ပှၤတ့တၢ်ဂီၤလီၤနံၤသ့ၣ်တဖၣ် ပာ်လီၤ၀ဲအတၢ်ဂီၤခိၣ်တၢၣ် လၢပှၤဂီၢ်မုၢ် လဲၤတၢ် က့ၤတၢ်အါအလီၢ် ဒ်သိးကတ့န့ၢ်ပှၤ တၢ်ဂီၤလီၤနံၤ လၢအပရၤတအါဘၣ်နှၣ်လီၤႉ အ၀ဲသ့ၣ်တ့၀ဲတၢ်ဂီၤန့ၣ် ဒုးကဲထီၣ်ပှၤအဂီၤလီၤနံၤ‚ ဘၣ်ဆၣ်မ့ၢ်တၢ်လၢပတိၢ်နီၢ် အဂီၤဒၣ်၀ဲဘၣ်က့ၤကစီဒီန့ၣ်လီၤႉ
မ့မ့ၢ်ကစၢ်ယွၤအဂီၤန့ၣ်‚ လၢကျဲအဂၤတဘိ ပစံးအီၤ လၢတၢ်ဂီၤလီၤနံၤန့ၣ်တသ့၀ဲဘၣ်ႉ တၢ်ဒုးဆဲၣ်ဃံလၤ နဲၣ်ဖျါထီၣ် အ၀ဲအက့ၢ်အဂီၤတခါဂ့ၤတခါဂ့ၤန့ၣ် မ့ၢ်တၢ် လၢအဒုးကဲထီၣ်တၢ်ထံၣ်ကမၣ်‚ ဒီးတစိၢ်ဖိ ဟါမၢ်ကွံာ်၀ဲ လၢပှၤကညီအတၢ်ထံၣ်ပူၤညီကဒၣ်လီၤႉ ဒ်တၢ်ဂီၤလီၤနံၤ အသိး‚ တၢ်လၢပဒုးနဲၣ်ဖျါထီၣ် ယွၤအက့ၢ်အဂီၤ လၢအတမ့ၢ်ဘၣ် တၢ်နီၢ်ကီၢ်တဖၣ်န့ၣ် တဒုးကဲထီၣ်ပှၤတၢ်လီၤတံၢ် ဒီးတၢ်အကါဒိၣ်ဘၣ်န့ၣ်လီၤႉ ပှၤလၢအအဲၣ်ဒိး ထံၣ်ဒၣ် ယွၤအက့ၢ်အဂီၤ ဒ်အမ့ၢ်ယွၤလၢအပှဲၤဒီး တၢ်သးထီၣ် ဒီးစံၣ်ညီၣ်တၢ်လီၤန့ၣ် ဘၣ်တၢ်ကွဲန့ၢ်လွဲန့ၢ်အီၤ ဒ်သိးကယံၤဒီးပှၤ လၢအထံၣ်ယွၤ ဒ်အမ့ၢ်တၢ်သးအိၣ်အကစၢ်တဂၤအအိၣ်ညီကဒၣ်လီၤႉ ပှၤလၢအထံၣ်ယွၤ ဒ်ဖု တဂၤ ဒ်အပှဲၤဒီးတၢ်သးအိၣ်န့ၣ်‚ ကသမၢကွံာ်၀ဲ က့ၢ်ဂီၤ၀ဲန့ၣ် ဖဲလၢအအဲၣ်ဒိး၀ဲ တၢ်မၤတီမၤလိၤန့ၢ်အ၀ဲသ့ၣ်အခါလီၤႉ ပှၤလၢအထံၣ်ယွၤ ဒ်အမ့ၢ်ယွၤလၢအပှဲၤ ဒီးတၢ်ကူၣ်သ့ဆိကမိၣ်ဒိၣ်အါန့ၢ် တၢ်အိၣ်မူ‚ တၢ်အဲၣ်တၢ်ကွံ‚ လၢမုၢ်ဆ့ၣ်မုၢ်ဂီၤတၢ်အိၣ်မူအပူၤ ဃုထံၣ်၀ဲတၢ်ကူၣ်ဘၣ်ဖးသ့ ဆိကမိၣ်ဆိကမး တၢ်ဒိၣ်န့ၢ်အါန့ၢ်ဒံး တၢ်သန့ၤသး လၢယွၤ တခီန့ၣ်လီၤႉ ပှၤလၢအထံၣ်ယွၤ ဒ်တံၤသကိးအဂ့ၤကတၢၢ်တဂၤအသိးန့ၣ် ကဟးသဒၣ်ကွံာ်ယွၤ ဖဲလၢအထံၣ်န့ၢ် တံၤသကိး လၢအအိၣ်ဘူးကတၢၢ် ဒီးဘၣ်ထွဲ လိာ်သးဒီးအီၤ ဘူးဘူးတံၢ်တံၢ်‚ ဒိၣ်ဒိၣ်အါအါအခါန့ၣ်လီၤႉ
ယွၤဒုးနဲၣ်ပှၤအက့ၢ်အဂီၤ ဒ်အမ့ၢ်ယွၤလၢအပှဲၤဒီးတၢ်သးအိၣ်‚ တၢ်ဘျုး တၢ်ဖှိၣ်အကစၢ်အသိးဘၣ်ဆၣ်‚ အ၀ဲမ့ၢ်ပှၤလၢအစံၣ်ညီၣ်ဃၣ် တၢ်အၢတၢ်သီကစၢ်တဂၤ န့ၣ်လီၤ (၂ မိၤ ၃၄း၆-၇) ႉ ဒ်ပမ့ၢ်ပှၤလၢအပာ်လီၤ ပတၢ်စူၢ်တၢ်နာ် တုၤလီၤလၢ ပတၢ်အိၣ်မူ‚ တၢ်ဖံးတၢ်မၤအပူၤ အသိးန့ၣ်‚ လိၣ်လၢပကဟးဆှဲးကွံာ် တၢ်ထံၣ်ယွၤ‚ ထဲလၢပသးလီအိၣ်ထံၣ်ဒၣ် ယွၤအက့ၢ်အဂီၤတဖၣ်န့ၣ်လီၤႉ ပဘၣ်ဘူၣ်ထီၣ်ဘါထီၣ် ယွၤအတၢ်အိၣ်သးတဖၣ်ခဲလၢာ်လီၤႉ တမ့ၢ်ဘၣ်ထဲ လၢပဘၣ်သး အဲၣ်အီၤတခါဧိၤ ဘၣ်နှၣ်လီၤႉ