ပသကိး ၇ ဂၤ ပလဲၤကနၣ်တၢ်သူၣ်၀ံၣ်သးဆၢ လၢတၢ်မၤသးဖှံ ပှၤကမျၢၢ်အက၀ီၤ အပူၤလီၤႉ ပသကိးသ့ၣ်တဖၣ် ပအဲၣ်ဒိးအိၣ်တပူၤဃီအဃိ‚ ပဆွံကတံာ်ပသး ဒ်သိးကကဲထီၣ် အဂ့ၢ်တဂ့ၢ်လီၤႉ ဖဲအဆၢကတီၢ်န့ၣ် ပိာ်မုၣ်တဂၤ ဟဲဒီးဆွံနုာ်လီၤ အသးလၢပကျါလီၤႉ ယမါတဲဘၣ်အီၤ မ့ၢ်လၢပ၀ဲသ့ၣ်တဖၣ် ပအဲၣ်ဒိးအိၣ်တပူၤဃီ အဃိ ပမၤပ၀ဲ ဒ်အံၤလီၤႉ အ၀ဲ တဲဆၢက့ၤ၀ဲ ‘‘အၢနးမးလဲၣ်’’ ၀ံၤဒီးအသကိးခံဂၤ ဆွံနုာ်ကဒီးအသး လၢပကျါလီၤႉ
အဃိ ပသကိး ၄ ဂၤ ပဆ့ၣ်နီၤတ့ၢ်‚ ပသကိး အဂၤ ၃ ဂၤ ဘၣ်ဆ့ၣ်နီၤလၢ အလီၢ်ခံဒီး‚ အကတီၢ်ဖဲန့ၣ် ယမါ စူ ကွၢ်ထံကွၢ်ဆး ပိာ်မုၣ် ၂ ဂၤန့ၣ် ဒီးစံး၀ဲ‚ ပိာ်မုၣ်လၢ အဆွံနုာ်အသး လၢပကျါအသကိးန့ၣ်‚ အသးပှၢ်၀ဲအဃိ‚ လိၣ်ဘၣ်၀ဲတၢ်မၤစၢၤလီၤဆီ လၢတၢ်လီၢ်အံၤအပူၤလီၤႉ အဃိ ပိာ်မုၣ် အ၀ဲန့ၣ် ကျဲးစၢးပာ်ဖှိၣ်လိာ်သးတပူၤဃီ ဒ်သိး ကကွၢ်ထွဲဘၣ်အီၤကသ့ အဂီၢ်န့ၣ်လီၤႉ အဃိ တၢ်သူၣ်အ့န့သးအ့န့ လၢအ၀ဲသ့ၣ်န့ၣ် ဒံကွံာ် ဖျိးကွံာ်၀ဲလီၤႉ စူ စံး၀ဲ‚ ‘‘လၢတၢ်လီၢ်ဒ်သိးအံၤ လၢအ၀ဲသ့ၣ်အဂီၢ်‚ ကီခဲ၀ဲဒိၣ်မးန့ၣ် နမ့ၢ်ဆိကမိၣ်ဒီး နသ့ၣ်ညါနဲလီၤ’’ႉ မ့ၢ်၀ဲလီၤႉ ပိာ်မုၣ်န့ၣ် ကတိၤဆၢတၢ် ကိၢ်ကိၢ်ဂီၤဂီၤ‚ ဘၣ်ဆၣ် လၢတၢ်သးထီၣ်အလီၢ်န့ၣ်‚ ပ၀ဲသ့ၣ်တခီ ပ့ကၢးမၤကဒါက့ၤလၢ တၢ်သးကညီၤ ဒီးတၢ်အဲၣ်မၤစၢၤ အ၀ဲသ့ၣ်အပူၤလီၤႉ
ဖဲပလဲၤတပူၤလၢ်လၢ်န့ၣ် ပဘၣ်သဂၢၢ်၀ဲဒီးပှၤလၢအလိၣ်ဘၣ် တၢ်သးကညီၤ ဒီးတၢ်မၤစၢၤလီၤႉ ပှၤတၢ်မၢဖိစီၤပီလူးအတၢ်ကတိၤ လၢလာ်အံၤ‚ ကမၤစၢၤ၀ဲပှၤလၢပကကွၢ်ဘၣ်ပှၤလၢပဃၢၤသ့ၣ်တဖၣ် လိၣ်ဘၣ်၀ဲတၢ်သးကညီၤကပုာ်လုးလၢ အထိးဘၣ်အ၀ဲသ့ၣ်လီၤႉ ‘‘ဒ်ပှၤလၢယွၤဃုထၢအီၤ‚ ပှၤစီဆှံ‚ ဒီးပှၤလၢတၢ်အဲၣ်အီၤ သ့ၣ်တဖၣ်အသိးန့ၣ်‚ ကူထီၣ်သိးထီၣ် တၢ်သးကညီၤ‚ တၢ်မၤဂ့ၤတၢ်‚ တၢ်ဆီၣ်လီၤသး‚ တၢ်သးစူၤ‚ တၢ်၀ံသးစူၤတဖၣ်တက့ၢ်’’ (ကလီးစဲ ၃း၁၂) ႉ အ၀ဲဒၣ်ဟ့ၣ်ထီၣ် တၢ်ဆိကမိၣ်စ့ၢ်ကီး လၢ ‘‘ပက၀ံသးစူၤလိာ်ပသးဒီး ပှၤအတၢ်ကမၣ် မ့ၢ်အိၣ်ဒီး‚ ကပျၢ်လိာ်အသးလီၤ’’ (ကလီးစဲ ၃း၁၃) ႉ
ဖဲပဒုးနဲၣ်တၢ်သးကညီၤ ဒီးတၢ်သးအိၣ်မၤစၢၤ ပှၤလၢပဃၢၤန့ၣ် မ့ၢ်ပဒုးနဲၣ် ပှၤဂၤလၢကစၢ်အသးလၢ အမ့ၢ်တၢ်သးကညီၤ ဒီးတၢ်မၤစၢၤပှၤန့ၣ်လီၤႉ