ယတံၤသကိးရၠာစးံၣ်လ့ၣ်စံး၀ဲ‚ ‘‘ယွၤန့ၣ် လီၤဂာ်ဒ်ပမဲာ်ဖံးခိၣ်’’ အသိးန့ၣ်လီၤႉ ဒီးဖဲန့ၣ် ယဖျးလီၤယမဲာ်ဖံး လၢတၢ်ကမၢကမၣ်အပူၤလီၤႉ အ၀ဲအဲၣ်ဒိးတဲတၢ်အခီပညီ မ့ၢ်တၢ်မနုၤလဲၣ်ႉ
ယစံးအီၤ‚ ‘‘တဲအါထီၣ်ယၤတဘီလဲၣ်’’ႉ ပ၀ဲခံဂၤပမၤလိသကိး ကစၢ်ယွၤ အဂ့ၢ်အကျိၤ လၢလံာ်စီဆှံအပူၤ လၢအဖျါဖဲ ယ့ှှါ ၄၂း၁၄‚ လၢအပာ်ဖျါထီၣ်၀ဲ ‘ယွၤမ့ၢ်၀ဲဒ်မိၢ်တဂၤ လၢအ၀ံဘၣ်အဖိ‚ မ့တမ့ၢ် ပှၤတဂၤလၢအဘၣ်ဂၢၤဃာ်ဒီးအံးထွဲကွၢ်ထွဲ အပှၤ ဂီၢ်မုၢ်’ (၇း၁၈) န့ၣ်လီၤႉ ဘၣ်ဆၣ် ဒီးတၢ်အံၤမ့ၢ်တၢ်အသီ လၢယဂီၢ်လီၤႉ ရၠာစးံၣ်လ့ၣ်ဒုးနဲၣ်ကဒီးယၤ ၅ မိၤ ၃၂ လၢစီၤမိၤဒီး အတၢ်စံးထီၣ်ပ့တၢၤအထါအပူၤ လၢအဒုးနဲၣ်ဖျါထီၣ်၀ဲ ယွၤမ့ၢ်၀ဲပှၤလၢအအံးထွဲကွၢ်ထွဲ အပှၤဂီၢ်မုၢ်တဂၤန့ၣ်လီၤႉ အဆၢဖိ ၁၀ န့ၣ် ပာ်ဖျါထီၣ်၀ဲ ယွၤမ့ၢ်ပှၤလၢအကဒုဃာ် ဒီးဂၢၤဃာ်အပှၤဂီၢ်မုၢ်တဖၣ် ‘‘ဒ်အမဲာ်ပှၤဖိဒၣ်၀ဲ’’အသိး န့ၣ်လီၤႉ
ဘၣ်ဆၣ်လံာ်မဲာ်ဖျၢၣ်လၢပကျိာ်ထံ ‘‘မဲာ်ချံဖျၢၣ်’’ အံၤန့ၣ် ရၠာစးံၣ်လ့ၣ် တဲ၀ဲ အခီပညီ မ့ၢ်၀ဲ‚ ‘‘မဲာ်ပှၤဖိ’’ န့ၣ်လီၤႉ တၢ်လၢပမဲာ်ဖံးခိၣ်န့ၣ် ကၢၤဃာ်ပမဲာ်ချံ‚ ပမဲာ်ပှၤဖိ ဒ်သိးအသုတဘၣ်ဒိဘၣ်ထံးတဂ့ၤ န့ၣ်လီၤႉ ဒီးခီဖျိ လၢပဖျးပမဲာ်ချံအဃိန့ၣ် တၢ်ကမှံၤဒီးဖၣ်ဆါတဖၣ် တဟဲနုာ်လီၤဆူ ပမဲာ်ချံပူၤလၢၤဘၣ်န့ၣ်လီၤႉ ဒီးပမဲာ်ဖံးအံၤကၢၢ်ဘၢဃာ်စ့ၢ်ကီး ပကပၢၤသုတနုာ်လီၤ၀ဲ ဆူပမဲာ်ချံပူၤတဂ့ၤအဂီၢ်န့ၣ်လီၤႉ ဒီးအ၀ဲဒၣ်န့ၣ်ဒုးဃၣ်တရၠာစးံးပမဲာ်ချံဖျၢၣ်‚ ဒီးဒုးအိၣ်ဆူၣ် အိၣ်ခ@ပမဲာ်ချံန့ၣ်လီၤႉ
ဒ်ယထံၣ်ယွၤအက့ၢ်အဂီၤ ဒ်မဲာ်ဖံးအသိးန့ၣ် ယနၢ်ပၢၢ်ယွၤတသ့ခဲလၢာ် ဘၣ်ဆၣ်ဒီး စံးဘျုးယွၤလၢအဒုးနဲၣ်ဖျါထီၣ်အသး လၢက့ၢ်ဂီၤအကလုာ်ကလုာ် လၢအကမၤစၢၤပှၤ ဒီးဒုးနၢ်ပၢၢ်ပှၤ အတၢ်အဲၣ်ပှၤအဃိန့ၣ်လီၤႉ ဖဲပဘံၣ်လီၤပမဲာ်ချံ လၢမုၢ်နၤခါ ဒီးအိးထီၣ်ပမဲာ်ချံလၢမုၢ်ဂီၤန့ၣ်‚ ပဆိကမိၣ်ထီၣ်ယွၤသ့၀ဲ ဒီးစံးထီၣ်ပ့တၢၤ အီၤ လၢအ၀ဲအံးထွဲကွၢ်ထွဲပှၤအဃိန့ၣ်လီၤႉ