတဖၣ်အဖီခိၣ်မ့ၢ်ဂ့ၤန့ၣ်လီၤႉ သနာ်က့ စီၤယိၤဟၣ်အတၢ်ကတိၤတဖၣ်အံၤ မၤထီၣ် လၢယသးပူၤ ဒ်သိးယကမၤသီထီၣ် ယတၢ်သးဆူၣ်ဒီးတၢ်ဂံၢ်တၢ်ဘါ လၢယကမၤဒ်န့ၣ် မ့ၢ်လၢကစၢ်ယွၤမၤဆိတ့ၢ်လံန့ၣ်လီၤႉ အ၀ဲဆှၢလီၤအဖိခွါ ဒ်သိး ပကပာ်ဖျါ အတၢ်အဲၣ်အလၢပှဲၤ လၢပ၀ဲတဂၤလၢ်လၢ်အဂီၢ်န့ၣ်လီၤႉ ယသးခုစံးဘျုး ဒိၣ်မး လၢအ၀ဲတမၤပှၤ ဒ်ပမၤအီၤအသိး ဒီးဂုၤက့ၤအသး လၢအအဲၣ်ပှၤအဃိန့ၣ်လီၤႉ
ပတၢ်ဟူးတၢ်ဂဲၤလၢအပှဲၤ ဒီးတၢ်ဒဲးဘးတဖၣ် တကွဲမုာ် ကစၢ်ယွၤ အတၢ်အဲၣ် သနာ်က့‚ အ၀ဲအသးတကဒံကဒါလၢ ကဟ့ၣ်ပှၤအတၢ်အဲၣ်ဘၣ်ႉ (ရၠာစးိမ့ၤ ၅း၈) ႉ အတၢ်အဲၣ်လၢ အလဲၤလၢညါအံၤ မၤဆူၣ်ပှၤ ဒ်သိးပကအဲၣ်လိာ်သကိးပသး လၢတၢ်ဟ့ၣ်ဆၢက့ၤအီၤ‚ ဒ်အမ့ၢ် တၢ်ဒုးဘၣ်ကဒါက့ၤ တၢ်အဲၣ်အံၤန့ၣ်လီၤႉ